ರಾಜಕೀಯಕ್ಕೆ ಗುಡ್ ಬೈ ಹೇಳಿದ ಜಯಲಲಿತಾ ಸೊಸೆ ದೀಪಾ ಜಯಕುಮಾರ್

ಚೆನ್ನೈ: ತಮಿಳುನಾಡಿನ ಮಾಜಿ ಮುಖ್ಯಮಂತ್ರಿ ಜೆ ಜಯಲಲಿತಾ ಸಾವಿನ ಬೆನ್ನಲ್ಲೇ 'ಎಂಜಿಆರ್‌ ಅಮ್ಮಾ ದೀಪಾ ಫೋರಂ' ಸ್ಥಾಪನೆಯೊಂದಿಗೆ ರಾಜಕೀಯಕ್ಕೆ ಕಾಲಿಟ್ಟ್ಟಿದ್ದ ಅವರ ಅಣ್ಣನ ಮಗಳು ದೀಪಾ ಜಯಕುಮಾರ್ ಬಂದಷ್ಟೇ ವೇಗದಲ್ಲಿ ರಾಜಕೀಯಕ್ಕೆ ಗುಡ್ ಬೈ ಹೇಳಿದ್ದಾರೆ.

ತಾವು ರಾಜಕೀಯ ತೊರೆಯುತ್ತಿರುವುದಾಗಿ ಮಂಗಳವಾರ ಘೋಷಿಸಿರುವ ಅವರು, ಸುದ್ದಿಗಾರರೊಂದಿಗೆ ಮಾತನಾಡುತ್ತ, ರಾಜಕೀಯದಲ್ಲಿ ತಮ್ಮ ಅನುಭವ "ನಿರಾಶಾದಾಯಕ" ಎಂದು ಹೇಳಿದ್ದು, ಮಹಿಳೆಯಾಗಿ ರಾಜಕಾರಣದಲ್ಲಿ ಉಳಿದುಕೊಳ್ಳುವುದು ತುಂಬಾ ಕಷ್ಟ ಎಂದರು.

ಮತ್ತೆ ರಾಜಕೀಯಕ್ಕೆ ಮರಳುವ ಪ್ರಶ್ನೆಯೇ ಇಲ್ಲ. ಯಾವುದೇ ವೃತ್ತಿಯಲ್ಲಿ ಮಹಿಳೆಯರಿಗೆ ಸ್ಥಳ ಮತ್ತು ಸ್ವಾತಂತ್ರ್ಯ ಬೇಕು. ಒಬ್ಬ ಮಹಿಳೆಯಾದ ನನ್ನನ್ನು ಮನಬಂದಂತೆ ನಿಂದಿಸಲಾಗಿದೆ. ಸಾಂಪ್ರದಾಯಿಕ ಕುಟುಂಬದ ಹಿನ್ನೆಲೆಯ ನಾನು ಇದನ್ನೆಲ್ಲ ಇನ್ನು ಹೆಚ್ಚು ದಿನ ಸಹಿಸಲು ಸಾಧ್ಯವಿಲ್ಲ,ಅವರು ತಮ್ಮ ಮಿತಿಯನ್ನು ದಾಟಿದ್ದಾರೆ, ಎಂದವರು ಹೇಳಿದ್ದಾರೆ.

ಅಸಭ್ಯವಾಗಿ ತಮ್ಮನ್ನು ಟ್ರೋಲ್ ಮಾಡುತ್ತಿರುವುದನ್ನು ಖಂಡಿಸಿರುವ ಅವರು ತಮ್ಮ ನಡೆಯನ್ನು ಸಮರ್ಥಿಸಿಕೊಂಡು ಸಾಮಾಜಿಕ ಜಾಲತಾಣದಲ್ಲಿ ಪೋಸ್ಟ್ ಪ್ರಕಟಿಸಿದ್ದಾರೆ. ಯಾವುದೇ ಅಧಿಕೃತ ಕಾರ್ಯಕ್ರಮ ನಡೆಯದಿದ್ದರೂ, ಮಾರ್ಚ್‌ನಲ್ಲಿ ಅವರು ತಮ್ಮ ''ಎಂಜಿಆರ್ ಅಮ್ಮ ದೀಪಾ ಫೋರಂ'', ನ್ನು ಎಐಎಡಿಎಂಕೆ ಜೊತೆ ವಿಲೀನಗೊಳಿಸಿದ್ದರು.

"ಅನಿವಾರ್ಯವಾಗಿ ನಾನು ರಾಜಕೀಯಕ್ಕೆ ಬಂದೆ. ಜೀವನದಲ್ಲಿ ಮಾಡಲೇಬೇಕಾದ ಇದಕ್ಕಿಂತ ಉತ್ತಮ ಕೆಲಸಗಳಿವೆ. ಜನರ ಸೇವೆಗೆ ನನ್ನನ್ನು ನಾನು ತೊಡಗಿಸಿಕೊಳ್ಳಬೇಕಂದಿದ್ದೆ. ಆದರೆ ಮುಕ್ತವಾಗಿ ಕೆಲಸ ಮಾಡಲಾಗಲಿಲ್ಲ. ರಾಜಕೀಯದಲ್ಲಿ ಕೆಲವರು ಅಡ್ಡ ದಾರಿಯನ್ನು ತುಳಿಯುತ್ತಾರೆ. ಆದರೆ ನನಗದು ಒಪ್ಪಿತವಲ್ಲ. ನನ್ನ ಸಂಘಟನೆ ಬೇರೆಯದೇ ದಾರಿಯತ್ತ ಸಾಗಿತು, ಹಲವು ನನಗೆ ದ್ರೋಹವೆಸಗಿದರು ಎಂದು ದೀಪಾ ಅಳಲು ತೋಡಿಕೊಂಡಿದ್ದಾರೆ.