ಸ್ವದೇಶಿ ಪರಮಾಣು ಗಡಿಯಾರ ಅಭಿವೃದ್ಧಿಪಡಿಸಿದ ಇಸ್ರೋ

ಹೊಸದಿಲ್ಲಿ: ಉಪಗ್ರಹಗಳ ನ್ಯಾವಿಗೇಷನ್‌ಗಾಗಿ ಸಂಪೂರ್ಣ ಸ್ವದೇಶಿ ನಿರ್ಮಿತ ಪರಮಾಣು ಗಡಿಯಾರ (ಅಟೋಮಿಕ್‌ ಕ್ಲಾಕ್‌)ವನ್ನು ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ (ಇಸ್ರೋ) ಅಭಿವೃದ್ಧಿ ಪಡಿಸಿದೆ.

ಈ ವರೆಗೆ ಯುರೋಪಿಯನ್‌ ಏರೋಸ್ಪೇಸ್‌ ಮ್ಯಾನ್ಯುಫಾಕ್ಟರ್‌ ಆಸ್ಟ್ರಿಮ್‌ ಸಂಸ್ಥೆಯಿಂದ ಆಮದು ಮಾಡಿಕೊಳ್ಳುತ್ತಿದ್ದ ಇಸ್ರೋ, ಇದೀಗ ಸ್ವದೇಶಿ ನಿರ್ಮಿತ ಪರಮಾಣು ಗಡಿಯಾರವನ್ನು ಅಭಿವೃದ್ಧಿಪಡಿಸಿ, ಭಾರತ ಬಾಹ್ಯಾಕಾಶ ತಂತ್ರಜ್ಞಾನ ವಿಭಾಗದಲ್ಲಿ ಮಹತ್ತರ ಸಾಧನೆ ಮಾಡಿದೆ.

ಪ್ರಸ್ತುತ ಸ್ವದೇಶಿ ಉಪಕರಣವನ್ನು ವಿವಿಧ ಬಗೆಯ ಪರೀಕ್ಷೆಗಳಿಗೆ ಒಳಪಡಿಲಾಗುತ್ತಿದ್ದು, ಈ ಬಳಿಕ ಪ್ರಯೋಗಾರ್ಥವಾಗಿ ಬಳಸಲಾಗುತ್ತದೆ. ಈ ವೇಳೆ ಗಡಿಯಾರದ ಬಾಳಿಕೆ ಹಾಗೂ ನಿಖರತೆ ಬಗ್ಗೆ ಸ್ಪಷ್ಟ ಮಾಹಿತಿ ಲಭ್ಯವಾಗಲಿದೆ ಎಂದು ಅಹಮದಾಬಾದ್‌ ಮೂಲಕ ಸ್ಪೇಸ್‌ ಅಪ್ಲಿಕೇಶನ್‌ ಸೆಂಟರ್‌ನ (ಎಸ್‌ಎಸಿ) ನಿರ್ದೇಶಕ ತಪನ್‌ ಮಿಶ್ರಾ ಹೇಳಿದ್ದಾರೆ.

ಪರಮಾಣು ಗಡಿಯಾರ ಅಭಿವೃದ್ಧಿ ಪಡಿಸಿದ ಕೆಲವೇ ಬಾಹ್ಯಾಕಾಶ ಕೇಂದ್ರಗಳ ಪಟ್ಟಿಯಲ್ಲಿ ಇಸ್ರೋ ಸ್ಥಾನ ಪಡೆಯಲಿದೆ. ಅತ್ಯಾಧುನಿಕ ತಂತ್ರಜ್ಞಾನದಿಂದ ಕೂಡಿದ ಪರಮಾಣು ಗಡಿಯಾರವನ್ನು ಅಭಿವೃದ್ಧಿ ಪಡಿಸಲು ಇಸ್ರೋ ವಿಜ್ಞಾನಿಗಳು ಯಶಸ್ವಿಯಾಗಿದ್ದು, ಆಮದು ಮಾಡುವ ಗಡಿಯಾರದಷ್ಟೇ ನಿಖರವಾದ ದತ್ತಾಂಶಗಳನ್ನು ನೀಡಲಿದೆ.

ಈ ಹಿಂದೆ ಉಡ್ಡಯನ ಮಾಡಲಾಗಿದ್ದ ಕೆಲ ಉಪಗ್ರಹಗಳಿಗೆ ಜೋಡಿಸಲಾಗಿದ್ದ ಪರಮಾಣು ಗಡಿಯಾರಗಳಲ್ಲಿ ಸಮಸ್ಯೆ ಕಾಣಿಸಿಕೊಂಡ ಹಿನ್ನೆಲೆಯಲ್ಲಿ ಸ್ವದೇಶಿ ನಿರ್ಮಿತ ಗಡಿಯಾರವನ್ನು ಉಪಗ್ರಹಗಳೊಂದಿಗೆ ಕಳುಹಿಸಲು ಇಸ್ರೋ ಚಿಂತಿಸಿದೆ ಎಂದು ಮೂಲಗಳು ತಿಳಿಸಿವೆ.