ಪಾಕಿಸ್ತಾನದ ಉಗ್ರರ ಮೇಲೆ ಬಾಹ್ಯಾಕಾಶದಿಂದ ‘ಇಸ್ರೊ’ ಕಣ್ಣು

ಹೊಸದಿಲ್ಲಿ: ಬಾಹ್ಯಾಕಾಶದಿಂದಲೇ ಭೂಮಿಯ ಮೇಲ್ಮೈ ಮೇಲೆ ಮತ್ತಷ್ಟು ಹತ್ತಿರದಿಂದ ನಿಗಾ ಇರಿಸಬಲ್ಲ ಮತ್ತು ಮತ್ತಷ್ಟು ನಿಖರವಾದ ಚಿತ್ರಗಳನ್ನು ಸೆರೆಹಿಡಿದು ರವಾನಿಸಬಲ್ಲ ಮತ್ತೊಂದು ಅತ್ಯಾಧುನಿಕ 'ರೆಡಾರ್‌ ಇಮೇಜಿಂಗ್‌ ಸ್ಯಾಟಲೈಟ್‌' (ರಿಯಾಸ್ಯಾಟ್‌-2ಬಿಆರ್‌1) ಉಡಾವಣೆಗೆ ಇಸ್ರೊ ಸಜ್ಜಾಗಿದೆ.

ಮೇ 22ರಂದು ಆಂಧ್ರ ಪ್ರದೇಶದ ಶ್ರೀಹರಿಕೋಟದಿಂದ ಈ ಉಪಗ್ರಹವು ಉಡಾವಣೆಗೊಳ್ಳಲಿದೆ. ದಟ್ಟ ಮೋಡಗಳನ್ನೂ ಭೇದಿಸಿ, ಭೂಮಿಯ ಮೇಲಿನ ಕಟ್ಟಡಗಳು, ವಸ್ತುಗಳ ಚಿತ್ರಗಳನ್ನು ಸೆರೆ ಹಿಡಿಯಬಲ್ಲ ಈ ಉಪಗ್ರಹವು ಎಲ್ಲಾ ರೀತಿಯ ಹವಾಮಾನಗಳಲ್ಲೂ ನಿಗಾ ವಹಿಸುವ ಸಾಮರ್ಥ್ಯ‌ವನ್ನು ಹೊಂದಿದೆ.

ಇದರ ನೆರವಿನಿಂದ ಪಾಕ್‌ ಆಕ್ರಮಿತ ಕಾಶ್ಮೀರ ಭಾಗದಲ್ಲಿರುವ ಜಿಹಾದಿ ಉಗ್ರರ ಕ್ಯಾಂಪ್‌ಗಳ ಮೇಲೆ ನಿಗಾ ಇರಿಸಲು ಸಹ ಸಾಧ್ಯವಾಗಲಿದೆ. ಜತೆಗೆ ಅರೇಬಿಯನ್‌ ಸಮುದ್ರದಲ್ಲಿ ಪಾಕಿಸ್ತಾನ ಯುದ್ಧ ನೌಕೆಗಳು, ಹಿಂದೂ ಮಹಾಸಾಗರದಲ್ಲಿ ಚೀನಾದ ಯುದ್ಧ ನೌಕೆಗಳ ಚಲನವಲನಗಳ ಮೇಲೂ ಕಣ್ಣಿರಿಸಲು ಈ ಉಪಗ್ರಹ ರಕ್ಷಣಾ ಇಲಾಖೆಗೆ ಸಹಾಯಕವಾಗಲಿದೆ.