ಭೂಗತ ಪಾತಕಿಗಳ ಜತೆ ಪಾಪ್‌ ಸಿಂಗರ್‌ ಮಿಕಾ ಸಿಂಗ್‌!

ಇಸ್ಲಾಮಾಬಾದ್‌: ಕೆಲವು ದಿನಗಳ ಹಿಂದೆ ಭಾರತದ ಪಾಪ್‌ ಗಾಯಕ ಮಿಕಾ ಸಿಂಗ್‌ ಪಾಕಿಸ್ತಾನದ ಕರಾಚಿಯಲ್ಲಿ ನೀಡಿದ ಸಂಗೀತ ಕಾರ‍್ಯಕ್ರಮ ವಿವಾದಕ್ಕೆ ಕಾರಣವಾಗಿದೆ. ಪಾಕ್‌ ಮಾಜಿ ಅಧ್ಯಕ್ಷ ಪರ್ವೇಜ್‌ ಮುಷರ್ರಫ್‌ ಸಂಬಂಧಿ ಅದ್ನಾನ್‌ ಅಸಾದ್‌ ತಮ್ಮ ಮಗಳ ಮದುವೆಗೆಂದು ಕರಾಚಿಯ ಭವ್ಯ ಬಂಗಲೆಯಲ್ಲಿ ಆಗಸ್ಟ್‌ 8ರಂದು ಸಂಗೀತ ಸಂಜೆ ಆಯೋಜಿಸಿದ್ದರು. 'ಮಿಕಾ ಸಿಂಗ್‌ ನೈಟ್‌' ಎಂಬ ಈ ಕಾರ‍್ಯಕ್ರಮದಲ್ಲಿ ಭೂಗತ ಪಾತಕಿ ದಾವೂದ್‌ ಇಬ್ರಾಹಿಂ ಸಂಬಂಧಿ ಅನೀಸ್‌ ಇಬ್ರಾಹಿಂ, ಗುಪ್ತಚರ ಸಂಸ್ಥೆ ಐಎಸ್‌ಐ ಮಾಜಿ ಮುಖ್ಯಸ್ಥ ಅಹ್ಮದ್‌ ಶುಜಾ ಪಾಷಾ ಹಾಗೂ ಮತ್ತೊಬ್ಬ ಪಾತಕಿ ಛೋಟಾ ಶಕೀಲ್‌ ಸಂಬಂಧಿಗಳು ಪಾಲ್ಗೊಂಡಿದ್ದರು ಎನ್ನಲಾಗಿದೆ. ಕಾರ‍್ಯಕ್ರಮದ ವಿಡಿಯೊ ಜಾಲತಾಣಗಳಲ್ಲಿ ವೈರಲ್‌ ಆಗಿದೆ.
ನಿಷೇಧ: ಮಿಕಾ ಸಿಂಗ್‌ ಅವರು ಭಾರತ ವಿರೋಧಿ ಪಾತಕಿಗಳು ಪಾಲ್ಗೊಂಡಿದ್ದ ಕಾರ‍್ಯಕ್ರಮದಲ್ಲಿ ಸಂಗೀತ ಸಂಜೆ ನಡೆಸಿಕೊಡುವ ಮೂಲಕ ದೇಶಕ್ಕೆ ಅಪಮಾನ ಮಾಡಿದ್ದಾರೆಂದು ಆರೋಪಿಸಿರುವ ಭಾರತೀಯ ಚಲನಚಿತ್ರ ಕಲಾವಿದರ ಸಂಘವು, ಅವರನ್ನು ನಿಷೇಧಿಸಿದೆ. ಇನ್ನುಮುಂದೆ ಮಿಕಾ ಸಿಂಗ್‌ ಅವರಿಗೆ ಫಿಲ್ಮ್‌ ಪ್ರೊಡಕ್ಷನ್‌ ಹೌಸ್‌, ಮುೂ್ಯಸಿಕ್‌ ಕಂಪನಿಗಳು ಹಾಗೂ ಆನ್‌ಲೈನ್‌ ಮ್ಯೂಸಿಕ್‌ ಕಂಟೆಂಟ್‌ ಪ್ರವೈಡರ್‌ಗಳ ಜತೆ ಕೆಲಸ ಮಾಡಲು ಅವಕಾಶ ನೀಡುವುದಿಲ್ಲ ಎಂದು ಸಂಘವು ಹೇಳಿದೆ.