ಇಡಿ ವಿಚಾರಣೆಗೆ ದಿಲ್ಲಿ ಕೋರ್ಟ್‌ ಅಸ್ತು, ಚಿದಂಬರಂಗೆ ಬಿಗಿಯಾದ ಐಎನ್ಎಕ್ಸ್‌ ಉರುಳು

ಹೊಸದಿಲ್ಲಿ: ಐಎನ್‌ಎಕ್ಸ್‌ ಮೀಡಿಯಾ ಅಕ್ರಮ ಹಣಕಾಸು ವರ್ಗಾವಣೆ ಪ್ರಕರಣದಲ್ಲಿ ಮಾಜಿ ಹಣಕಾಸು ಸಚಿವ ಪಿ. ಚಿದಂಬರಂ ವಿಚಾರಣೆಗೆ ಕೋರಿ ಜಾರಿ ನಿರ್ದೇಶನಾಲಯ ಸಲ್ಲಿಸಿದ್ದ ಅರ್ಜಿಗೆ ದೆಹಲಿ ನ್ಯಾಯಾಲಯ ಒಪ್ಪಿಗೆ ನೀಡಿದೆ.

ವಿಶೇಷ ನ್ಯಾಯಾಲಯದ ನ್ಯಾಯಾಧೀಶ ಅಜಯ್‌ ಕುಮಾರ್ ಕುಹರ್‌ ಇಡಿ ವಿಚಾರಣೆಗೆ ಒಪ್ಪಿಗೆ ನೀಡಿದ್ದಾರೆ. ಅಕ್ಟೋಬರ್‌ 17ರ ವರೆಗೆ ಚಿದಂಬರಂ ನ್ಯಾಯಾಂಗ ಬಂಧನದಲ್ಲಿದ್ದು, ಅವರನ್ನು ತನಿಖಾ ಸಂಸ್ಥೆ ತಿಹಾರ್‌ ಜೈಲಿನಲ್ಲಿ ವಿಚಾರಣೆಗೆ ಒಳಪಡಿಸಬಹುದು ಮತ್ತು ಅಗತ್ಯ ಬಿದ್ದರೆ ಬಂಧಿಸಬಹುದು ಎಂಬುದಾಗಿ ಅದೇಶಿಸಿದ್ದಾರೆ.

'ತನ್ನ ವಶಕ್ಕೆ ಒಪ್ಪಿಸುವಂತೆ ಇಡಿ ಕೋರಿಕೊಂಡಿರುವುದು ಈ ಹಂತದಲ್ಲಿ ಆತುರದ ನಿರ್ಧಾರವಾಗಿದೆ' ಎಂಬುದಾಗಿ ನ್ಯಾಯಾಲಯ ವಿಚಾರಣೆಯ ಆರಂಭದಲ್ಲಿ ಅಭಿಪ್ರಾಯಪಟ್ಟಿತು. ಈ ಆದೇಶ ನೀಡಿದ ನಂತರ ಚಿದಂಬರಂ ವಿಚಾರಣೆಗೆ ನ್ಯಾಯಾಲಯದಲ್ಲೇ ಅವಕಾಶ ನೀಡುವಂತೆ ಇಡಿ ಮನವಿ ಮಾಡಿಕೊಂಡಿತು.

ಇದಕ್ಕೆ ಪ್ರತಿಕ್ರಿಯೆ ನೀಡಿದ ನ್ಯಾಯಾಲಯ, “ಈ ವ್ಯಕ್ತಿಯ ಘನತೆಗೆ ತಕ್ಕಂತೆ ನೀವು ಅವರನ್ನು ಸಾರ್ವಜನಿಕವಾಗಿ ವಿಚಾರಣೆ ಮಾಡಿ ಬಂಧಿಸುವುದು ಸರಿಯಲ್ಲ,” ಎಂದು ಅಭಿಪ್ರಾಯಪಟ್ಟಿತು.

ಬಳಿಕ ವಿಶೇಷ ನ್ಯಾಯಾಲಯ ಚಿದಂಬರಂರನ್ನು ಬುಧವಾರ ತಿಹಾರ್‌ ಜೈಲಿನಲ್ಲಿ ವಿಚಾರಣೆ ನಡೆಸಲು ಅನುವು ಮಾಡಿಕೊಟ್ಟಿತು. ವಿಚಾರಣೆ ನಂತರ ಅಗತ್ಯ ಬಿದ್ದರೆ ಬಂಧಿಸುವಂತೆ ಸೂಚಿಸಿತು.