ಐಟಿಬಿಪಿ ಮುಖ್ಯಸ್ಥ ಎಸ್‌ಎಸ್‌ ದೆಸ್ವಾಲ್‌ಗೆ ಹೆಚ್ಚುವರಿಯಾಗಿ ಎನ್‌ಎಸ್‌ಜಿ ಹೊಣೆ!

ನವದೆಹಲಿ: ಮಹತ್ವದ ಬೆಳವಣಿಗೆಯೊಂದರಲ್ಲಿ ಇಂಡೋ-ಟಿಬೆಟಿಯನ್ ಬಾರ್ಡರ್ ಪೊಲೀಸ್(ಐಟಿಬಿಪಿ) ಮುಖ್ಯಸ್ಥ ಎಸ್‌ಎಸ್‌ ದೆಸ್ವಾಲ್ ಅವರಿಗೆ, ಹೆಚ್ಚುವರಿಯಾಗಿ ನ್ಯಾಶನಲ್ ಸೆಕ್ಯೂರಿಟಿ ಗಾರ್ಡ್(ಎನ್‌ಎಸ್‌ಜಿ) ಹೊಣೆ ಹೊರಿಸಲಾಗಿದೆ.

ಈ ಕುರಿತು ಮಾಹಿತಿ ನೀಡಿರುವ ಕೇಂದ್ರ ಗೃಹ ಸಚಿವಾಲಯ, ಎಸ್‌ಎಸ್‌ ದೆಸ್ವಾಲ್ ಅವರನ್ನು ಎನ್‌ಎಸ್‌ಜಿ ಡಿಜಿ ಆಗಿ ನೇಮಕ ಮಾಡಿ ಆದೇಸ ಹೊರಡಿಸಲಾಗಿದೆ ಎಂದು ಸ್ಪಷ್ಟಪಡಿಸಿದೆ.

ಇದೇ ಸೆ.30ರಂದು ಪ್ರಸ್ತುತ ಎನ್‌ಎಸ್‌ಜಿ ಮುಖ್ಯಸ್ಥ ಎಕೆ ಸಿಂಗ್ ನಿವೃತ್ತಿ ಹೊಂದಲಿದ್ದಾರೆ. ಈ ಹಿನ್ನೆಲೆಯಲ್ಲಿ ಎಸ್‌ಎಸ್‌ ದೆಸ್ವಾಲ್ ಅವರನ್ನು ಈ ಹುದ್ದೆಗೆ ನೇಮಕ ಮಾಡಲಾಗಿದೆ.

ಲಡಾಖ್ ಗಡಿಯಲ್ಲಿ 6 ದಿನ ಕಳೆದ ಐಟಿಬಿಪಿ ಮುಖ್ಯಸ್ಥ: ಕಾರ್ಯಾಚರಣೆ ಸಿದ್ಧತೆ ಪರಿಶೀಲನೆ!


ಮುಂದಿನ ಆದೇಶ ಬರುವವರೆಗೂ ಎನ್‌ಎಸ್‌ಜಿ ಡಿಜಿಯಾಗಿ ಎಸ್‌ಎಸ್‌ ದೆಸ್ವಾಲ್ ಕರ್ತವ್ಯ ನಿರ್ವಹಿಸಲಿದ್ದಾರೆ ಎಂದು ಕೇಂದ್ರ ಗೃಹ ಸಚಿವಾಲಯದ ಆದೇಶದಲ್ಲಿ ಸ್ಪಷ್ಟಪಡಿಸಲಾಗಿದೆ.

ಇನ್ನು 1984ರ ಬ್ಯಾಚ್‌ನ ಐಪಿಎಸ್ ಅಧಿಕಾರಿಯಾಗಿರುವ ಎಸ್‌ಎಸ್‌ ದೆಸ್ವಾಲ್, ಎರಡನೇ ಬಾರಿ ಎನ್‌ಎಸ್‌ಜಿಯ ಹೆಚ್ಚುವರಿ ಹೊಣೆಯನ್ನು ಸ್ವೀಕರಿಸುತ್ತಿರುವುದು ವಿಶೇಷ.

ದೇಶ ರಕ್ಷಣೆಗೆ ಸದಾ ಸಿದ್ಧ:ಚೀನಾಗೆ ಗಡಿ ಕಾಯಲು ನಮ್ಮ ಪಡೆ ಉತ್ಸುಕ ಎಂದ ಐಟಿಬಿಪಿ ಮುಖ್ಯಸ್ಥ!

ಕಳೆದ ವರ್ಷ ಆಗಿನ ಎನ್‌ಎಸ್‌ಜಿ ಮುಖ್ಯಸ್ಥ ಸುದೀಪ್ ಲಕ್ತಾಕಿಯಾ ನಿವೃತ್ತಿ ಬಳಿಕ, ಪ್ರಸ್ತುತ ಡಿಜಿ ಎಕೆ ಸಿಂಗ್ ನೇಮಕವಾಗುವವರೆಗೂ ಎಸ್‌ಎಸ್‌ ದೆಸ್ವಾಲ್ ಎನ್‌ಎಸ್‌ಜಿಯನ್ನು ಮುನ್ನಡೆಸಿದ್ದರು.

ಇಷ್ಟೇ ಅಲ್ಲದೇ ಎಸ್‌ಎಸ್‌ ದೆಸ್ವಾಲ್ ಈ ಹಿಂದೆ ಸಶಸ್ತ್ರ ಸೀಮಾ ಬಲ್, ಬಿಎಸ್‌ಎಫ್ ಮತ್ತು ಕೇಂದ್ರೀಯ ಸಶಸ್ತ್ರ ಮೀಸಲು ಪಡೆ(ಸಿಆರ್‌ಪಿಎಫ್) ಡಿಜಿಯಾಗಿಯೂ ಹೆಚ್ಚುವರಿ ಜವಾಬ್ದಾರಿಯನ್ನು ನಿರ್ವಹಿಸಿದ್ದರು.