ಬಹುರಾಷ್ಟ್ರ ಸಮರಾಭ್ಯಾಸ: ಭಾರತ, ಪಾಕ್‌ ಭಾಗಿ

ಹೊಸದಿಲ್ಲಿ: ಬದ್ಧ ವೈರಿ ರಾಷ್ಟ್ರಗಳೆಂದೇ ಜಗತ್ತಿನಲ್ಲಿ ಗುರುತಿಸಲಾಗಿರುವ ಭಾರತ ಮತ್ತು ಪಾಕಿಸ್ತಾನಗಳು ಇತಿಹಾಸದಲ್ಲೇ ಮೊದಲ ಬಾರಿಗೆ ಬಹುರಾಷ್ಟ್ರ ಸಮರಾಭ್ಯಾಸದಲ್ಲಿ ಜತೆಯಾಗಿ ಪಾಲ್ಗೊಳ್ಳುವ ಮೂಲಕ ಹೊಸ ಚರಿತ್ರೆಯೊಂದು ನಿರ್ಮಾಣಗೊಳ್ಳಲಿದೆ.

ರಷ್ಯಾದಲ್ಲಿ ಸೆಪ್ಟೆಂಬರ್‌ನಲ್ಲಿ ನಡೆಯಲಿರುವ ಭಯೋತ್ಪಾದನಾ ವಿರೋಧಿ ಬಹುರಾಷ್ಟ್ರ ಸಮರಾಭ್ಯಾಸದಲ್ಲಿ ಭಾರತ ಹಾಗೂ ಪಾಕಿಸ್ತಾನಗಳು ಪಾಲ್ಗೊಳ್ಳಲಿರುವುದು ವಿಶೇಷ.

2001ರಲ್ಲಿ ಸ್ಥಾಪನೆಗೊಂಡಿರುವ ಶಾಂಘೈ ಸಹಕಾರ ಸಂಘಟನೆ (ಎಸ್‌ಸಿಒ) ರಷ್ಯಾದ ಉರಾಲ್‌ ಪರ್ವತ ಶ್ರೇಣಿಗಳಲ್ಲಿ ಈ ಸಮರಾಭ್ಯಾಸವನ್ನು ಆಯೋಜಿಸಿದ್ದು ರಷ್ಯಾ, ಚೀನಾ, ಭಾರತ, ಪಾಕಿಸ್ತಾನ, ಕಿರ್ಗಿಜ್‌ಸ್ತಾನ್‌, ಕಜಕ್‌ಸ್ತಾನ್‌, ತಜಿಕಿಸ್ತಾನ್‌ ಮತ್ತು ಉಜ್ಬೇಕಿಸ್ತಾನಗಳು ಇದರಲ್ಲಿ ಭಾಗವಹಿಸಲಿದೆ. ಚೀನಾವು ಎಸ್‌ಸಿಒ ಸಂಘಟನೆಯನ್ನು ಅಮೆರಿಕ ನೇತೃತ್ವದ ನೇಟೋ ಪ್ರತಿಸ್ಪರ್ಧಿಯಾಗಿ ರೂಪಿಸಿದೆ.

ಶಾಂತಿ ಸಹಕಾರವೇ ಗುರಿ: ಪ್ರದೇಶದಲ್ಲಿ ಶಾಂತಿ ನಿರ್ಮಾಣ ಈ ಸಮರಾಭ್ಯಾಸದ ಪ್ರಧಾನ ಗುರಿಯಾಗಿದ್ದು, ಎಂಟು ಸದಸ್ಯ ರಾಷ್ಟ್ರಗಳ ನಡುವೆ ಭಯೋತ್ಪಾದನೆ ವಿರೋಧಿ ಹೋರಾಟಕ್ಕೆ ಸಹಕಾರ ಕ್ರೋಢೀಕರಣದ ಉದ್ದೇಶ ಹೊಂದಿದೆ. ಕಳೆದ ವಾರ ಬೀಜಿಂಗ್‌ನಲ್ಲಿ ನಡೆದ ಎಸ್‌ಸಿಒ ರಕ್ಷಣಾ ಸಚಿವರ ಸಮಾವೇಶದಲ್ಲಿ ರಕ್ಷಣಾ ಸಚಿವೆ ನಿರ್ಮಲಾ ಸೀತಾರಾಮನ್‌ ಅವರು ಸಮರಾಭ್ಯಾಸದಲ್ಲಿ ಭಾರತದ ಪಾಲುದಾರಿಕೆಯನ್ನು ಖಚಿತಪಡಿಸಿದ್ದಾರೆ.

ಮೊದಲ ಸಮರಾಭ್ಯಾಸ

ಭಾರತ ಮತ್ತು ಪಾಕಿಸ್ತಾನದ ಸೇನೆಗಳು ವಿಶ್ವ ಸಂಸ್ಥೆಯ ಶಾಂತಿಪಾಲನಾ ಪಡೆಯಲ್ಲಿ ಜತೆಯಾಗಿ ಕಾರ್ಯ ನಿರ್ವಹಿಸಿದ್ದು ಬಿಟ್ಟರೆ ಇತಿಹಾಸದಲ್ಲಿ ಹಿಂದೆಂದೂ ಸಮರಾಭ್ಯಾಸದಲ್ಲಿ ಭಾಗವಹಿಸಿರಲಿಲ್ಲ. ಇಲ್ಲಿ ಕೂಡಾ ನೇರ ಜಂಟಿ ಸಮರಾಭ್ಯಾಸ ನಡೆಯಲಿದೆಯೇ ಅಥವಾ ಎಲ್ಲ ರಾಷ್ಟ್ರಗಳು ಜತೆಗೂಡಿ ನಡೆಯುವುದೇ ಎನ್ನುವುದು ಸ್ಪಷ್ಟವಾಗಿಲ್ಲ.

ಚೀನಾದ ಜತೆಗೆ ಜಂಟಿ ಅಭ್ಯಾಸ

ಭಾರತ ಸಾಮಾನ್ಯವಾಗಿ ಚೀನಾದ ಜತೆ ಜಂಟಿ ಸಮರಾಭ್ಯಾಸ ನಡೆಸುತ್ತದೆ. ಈ ವರ್ಷ ಸೆಪ್ಟೆಂಬರ್‌ನಲ್ಲಿ ನಡೆಯುವ ಸಾಧ್ಯತೆ ಇದೆ. ಕಳೆದ ವರ್ಷ ಢೋಕ್ಲಾಮ್‌ ಬಿಕ್ಕಟ್ಟಿನ ಉದ್ವಿಗ್ನತೆ ಇದ್ದ ಕಾರಣ ಸಮರಾಭ್ಯಾಸ ನಡೆದಿರಲಿಲ್ಲ.