ಕಲ್ಕಿ ಭಗವಾನ್ ಬಳಿ 500 ಕೋಟಿ ಅಘೋಷಿತ ಆಸ್ತಿ!-ಐಟಿ ಬಹಿರಂಗಗೊಳಿಸಿದೆ ಸತ್ಯ

ಚಿತ್ತೂರು( ಆಂಧ್ರಪ್ರದೇಶ): ಸ್ವಘೋಷಿತ ದೇವಮಾನವ ಕಲ್ಕಿ ಭಗವಾನ್ ಬಳಿ ಅಘೋಷಿತ 500 ಕೋಟಿ ಆಸ್ತಿ ಹೊಂದಿರುವುದು ಐಟಿ ದಾಳಿಯಿಂದ ಬಹಿರಂಗಗೊಂಡಿದೆ. ಅಕ್ಟೋಬರ್ 16 ರಂದು ಆದಾಯ ತೆರಿಗೆ ಇಲಾಖೆ ಆಂಧ್ರಪ್ರದೇಶದ ಚಿತ್ತೂರಿನಲ್ಲಿರುವ ಕಲ್ಕಿ ಭಗವಾನ್ ಆಶ್ರಮ ಸೇರಿ ಹಲವೆಡೆ ದಾಳಿ ನಡೆಸಿತ್ತು. ಐಟಿ ಇಲಾಖೆ ನಡೆಸಿದ ತನಿಖೆಯಲ್ಲಿ ಹಲವಾರು ಆತಂಕಕಾರಿ ಮಾಹಿತಿ ಬಹಿರಂಗಗೊಂಡಿದೆ.

ತೆರಿಗೆ ವಂಚನೆ ಹಾಗೂ ಅಕ್ರಮ ಆಸ್ತಿ ಸಂಪಾದನೆ ಕುರಿತಾದ ಮಾಹಿತಿ ಹಿನ್ನಲೆಯಲ್ಲಿ ಐಟಿ ದಾಳಿ ನಡೆಸಿತ್ತು. ಚಿತ್ತೂರಿನಲ್ಲಿರುವ ಕಲ್ಕಿ ಭಗವಾನ್ ಆಶ್ರಮ ಹಾಗೂ ಚೆನೈನಲ್ಲಿರುವ ಕಲ್ಕಿ ಪುತ್ರನ ಉದ್ಯಮಿ ಸ್ನೇಹಿತರ ನಿವಾಸಗಳು ಸೇರಿದಂತೆ ಒಟ್ಟು 40 ಕಡೆಗಳಲ್ಲಿ ಆಧಿಕಾರಿಗಳು ದಾಳಿ ನಡೆಸಿದ್ದರು. ದಾಳಿ ಸಂದರ್ಭದಲ್ಲಿ ಆಂಧ್ರ ಪ್ರದೇಶದ ಚಿತ್ತೂರಿನ ಕಲ್ಕಿ ಆಶ್ರಮದಲ್ಲಿ 409 ಕೋಟಿ ಲೆಕ್ಕವೇ ಇಲ್ಲದ ರಶೀದಿಗಳು ಪತ್ತೆಯಾಗಿವೆ.

ಆಶ್ರಮದಲ್ಲಿ 93 ಕೋಟಿ ಮೌಲ್ಯದ ಅಘೋಷಿತ ಆಸ್ತಿ ಪತ್ತೆಯಾಗಿದ್ದು, ನಗದು, 83 ಕೆಜೆ ಚಿನ್ನಾಭರಣ ಹಾಗೂ ವಜ್ರವನ್ನು ಅಧಿಕಾರಿಗಳು ವಶಕ್ಕೆ ಪಡೆದುಕೊಂಡಿದ್ದಾರೆ. ಇಷ್ಟೇ ಅಲ್ಲದೆ 2.5 ಮಿಲಿಯನ್ ಅಮೆರಿಕನ್ ಡಾಲರ್, 18 ಕೋಟಿ ಮೊತ್ತದ ವಿದೇಶಿ ಕರೆನ್ಸಿಯನ್ನು ವಶಕ್ಕೆ ಪಡೆದುಕೊಳ್ಳಲಾಗಿದೆ ಎಂದು ಐಟಿ ಮೂಲಗಳಿಂದ ತಿಳಿದುಬಂದಿದೆ.

ಕಲ್ಕಿ ಭಗವಾನ್ ವಿವಾದಿತ ಆಧ್ಯಾತ್ಮಿಕ ಗುರುವಾಗಿದ್ದು ಹಲವಾರು ಆರೋಪಗಳು ಇವರ ಮೇಲಿದೆ. 2008 ರಲ್ಲಿ ಚಿತ್ತೂರು ಆಶ್ರಮದಲ್ಲಿ ನಡೆದ ಕಾಲ್ತುಳಿತಕ್ಕೆ ಐದು ಮಂದಿ ಬಲಿಯಾಗಿ ಹಲವರು ಗಾಯಗೊಂಡಿದ್ದರು. ಆಶ್ರಮದಲ್ಲಿ ಕಲ್ಕಿ ಸಾಮಾನ್ಯ ದರ್ಶನಕ್ಕೆ 5000 ರೂಪಾಯಿ ಹಾಗೂ ವಿಶೇಷ ದರ್ಶನಕ್ಕೆ 25,000 ಹಣ ಪಾವತಿಸಬೇಕಿದೆ. ಅಷ್ಟೇ ಅಲ್ಲದೆ ಕಲ್ಕಿ ಭಗವಾನ್ ವಿರುದ್ಧ ಭೂ ಹಗರಣದ ಆರೋಪ ಕೂಡಾ ಇದೆ.