ಆಸ್ತಿ ಬಹಿರಂಗಕ್ಕೆ ಸುಪ್ರೀಂಕೋರ್ಟ್ ಜಜ್‌ಗಳ ಹಿಂದೇಟು

ಹೊಸದಿಲ್ಲಿ: ಸುಪ್ರೀಂ ಕೋರ್ಟ್‌ನ 23 ಹಾಲಿ ನ್ಯಾಯಮೂರ್ತಿಗಳ ಪೈಕಿ 12 ನ್ಯಾಯಮೂರ್ತಿಗಳು ಮಾತ್ರ ಕೋರ್ಟ್‌ನ ವೆಬ್‌ಸೈಟ್‌ನಲ್ಲಿ ತಮ್ಮ ಆಸ್ತಿ ವಿವರ ಬಹಿರಂಗಪಡಿಸಿರುವುದು ಬೆಳಕಿಗೆ ಬಂದಿದೆ. ಮುಖ್ಯ ನ್ಯಾಯಮೂರ್ತಿ ದೀಪಕ್‌ ಮಿಶ್ರಾ, ನ್ಯಾಯಮೂರ್ತಿಗಳಾದ ರಂಜನ್‌ ಗಗೋಯಿ, ಎಂ.ಬಿ.ಲೋಕುರ್‌, ಕುರಿಯನ್‌ ಜೋಸೆಫ್‌, ಎ.ಕೆ.ಸಿಕ್ರಿ ಆಸ್ತಿ ವಿವರ ಪ್ರಕಟಿಸಿದ ಪ್ರಮುಖ ಹಿರಿಯ ನ್ಯಾಯಮೂರ್ತಿಗಳು. ಜಸ್ಟೀಸ್‌ ಇಂದೂ ಮಲ್ಹೋತ್ರ, ಆರ್‌.ಎಫ್‌.ನಾರಿಮನ್‌, ಎ.ಎಂ.ಸಪ್ರೆ, ಯು.ಯು.ಲಲಿತ್‌, ಡಿ.ವೈ.ಚಂದ್ರಚೂಡ್‌, ಎಲ್‌.ನಾಗೇಶ್ವರ ರಾವ್‌ ಸೇರಿದಂತೆ 12 ನ್ಯಾಯಮೂರ್ತಿಗಳು ಆಸ್ತಿ ವಿವರ ಪ್ರಕಟಿಸಿಲ್ಲ.

ಸಿಜೆಐ ಮಿಶ್ರಾ ಅವರು ಕೊನೆಯ ಬಾರಿಗೆ ವೆಬ್‌ಸೈಟ್‌ನಲ್ಲಿ ತಮ್ಮ ಆಸ್ತಿ ವಿವರ ಪ್ರಕಟಿಸಿದ್ದು 2012ರ ಮೇ 1ರಂದು. ಪಶ್ಚಿಮ ದಿಲ್ಲಿಯ ಸುಪ್ರೀಂ ಎನ್‌ಕ್ಲೇವ್‌ನಲ್ಲಿ ಫ್ಲ್ಯಾಟ್‌, ಕಟಕ್‌ನಲ್ಲಿ ಒಂದು ಮನೆ, 2 ಚಿನ್ನದ ಉಂಗುರ, ಒಂದು ಸರ, 7.4 ಲಕ್ಷ ರೂ. ನಿಶ್ಚಿತ ಠೇವಣಿ ಹಾಗೂ ವಿವಿಧ ಬ್ಯಾಂಕ್‌ಗಳಿಂದ ಪಡೆದ 33 ಲಕ್ಷ ರೂ. ಸಾಲ ಹೊಂದಿರುವುದಾಗಿ ಅವರು ಘೋಷಿಸಿಕೊಂಡಿದ್ದಾರೆ. ಇನ್ನು ಸೇವಾ ಹಿರಿತನದಲ್ಲಿ ಸಿಜೆಐ ನಂತರದ ಸ್ಥಾನದಲ್ಲಿರುವ ನ್ಯಾ. ರಂಜನ್‌ ಗಗೋಯಿ ಅವರು ಜೂನ್‌ 6ರಂದು ಕೊನೆಯದಾಗಿ ತಮ್ಮ ಆಸ್ತಿ ವಿವರ ಅಪ್‌ಡೇಟ್‌ ಮಾಡಿದ್ದಾರೆ. ಅವರು ಗುವಾಹಟಿಯಲ್ಲಿ ಜಮೀನು ಮಾರಾಟದಿಂದ ಬಂದ 65 ಲಕ್ಷ ರೂ. ಹೊಂದಿರುವುದಾಗಿ ಹೇಳಿಕೊಂಡಿದ್ದಾರೆ.