ಭಾರತದಲ್ಲಿ ಸಾಮಾಜಿಕ ಜಾಲತಾಣದ ಮೂಲಕ ಜಾಲ ವಿಸ್ತರಣೆಗೆ ಐಸಿಸ್‌ ಯತ್ನ; ಎನ್‌ಐಎ ಮಾಹಿತಿ

ಹೊಸದಿಲ್ಲಿ: ಭಾರತದಲ್ಲಿ ಐಸಿಸ್‌ನಿಂದ ಪ್ರಚೋದನೆಗೊಂಡು ದಾಳಿಗೆ ಸಂಚು ರೂಪಿಸಿದ 37 ಪ್ರಕರಣಗಳಲ್ಲಿ 168 ಜನರನ್ನು ಬಂಧಿಸಲಾಗಿದೆ ಎಂದು ರಾಷ್ಟ್ರೀಯ ತನಿಖಾ ಸಂಸ್ಥೆ (ಎನ್‌ಐಎ) ತಿಳಿಸಿದೆ.

ದೇಶಾದ್ಯಂತ ಐಸಿಸ್‌ ತನ್ನ ಸಿದ್ಧಾಂತ ಪಸರಿಸಲು ಯತ್ನಿಸುತ್ತಿದ್ದು, ಇದಕ್ಕಾಗಿ ಯುವಕರನ್ನು ಬಳಸಿಕೊಳ್ಳುತ್ತಿದೆ. ಹಾಗಾಗಿಯೇ ಹಲವರು ಐಸಿಸ್‌ನಿಂದ ಪ್ರಚೋದನೆಗೊಂಡು ದಾಳಿಗೆ ಸಂಚು ರೂಪಿಸುತ್ತಿದ್ದಾರೆ. ಇಂತಹ ಪ್ರಕರಣಗಳಲ್ಲಿ ಇದುವರೆಗೆ 31 ಪ್ರಕರಣಗಳಲ್ಲಿ ಚಾರ್ಜ್‌ಶೀಟ್‌ ಸಲ್ಲಿಸಲಾಗಿದೆ. ಕಳೆದ ಜೂನ್‌ನಲ್ಲಿಯೇ ಒಂದು ಚಾರ್ಜ್‌ಶೀಟ್‌ ಸಲ್ಲಿಸಲಾಗಿತ್ತು. ಜತೆಗೆ 27 ಜನರ ವಿರುದ್ಧ ವಿಚಾರಣೆ ನಡೆದು, ಅವರು ಅಪರಾಧಿಗಳು ಎಂಬುದು ಸಹ ಸಾಬೀತಾಗಿದೆ ಎಂದು ಮಾಹಿತಿ ನೀಡಿದೆ.
ವಿಮಾನ ಸ್ಪೋಟಿಸುತ್ತೇವೆ: ಎರಡೆರಡು ಬಾಂಬ್‌ ಬೆದರಿಕೆ ಕರೆ ಹಿನ್ನೆಲೆ ದಿಲ್ಲಿ ಏರ್‌ಪೋರ್ಟ್‌ನಲ್ಲಿ ಹೈ ಅಲರ್ಟ್‌
ಇದುವರೆಗೆ ನೂರಾರು ಆರೋಪಿಗಳ ವಿಚಾರಣೆ ನಡೆಸಲಾಗಿದ್ದು, ಭಾರತದಲ್ಲಿ ಆನ್‌ಲೈನ್‌ ಮೂಲಕ ತಮ್ಮ ಸಿದ್ಧಾಂತ ಪಸರಿಸಲು ಹಾಗೂ ಯುವಕರನ್ನು ಸೆಳೆಯಲು ಐಸಿಸ್‌ ಪ್ರಯತ್ನಿಸುತ್ತಿದೆ ಎಂಬುದು ತಿಳಿದಿದೆ. ಫೇಸ್‌ಬುಕ್‌, ಟ್ವಿಟರ್‌, ಇನ್‌ಸ್ಟಾಗ್ರಾಂ ಸೇರಿ ಹಲವು ಜಾಲತಾಣಗಳ ಮೂಲಕವೇ ಮುಗ್ಧರನ್ನು ಪುಸಲಾಯಿಸಲು ಯತ್ನಿಸಲಾಗುತ್ತಿದೆ. ಅವರು ಪ್ರಚೋದನೆಗೊಂಡರೆ ಪಿತೂರಿ, ದಾಳಿ ಸಂಚು, ಶಸ್ತ್ರಾಸ್ತ್ರ ಸರಬರಾಜು ಸೇರಿ ಹಲವು ಚಟುವಟಿಕೆಗಾಗಿ ಬಳಸುತ್ತದೆ ಎಂದು ತಿಳಿಸಿದೆ.

ದಾಳಿ ನಡೆಸಿದ್ದು ನಾನೇ ಎಂದು ಹೇಳಿಕೊಂಡ ಐಸಿಸ್
ಕಾಬೂಲ್: ಅಫ್ಘಾನಿಸ್ತಾನ ರಾಜಧಾನಿ ಕಾಬೂಲ್‌ನಲ್ಲಿ ಆಗಸ್ಟ್‌ 26ರಂದು ರಾತ್ರಿ ನಡೆದ ಭೀಕರ ಅವಳಿ ಆತ್ಮಾಹುತಿ ದಾಳಿಗಳಲ್ಲಿ ಮೃತಪಟ್ಟವರ ಸಂಖ್ಯೆ 85ಕ್ಕೆ ಏರಿದೆ. ಸುಮಾರು 140 ಮಂದಿ ಗಾಯಗೊಂಡಿದ್ದಾರೆ. ಈ ದಾಳಿಯನ್ನು ತಾನೇ ಎಸಗಿರುವುದಾಗಿ ಇಸ್ಲಾಮಿಕ್ ಸ್ಟೇಟ್ (ಐಸಿಸ್) ಸಂಘಟನೆ ಹೇಳಿಕೊಂಡಿದೆ.

ಇಂತಹ ಆತ್ಮಾಹುತಿ ದಾಳಿಗಳು ಮತ್ತಷ್ಟು ನಡೆಯುವ ಭೀತಿ ಉಂಟಾಗಿದೆ. ಹೀಗಾಗಿ ತಾಲಿಬಾನ್ ಆಡಳಿತದ ದೇಶದಿಂದ ಹೊರಹೋಗಲು ಹತಾಶೆಯಿಂದ ಪ್ರಯತ್ನಿಸುತ್ತಿರುವ ಅಫ್ಘನ್ ಪ್ರಜೆಗಳನ್ನು ಸ್ಥಳಾಂತರಿಸುವುದಕ್ಕೆ ನೆರವಾಗಲು ಅಮೆರಿಕದ ಪಡೆಗಳು ಸಹಾಯ ಮಾಡುತ್ತಿವೆ. ಅಂದು ಸಂಜೆ ವಿಮಾನ ನಿಲ್ದಾಣದ ಹೊರ ಭಾಗದಲ್ಲಿ ಎರಡು ಸ್ಫೋಟ ಹಾಗೂ ಗುಂಡಿನ ಚಕಮಕಿ ನಡೆದಿತ್ತು. ವಿಮಾನ ನಿಲ್ದಾಣದ ಅಂಚಿನಲ್ಲಿರುವ ಕಾಲುವೆಯೊಂದರಲ್ಲಿ ಹತ್ತಾರು ಮೃತ ದೇಹಗಳು ತುಂಬಿಕೊಂಡಿರುವ ಎದೆ ನಡುಗಿಸುವ ದೃಶ್ಯಗಳನ್ನು ಅಫ್ಘನ್ ಪತ್ರಕರ್ತರು ಸೆರೆಹಿಡಿದ ವಿಡಿಯೋಗಳು ತೋರಿಸಿವೆ.
ಅಮೆರಿಕದ ಮೇಲಾದ 9/11 ದಾಳಿಗೆ 20 ವರ್ಷ! ಈ ಸಮಯದಲ್ಲೇ ಆಫ್ಘನ್‌ನಲ್ಲಿ ತಾಲಿಬಾನ್‌ ಅಧಿಪತ್ಯ
ಈ ಭಯೋತ್ಪಾದನಾ ದಾಳಿಯಲ್ಲಿ ಮೃತಪಟ್ಟ ಅಫ್ಘನ್ನರ ಸಂಖ್ಯೆ 72ಕ್ಕೇರಿದೆ. ಇದರಲ್ಲಿ 28 ತಾಲಿಬಾನಿಗಳೂ ಸೇರಿದ್ದಾರೆ. ಇನ್ನು 13 ಮಂದಿ ಅಮೆರಿಕ ಪಡೆ ಸೈನಿಕರಾಗಿದ್ದಾರೆ. ಅತ್ತ ತಾಲಿಬಾನ್ ಹಾಗೂ ಪಶ್ಚಿಮದ ದೇಶಗಳಿಗೂ ವೈರಿಯಾಗಿರುವ ಐಸಿಸ್, ತನ್ನ ಆತ್ಮಹತ್ಯಾ ಬಾಂಬ್ ದಾಳಿಕೋರರಲ್ಲಿ ಒಬ್ಬಾತ ಅಮೆರಿಕದ ಸೇನೆಯಲ್ಲಿನ ಅನುವಾದಕರು ಹಾಗೂ ಸಹಯೋಗಿಗಳನ್ನು ಗುರಿಯಾಗಿಸಿ ದಾಳಿ ಮಾಡಿದ್ದಾನೆ ಎಂದು ಹೇಳಿಕೊಂಡಿದೆ.

ದಾಳಿಯಲ್ಲಿ ಅಮೆರಿಕದ 18 ಸೈನಿಕರು ಗಾಯಗೊಂಡಿದ್ದಾರೆ. ಅವರನ್ನು ಅಫ್ಘಾನಿಸ್ತಾನದಿಂದ ಶಸ್ತ್ರ ಚಿಕಿತ್ಸೆಯ ಘಟಕಗಳ ವಿಶೇಷ ಸಾಧನಗಳುಳ್ಳ ಸಿ-17ಎಸ್ ವಿಮಾನದಲ್ಲಿ ಕರೆತರುವ ಪ್ರಕ್ರಿಯೆ ನಡೆಸಲಾಗುತ್ತಿದೆ ಎಂದು ಅಮೆರಿಕ ಕೇಂದ್ರ ಸೇನೆಯ ವಕ್ತಾರರು ತಿಳಿಸಿದ್ದಾರೆ.