ಜಗನ್‌ ಸಂಪುಟದಲ್ಲಿ ದಲಿತ ಮಹಿಳೆಗೆ ಗೃಹ ಖಾತೆ

ಅಮರಾವತಿ: ಆಂಧ್ರಪ್ರದೇಶದ ನೂತನ ಮುಖ್ಯಮಂತ್ರಿ ವೈ. ಎಸ್‌. ಜಗನ್‌ ಮೋಹನ್‌ ರೆಡ್ಡಿ ಅವರು ದಲಿತ ಮಹಿಳೆಯೊಬ್ಬರಿಗೆ ಗೃಹ ಸಚಿವರ ಸ್ಥಾನ ನೀಡುವ ಮೂಲಕ ಗಮನ ಸೆಳೆದಿದ್ದಾರೆ.

ಭಾರಿ ಬಹುಮತದೊಂದಿಗೆ ಚುನಾವಣೆಯಲ್ಲಿ ಜಯ ಹಾಗೂ ಐವರು ಉಪ ಮುಖ್ಯಮಂತ್ರಿಗಳ ನೇಮಕದೊಂದಿಗೆ ಸುದ್ದಿಯಾಗಿದ್ದ ಜಗನ್‌ ಈ ನಿಟ್ಟಿನಲ್ಲಿ ಈಗ ಮತ್ತೊಂದು ಹೆಜ್ಜೆ ಇರಿಸಿದ್ದಾರೆ.

ಗುಂಟೂರು ಜಿಲ್ಲೆಯ ಪ್ರತಿಪಾಡು ಕ್ಷೇತ್ರದ ಶಾಸಕಿ ಮೇಕತೋಟಿ ಸುಚರಿತಾ ಅವರು ಶನಿವಾರ ಅಮರಾವತಿಯಲ್ಲಿ ನಡೆದ ಅದ್ಧೂರಿ ಪ್ರಮಾಣವಚನ ಕಾರ್ಯಕ್ರಮದಲ್ಲಿ ಇತರೆ 24 ಸಂಪುಟ ಸಚಿವರೊಂದಿಗೆ ಅಧಿಕಾರ ಸ್ವೀಕರಿಸಿದರು.

2014ರಲ್ಲಿ ಆಂಧ್ರ ಪ್ರದೇಶ ತೆಲಂಗಾಣದಿಂದ ವಿಭಜನೆಯಾದ ಬಳಿಕ ರಾಜ್ಯದಲ್ಲಿ ಇದೇ ಮೊದಲ ಬಾರಿಗೆ ಮಹಿಳೆಯೊಬ್ಬರು ಗೃಹ ಸಚಿವರಾಗಿದ್ದಾರೆ. ಜಗನ್‌ ಅವರ ತಂದೆ ವೈ.ಎಸ್‌. ರಾಜಶೇಖರ್‌ ರೆಡ್ಡಿ ಅವರು ಸಬಿತಾ ಇಂದ್ರಾ ರೆಡ್ಡಿ ಅವರನ್ನು ರಾಜ್ಯದ ಮೊದಲ ಮಹಿಳಾ ಗೃಹ ಸಚಿವೆಯಾಗಿ ನೇಮಸಿ ಇತಿಹಾಸ ನಿರ್ಮಿಸಿದ್ದರು.