ಜೆಟ್‌ ಏರ್‌ವೇಸ್‌ ವಿಮಾನಗಳಿಗೆ ಸ್ಪೈಸ್‌ ಜೆಟ್‌ ಬಣ್ಣ, ಲೋಗೊ

ಮುಂಬೈ: ಆರ್ಥಿಕ ದಿವಾಳಿಯಾಗಿರುವ ಜೆಟ್‌ ಏರ್‌ವೇಸ್‌ ವಿಮಾನಯಾನ ಸಂಸ್ಥೆಗೆ ಸ್ಟೈಸ್‌ ಜೆಟ್‌ ನೆರವಿನ ಹಸ್ತ ಚಾಚಿರುವುದು ಈಗಾಗಲೇ ವರದಿಯಾಗಿದೆ.

ಈಗ ಜೆಟ್‌ ಏರ್‌ವೇಸ್‌ ವಿಮಾನಗಳ ಹಾರಾಟಕ್ಕೆ ಕೂಡ ಸ್ಪೈಸ್‌ ಜೆಟ್‌ ನೆರವು ನೀಡುತ್ತಿದೆ.

ಇದಕ್ಕಾಗಿ ಜೆಟ್‌ ಏರ್‌ವೇಸ್‌ ವಿಮಾನಗಳಿಗೆ ಸ್ಪೈಸ್‌ ಜೆಟ್‌ ವಿಮಾನದ ಬಣ್ಣವನ್ನೇ ಹಾಕಾಲಾಗುತ್ತಿದೆ.

ಜೆಟ್‌ ಏರ್‌ವೇಸ್‌ನ ಬೋಯಿಂಗ್‌ ಬಿ 737 ವಿಮಾನಕ್ಕೆ ಸ್ಪೈಸ್‌ ಜೆಟ್‌ನ ವಿಶಿಷ್ಟ ಕೆಂಪು ಗುರುತಿನ ಲೋಗೋವನ್ನು ಅಳವಡಿಸಲಾಗುತ್ತಿದೆ. ಜತೆಗೆ ಜೆಟ್‌ ಏರ್‌ವೇಸ್‌ನ ಹಳದಿ ಮತ್ತು ನೀಲಿ ಪಟ್ಟಿಯೂ ಇದರ ಜತೆಗೆ ಇರಲಿದೆ.

ಈಗಾಗಲೇ ಹಾರಾಟ ನಿಲ್ಲಿಸಿರುವ ಜೆಟ್‌ ಏರ್‌ವೇಸ್‌ನ ವಿಮಾನಗಳನ್ನು ಸ್ಪೈಸ್‌ ಜೆಟ್‌ ತನ್ನ ಸಂಚಾರಕ್ಕೆ ಬಳಸಿಕೊಳ್ಳಲು ಮುಂದಾಗಿದೆ.

ಎಲ್ಲವೂ ಅಂದುಕೊಂಡಂತೆ ನಡೆದರೆ ಮುಂದಿನ ವಾರದಿಂದ ಜೆಟ್‌ ಏರ್‌ವೇಸ್‌ ವಿಮಾನಗಳು ಆಗಸದಲ್ಲಿ ಕಾಣಸಿಗಬಹುದು. ಮುಂದಿನ ವಾರದಲ್ಲಿ ಹಾರಾಟ ನಡೆಸಲು ಎಲ್ಲ ಸಿದ್ಧತೆಗಳನ್ನು ಮಾಡಿಕೊಳ್ಳಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ವಿಮಾನ ಹಾರಾಟದ ಸ್ಥಗಿತದಿಂದ ಜೆಟ್‌ ಏರ್‌ವೇಸ್‌ನ ಸಾವಿರಾರು ಉದ್ಯೋಗಿಗಳು ಅತಂತ್ರರಾಗಿದ್ದಾರೆ.

ಈಗಾಗಲೇ 100ಕ್ಕೂ ಅಧಿಕ ಪೈಲಟ್‌ಗಳನ್ನು, 200ಕ್ಕೂ ಹೆಚ್ಚು ಕ್ಯಾಬಿನ್‌ ಸಿಬ್ಬಂದಿ, 200 ತಾಂತ್ರಿಕ ಸಿಬ್ಬಂದಿಗೆ ನೌಕರಿ ನೀಡಲಾಗುವುದು ಎಂದು ಸ್ಪೈಸ್‌ ಜೆಟ್‌ ಸಂಸ್ಥೆ ಮಾಹಿತಿ ನೀಡಿದೆ

ಒಟ್ಟು 1300 ಪೈಲಟ್‌ಗಳಿದ್ದು ಈಗಾಗಲೇ 400ಕ್ಕೂ ಹೆಚ್ಚು ಪೈಲಟ್‌ಗಳಿಗೆ ಬೇರೆ ಸಂಸ್ಥೆಗಳಲ್ಲಿ ಆಶ್ರಯ ದೊರೆತಿದೆ. ಹಲವಾರು ಎಂಜನಿಯರ್‌ಗಳು, ಇತರೆ ಸಿಬ್ಬಂದಿ ಈಗಾಗಲೇ ಕಂಪನಿಗೆ ಗುಡ್‌ ಬೈ ಹೇಳಿದ್ದಾರೆ.