ಹೊಸದಿಲ್ಲಿ: ವಿಶ್ವ ಪ್ರಸಿದ್ಧ ತಾಜ್‌ ಮಹಲ್‌ ಒಂದು ಕಾಲದಲ್ಲಿ ಶಿವನ ದೇವಸ್ಥಾನವಾಗಿತ್ತು ಎಂದು ಹೇಳಿಕೆ ನೀಡಿ ವಿವಾದ ಸೃಷ್ಟಿಸಿದ್ದ ಬಿಜೆಪಿ ಸಂಸದ ವಿನಯ್‌ ಕಟಿಯಾರ್‌ ಇದೀಗ ಮತ್ತೊಮ್ಮೆ ಅಂತಹದ್ದೇ ಹೇಳಿಕೆ ನೀಡುವ ಮೂಲಕ ಗಮನ ಸೆಳೆದಿದ್ದಾರೆ.
ತಾಜ್‌ಮಹಲ್‌ ಹೇಗೆ 'ತೇಜೋ ಮಹಾಲಯ' ವಾಗಿತ್ತೋ, ಹಾಗೆಯೇ ದಿಲ್ಲಿಯ ಜಾಮಾ ಮಸೀದಿ ಕೂಡ ಹಿಂದೆ 'ಜಮುನಾ ದೇವಿ'ಯ ಮಂದಿರವಾಗಿತ್ತು ಎಂದು ಕಟಿಯಾರ್‌ ಗುರುವಾರ ಹೇಳಿದ್ದಾರೆ. ಬಾಬ್ರಿ ಮಸೀದಿ ಧ್ವಂಸ ಪ್ರಕರಣಕ್ಕೆ 25 ವರ್ಷ ಸಂದ ಮರುದಿನವೇ ಕಟಿಯಾರ್‌ ಅವರಿಂದ ಈ ವಿವಾದಿತ ಹೇಳಿಕೆ ಹೊರಬಿದ್ದಿದೆ. 17ನೇ ಶತಮಾನದ ಜಾಮ ಮಸೀದಿಯು ಶಹಜಹಾನ್‌ ಕಾಲದಲ್ಲಿ ನಿರ್ಮಾಣವಾಗಿತ್ತು.
''ಮೊಘಲರ ಆಡಳಿತಾವಧಿಯಲ್ಲಿ ದೇಶದ ಸುಮಾರು 6000 ಹಿಂದೂ ಧಾರ್ಮಿಕ ಕ್ಷೇತ್ರಗಳು ನಾಶಗೊಂಡಿವೆ. ದಿಲ್ಲಿಯ ಜಾಮಾ ಮಸೀದಿ ಕೂಡ ಮೊದಲು 'ಜಮುನಾ ದೇವಿ ದೇವಸ್ಥಾನ'ವಾಗಿತ್ತು. ಆದರೆ ಮೊಘಲ್‌ ದೊರೆಗಳು ಅದನ್ನು ಧ್ವಂಸಗೊಳಿಸಿ, ತಮಗೆ ಬೇಕಾದಂತೆ ಮಾರ್ಪಡಿಸಿ ಮಸೀದಿ ಮಾಡಿದರು,'' ಎಂದು ಕಟಿಯಾರ್‌ ಪ್ರತಿಪಾದಿಸಿದ್ದಾರೆ. ಅವರ ಹೇಳಿಕೆಗೆ ಕಾಂಗ್ರೆಸ್‌ ಆಕ್ಷೇಪ ವ್ಯಕ್ತಪಡಿಸಿದೆ.
ಈ ಮಧ್ಯೆ ರಾಮಜನ್ಮಭೂಮಿ-ಬಾಬ್ರಿ ಮಸೀದಿ ಪ್ರಕರಣಕ್ಕೆ ಸಂಬಂಧಿಸಿದಂತೆ ಸುನ್ನಿ ವಕ್ಫ್ ಬೋರ್ಡ್‌ ಪರ ಸುಪ್ರೀಂಕೋರ್ಟ್‌ನಲ್ಲಿ ವಾದ ಮಂಡಿಸಿದ ಹಿರಿಯ ವಕೀಲ ಕಪಿಲ್‌ ಸಿಬಲ್‌ ಅವರು ಕಾಂಗ್ರೆಸ್‌ ಏಜೆಂಟ್‌ನಂತೆ ವರ್ತಿಸಿದ್ದಾರೆ. ಅವರಿಗೆ ವಿವಾದ ಬೇಗ ಇತ್ಯರ್ಥವಾಗುವುದು ಬೇಡವಾಗಿದೆ ಎಂದು ಕಟಿಯಾರ್‌ ಕಿಡಿಕಾರಿದ್ದಾರೆ.