ಹೊಸ ನೋಟಿನ ಭದ್ರತೆಗೂ ಕನ್ನ ಹಾಕಿದ ಐಎಸ್‌ಐ

ಹೊಸದಿಲ್ಲಿ: ಪಾಕಿಸ್ತಾನದಲ್ಲಿ ಮುದ್ರಿತವಾಗಿರುವ ನಕಲಿ ನೋಟುಗಳು ನೇಪಾಳ ಮೂಲಕ ದೇಶದೊಳಗೆ ಮಿತಿಯಿಲ್ಲದೆ ನುಸುಳುತ್ತಿವೆ ಎಂಬ ಆಘಾತಕಾರಿ ಸಂಗತಿಯನ್ನು ದಿಲ್ಲಿ ಪೊಲೀಸ್‌ ವಿಶೇಷ ತನಿಖಾ ವಿಭಾಗ ಪತ್ತೆ ಮಾಡಿದೆ.

ಪೊಲೀಸರ ತನಿಖೆ ವೇಳೆ ಸಂಶಯಾಸ್ಪದ ವ್ಯಕ್ತಿಯೊಬ್ಬ ಬಾಯಿಬಿಟ್ಟಿರುವಂತೆ ಈಗಾಗಲೇ ಪಾಕಿಸ್ತಾನದ ಗುಪ್ತಚರ ಸಂಸ್ಥೆ ಐಎಸ್‌ಐ ಭಾರತದ 2,000 ರೂ. ನೋಟುಗಳನ್ನು ನಕಲು ಮಾಡಿ ಮುದ್ರಣ ನಡೆಸುತ್ತಿದೆ. ಅತಿಹೆಚ್ಚು ಭದ್ರತಾ ವೈಶಿಷ್ಟ್ಯತೆ ಹೊಂದಿರುವ 2000 ರೂ. ನೋಟಿನಲ್ಲಿನ ವೈಶಿಷ್ಟ್ಯತೆಗಳನ್ನು ಐಎಸ್‌ಐ ಸಹಾಯದಿಂದ ಪಾಕ್‌ನ ಏಜೆಂಟರು ನಕಲು ಮಾಡಿದ್ದಾರೆ. ಹೀಗಾಗಿ ನೈಜ ನೋಟುಗಳನ್ನು ಮೀರುವಂಥ ಉತ್ತಮ ಗುಣಮಟ್ಟದಲ್ಲಿ ನಕಲಿ ನೋಟುಗಳನ್ನು ಪಾಕಿಸ್ತಾನ ಮುದ್ರಿಸುತ್ತಿದೆ ಎಂಬುದು ಬಯಲಿಗೆ ಬಂದಿದೆ.

ಆಗಸ್ಟ್‌ 24ರಂದು ದಿಲ್ಲಿಯ ನೆಹರೂ ಪ್ಲೇಸ್‌ನಲ್ಲಿನ ನಕಲಿ ನೋಟು ಏಜೆಂಟ್‌ ಅಸ್ಲಂ ಅನ್ಸಾರಿ ಬಳಿಯಿಂದ ಡಿಸಿಪಿ ಪ್ರಮೋದ್‌ ಕುಮಾರ್‌ ನೇತೃತ್ವದ ಪೊಲೀಸರ ತಂಡ 5.50 ಲಕ್ಷ ರೂ. ಮೌಲ್ಯದ ನಕಲಿ ನೋಟುಗಳನ್ನು ವಶಪಡಿಸಿಕೊಂಡಿತ್ತು. ಆದರೆ ನೋಟುಗಳ ಪತ್ತೆ ವೇಳೆ ಕೆಲವು ಹೊತ್ತು ಅವು ನಕಲಿಯೋ ಅಥವಾ ಅಸಲಿಯೋ ಎಂಬ ಬಗ್ಗೆ ಪೊಲೀಸರಿಗೆ ಗೊಂದಲವುಂಟಾಗಿತ್ತು. ಬಳಿಕ ಅದನ್ನು ನಗದು ಪರಿಶೀಲನಾ ತಜ್ಞರಿಗೆ ಕಳುಹಿಸಿ ಖಾತ್ರಿಪಡಿಸಿಕೊಳ್ಳಲಾಯಿತು.

ಇಂಕ್‌ ಕಳವು: ಇತ್ತೀಚೆಗೆ ದಿಲ್ಲಿ ಪೊಲೀಸರು ವಶಕ್ಕೆ ಪಡೆದ ನಕಲಿ ನೋಟುಗಳಲ್ಲಿ ಪಾಕ್‌ ಏಜೆಂಟರು 'ಆಪ್ಟಿಕಲ್‌ ವೇರಿಯಬಲ್‌ ಇಂಕ್‌'(ಒವಿಇ) ಬಳಸಿರುವುದು ಪತ್ತೆಯಾಗಿದೆ. ಜತೆಗೆ ಆತಂಕಕ್ಕೂ ಕಾರಣವಾಗಿದೆ. 2000ರೂ. ನೋಟುಗಳಲ್ಲಿ ವಿಶೇಷ ಭದ್ರತೆಗಾಗಿ ಭಾರತ ಒವಿಇ ಬಳಸುತ್ತಿದೆ. ಈ ಮಸಿ ನಕಲಿ ನೋಟು ಮುದ್ರಕರಿಗೆ ಸಿಕ್ಕಿರುವುದು ಭದ್ರತಾ ಲೋಪದ ಕಡೆಗೆ ಬೆರಳು ಮಾಡಿದೆ.

2000 ರೂ. ನೋಟಿನ ಮುಂಭಾಗದಲ್ಲಿ ಪಟ್ಟಿಯೊಂದು ನೋಟನ್ನು ಸರಿಸಿದಾಗ ಹಸಿರಿನಿಂದ ನೀಲಿ ಬಣ್ಣಕ್ಕೆ ತಿರುಗುತ್ತದೆ. ಇದಕ್ಕೆ ಕಾರಣ ಒವಿಇ ಎಂಬ ವಿಶೇಷ ಮಸಿ. ಇದು ಕೂಡ ಪಾಕ್‌ನ ಕರಾಚಿಯ ಮಲಿರ್‌ ಹಲ್ತ್‌ನಲ್ಲಿರುವ ನಕಲಿ ನೋಟುಗಳ ಮುದ್ರಣಾಲಯಕ್ಕೆ ಸಿಕ್ಕಿರುವುದು ಆತಂಕ ಸೃಷ್ಟಿಸಿದೆ. ಐಎಸ್‌ಐ ನಿಗಾವಣೆಯಲ್ಲಿ ನಕಲಿ ನೋಟುಗಳು ಮುದ್ರಣಗೊಂಡು ಪಾತಕಿ ದಾವೂದ್‌ ಇಬ್ರಾಹಿಂನ ಡಿ-ಕಂಪನಿ ಜಾಲದ ಮೂಲಕ ಭಾರತದೊಳಗೆ ಬರುತ್ತಿವೆ ಎಂದು ಹಿರಿಯ ದಿಲ್ಲಿ ಪೊಲೀಸ್‌ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

......
6 ತಿಂಗಳ ಹಿಂದೆ ಬಂದ ಬ್ಲೀಡ್‌ ಲೈನ್ಸ್‌ ಕೂಡ ನಕಲು

ಕೇವಲ ಆರು ತಿಂಗಳ ಹಿಂದೆ 2000 ರೂ. ನೋಟಿನ ಎರಡು ತುದಿಗಳಲ್ಲಿ ಬ್ಲೀಡ್‌ ಲೈನ್ಸ್‌ಗಳನ್ನು ಭಾರತ ಸರಕಾರ ಪರಿಚಯಿಸಿತ್ತು. ದೃಷ್ಟಿಮಾಂದ್ಯರಿಗೆ ನೆರವಾಗಲು ಈ ರೀತಿ ಮಾಡಲಾಗಿತ್ತು. ಆದರೆ ಇದನ್ನು ಕೂಡ ಪಾಕ್‌ನ ಐಎಸ್‌ಐ ಏಜೆಂಟರು ಕಳವು ಮಾಡಿ ನಕಲಿ ನೋಟುಗಳಿಗೆ ಅಳವಡಿಸುವುದಲ್ಲಿ ಯಶಸ್ವಿಯಾಗಿದ್ದಾರೆ ಎಂದು ತಿಳಿದುಬಂದಿದೆ.

.......
ಜೂನ್‌ನಲ್ಲಿ ಸಿಕ್ಕಿತ್ತು ಮೊದಲ ಕಳ್ಳನೋಟು ಗಂಟು

2016ರಲ್ಲಿ ನರೇಂದ್ರ ಮೋದಿ ಅವರ ಸರಕಾರ ಅಮಾನ್ಯೀಕರಣ ಘೋಷಿಸಿದ ನಂತರ ಹಲವು ತಿಂಗಳು ಪಾಕಿಸ್ತಾನದಿಂದ ದೇಶದೊಳಗೆ ನಕಲಿ ನೋಟುಗಳು ಪ್ರವೇಶದ ಹಾವಳಿ ನಿಂತಿತ್ತು. ಹಲವು ಏಜೆಂಟರು ಬೇರೆ ಕೆಲಸಗಳನ್ನು ಹುಡುಕಿಕೊಂಡಿದ್ದರು. ಆದರೆ ಈ ವರ್ಷ ಜೂನ್‌ನಲ್ಲಿ ಕಠ್ಮಂಡುವಿನ ತ್ರಿಭುವನ್‌ ವಿಮಾನ ನಿಲ್ದಾಣದಲ್ಲಿ ನೇಪಾಳ ಪೊಲೀಸರು 7.67 ಕೋಟಿ ರೂ. ಮೊತ್ತದ ನಕಲಿ ಭಾರತೀಯ ಕರೆನ್ಸಿಗಳನ್ನು ವಶಕ್ಕೆ ಪಡೆದರು. ಈ ಕಳ್ಳನೋಟಿನ ಗಂಟು ಪಾಕ್‌ನಲ್ಲಿ ಪುನಃ ನಕಲಿ ನೋಟುಗಳ ಮುದ್ರಣ ಆರಂಭಗೊಂಡಿರುವು ಗುಟ್ಟು ರಟ್ಟು ಮಾಡಿತ್ತು.