ಹೆತ್ತವರ ಮನವಿಗೆ ಸ್ಪಂದಿಸಿ ಬದಲಾದ ಉಗ್ರ

ಶ್ರೀನಗರ: ಹೆತ್ತವರು ಮಾಡಿದ ಕರಳು ಕರಗುವ ಮನವಿಗೆ ಸ್ಪಂದಿಸಿದ ಜಮ್ಮು-ಕಾಶ್ಮೀರದ ಉಗ್ರನೊಬ್ಬ ದಿಢೀರನೆ ಬದಲಾಗಿ ಸಭ್ಯ ಜೀವನಕ್ಕೆ ಹಿಂದಿರುಗಿದ್ದಾನೆ. ಇಥೆಶಮ್‌ ಬಿಲಾಲ್‌ ಬದಲಾದ ಉಗ್ರ. ನೋಯ್ಡಾ ಮೂಲದ ಕಾಲೇಜೊಂದರಲ್ಲಿ ಎಂಜಿನಿಯರಿಂಗ್‌ ಪದವಿ ವ್ಯಾಸಂಗ ಮಾಡುತ್ತಿದ್ದ ಈತ ಇತ್ತೀಚೆಗೆ ನಿಷೇಧಿತ ಇಸ್ಲಾಮಿಕ್‌ ಸ್ಟೇಟ್‌ ಆಫ್‌ ಜಮ್ಮು-ಕಾಶ್ಮೀರ (ಐಎಸ್‌ಜೆಕೆ) ಉಗ್ರ ಸಂಘಟನೆ ಸೇರಿ ಸುದ್ದಿ ಮಾಡಿದ್ದ. 20 ವರ್ಷದ ಈತ ತಲೆಗೆ ಕಪ್ಪು ಬಟ್ಟೆ ಕಟ್ಟಿಕೊಂಡು, ಮದ್ದುಗುಂಡು ತುಂಬಿದ ಬೆಲ್ಟ್‌ ಧರಿಸಿ, ಕೈಯಲ್ಲಿ ಉಗ್ರ ಸಂಘಟನೆಯ ಧ್ವಜ ಹಿಡಿದಿದ್ದ ತನ್ನ ಫೋಟೊವನ್ನು ಸಾಮಾಜಿಕ ಜಾಲತಾಣದಲ್ಲಿ ಪೋಸ್ಟ್‌ ಮಾಡಿ ಹೆತ್ತವರಲ್ಲಿ ದಿಗಿಲು ಸೃಷ್ಟಿಸಿದ್ದ. ಇದಾಗಿ ಆತನ ಮನ ಪರಿವರ್ತನೆಗೆ ಪೋಷಕರು ಮನವಿ ಮಾಡಿದ್ದರು. ಪೊಲೀಸರೂ ಕಸರತ್ತು ನಡೆಸಿದ್ದರು. ಅಂತಿಮವಾಗಿ ಅವರ ಮನವಿಗೆ ಬಿಲಾಲ್‌ ಸ್ಪಂದಿಸಿದ್ದು, ಭಾನುವಾರ ಸಂಜೆ ಮನೆಗೆ ವಾಪಸಾಗಿದ್ದಾನೆ ಎಂದು ಪೊಲೀಸರು ತಿಳಿಸಿದ್ದಾರೆ.