ಯುವತಿಯರ ಜುಮಕಿ ಡ್ಯಾನ್ಸ್ ಮಾಡಿದೆ ಕಮಾಲ್

ಬೆಂಗಳೂರು: ಶೀಘ್ರದಲ್ಲಿಯೇ ಮೋಹನ್‌ಲಾಲ್ ನಟನೆಯ 'ವೆಳಿಪಂಡಿಡೇ ಪುಸ್ತಕಮ್' ರಿಲೀಸ್ ಆಗಲಿದೆ. ಈಗಾಗಲೇ ಈ ಚಿತ್ರದ 'ಎಂಟಮೆಡೇ ಜಿಮಿಕ್ಕಿ ಕಮ್ಮಲ್' (ನನ್ನ ಅಮ್ಮನ ಜುಮಕಿ) ಎಂಬ ಗೀತೆ ಬಿಡುಗಡೆಯಾಗಿದ್ದು, ಯೂ ಟ್ಯೂಬ್‌ನಲ್ಲಿ ಹವಾ ಎಬ್ಬಿಸುತ್ತಿದೆ. ಕೊಲವರಿ ಡಿ ರೀತಿಯದ್ದೇ ಟ್ರೆಂಡ್ ಹುಟ್ಟು ಹಾಕುತ್ತಿರುವ ಈ ಹಾಡನ್ನು ಈಗಾಗಲೇ 90 ಲಕ್ಷಕ್ಕೂ ಹೆಚ್ಚು ಮಂದಿ ವೀಕ್ಷಿಸಿದ್ದಾರೆ.

ಅದರಲಿ, ಈ ಚಿತ್ರದ ಪ್ರಮೋಷನ್‌ಗಾಗಿ ತಂಡ ಹೊಸ ಐಡಿಯಾವೊಂದನ್ನು ಹುಟ್ಟು ಹಾಕಿದ್ದು, ಅದೀಗ ಮತ್ತೊಂದು ರೀತಿಯ ಸದ್ದು ಮಾಡುತ್ತಿದೆ. ಸಾಮಾಜಿಕ ಜಾಲತಾಣದಲ್ಲಿ #JimikkiKammalChallenge ಎಂಬ ಹ್ಯಾಶ್‌ ಟ್ಯಾಗ್‌ನೊಂದಿಗೆ ಈ ಹಾಡಿಗೆ ವೀಕ್ಷಕರು ತಮ್ಮದೇ ಸಂಯೋಜನೆಯ ನೃತ್ಯವನ್ನು ಅಪ್‌ಲೋಡ್ ಮಾಡಲು ಸೂಚಿಸಲಾಗಿದೆ. ಇದಕ್ಕೆ ಸಿಕ್ಕಾಪಟ್ಟೆ ರೆಸ್ಪಾನ್ಸ್ ಸಿಕ್ಕಿದ್ದು, ಇಂಡಿಯನ್ ಸ್ಕೂಲ್ ಆಫ್ ಕಾಮರ್ಸ್ ಯುವತಿಯರು ಮಾಡಿರುವ ಡ್ಯಾನ್ಸ್ ಮತ್ತೊಂದು ದಾಖಲೆ ಬರೆಯುವುದು ಗ್ಯಾರಂಟಿ. ಆಗಸ್ಟ್ 30ರಂದು ಅಪ್‌ಲೋಡ್ ಮಾಡಿರುವ ಈ ವೀಡಿಯೋವನ್ನು ಈಗಾಗಲೇ 47 ಲಕ್ಷಕ್ಕೂ ಹೆಚ್ಚು ಮಂದಿ ವೀಕ್ಷಿಸಿದ್ದು, ಚಿತ್ರದ ಹಾಡು ಮತ್ತಷ್ಟು ಫೇಮಸ್ ಆಗಿದೆ.

ಚಿತ್ರ ತಂಡ ಹಾಕಿರುವ ಈ ಸವಾಲಿಗೆ ನಿರೀಕ್ಷೆಗಿಂತಲೂ ಅಭೂತಪೂರ್ವ ಪ್ರತಿಕ್ರಿಯೆ ಲಭ್ಯವಾಗುತ್ತಿದ್ದು, ಕಳೆದ ಒಂದು ವಾರದಿಂದ ಈ ಹ್ಯಾಶ್‌ಟ್ಯಾಗ್ ‌ಅಡಿಯಲ್ಲಿ ಸಾಕಷ್ಟು ವೀಡಿಯೋಗಳು ಅಪ್‌ಲೋಡ್ ಆಗಿವೆ. ಆದರೆ, ಮಲೆಯಾಳಿ ಮಹಿಳೆಯರು ಕೇರಳ ಸಾಂಪ್ರಾದಾಯಿಕ ಸೀರೆಯಲ್ಲಿ, ಜುಮಕಿ ಧರಿಸಿ ಮಾಡಿರುವ ನೃತ್ಯ ಮಾತ್ರ ಬಹಳ ವಿಶೇಷ ಎನಿಸುತ್ತಿದ್ದು, ವಿಪರೀತ ಶೇರ್ ಆಗುತ್ತಿದೆ. ಕೇವಲ ಯುವತಿಯರು ಮಾತ್ರವಲ್ಲ, ಗರ್ಭಿಣಿಯರು, ಮಧ್ಯ ವಯಸ್ಸಿನ ನಾರಿಯರಲ್ಲದೇ, ವೃದ್ಧೆಯರೂ ಈ ನೃತ್ಯದಲ್ಲಿ ಪಾಲ್ಗೊಂಡಿರುವುದು ಮತ್ತೊಂದು ವಿಶೇಷ.



ಗಲ್ಫ್ ದೇಶದ ಮಹಿಳೆಯರು ಕಪ್ಪು ಅಂಗಿ, ಬಿಳಿ ಪಂಚೆಯುಟ್ಟು , ಕಪ್ಪು ಕನ್ನಡಕದೊಂದಿಗೆ ಜಿಮಕಿ ಧರಿಸಿ ಈ ಹಾಡಿಗೆ ಹಾಕಿರುವ ಹೆಜ್ಜೆಯೂ ಮನಮೋಹಕವಾಗಿದೆ.



ಆದರೆ, ಬಹುತೇಕ ಅಪ್‌ಲೋಡ್ ಮಾಡಿರುವ ವೀಡಿಯೋಗಳನ್ನು ಓಣಂನಂದು ಕೇರಳದಲ್ಲಿ ಚಿತ್ರಿಕರಿಸಿಲಾಗಿದೆ.