ಆತಂಕ ಬೇಡ, ಪ್ಯಾನ್‌-ಆಧಾರ್‌ ಲಿಂಕ್‌ಗೆ ಜು. 1 ಡೆಡ್‌ಲೈನ್‌ ಅಲ್ಲ

ಹೊಸದಿಲ್ಲಿ: ಜುಲೈ 1ರೊಳಗೆ ಪ್ಯಾನ್‌ ನಂಬರ್‌ಗೆ ಆಧಾರ್‌ ಕಾರ್ಡ್‌ ನಂಬರ್‌ ಲಿಂಕ್‌ ಮಾಡಬೇಕು ಎಂಬ ಆದೇಶದ ಹಿನ್ನೆಲೆಯಲ್ಲಿ ಗುರುವಾರ ದೇಶಾದ್ಯಂತ ಭಾರಿ ಒತ್ತಡದ ಚಟುವಟಿಕೆಗಳು ಕಂಡುಬಂದವು. ಜನರ ಒತ್ತಡವನ್ನು ತಾಳಿಗೊಳ್ಳಲಾಗದೆ ಆದಾಯ ತೆರಿಗೆ ಇಲಾಖೆಯ ವೆಬ್‌ಸೈಟ್‌ ಆಗಾಗ ಸ್ಥಗಿತಗೊಂಡಿತು. ಜನರು ಆಧಾರ್‌ ಲಿಂಕ್‌ ಮಾಡಲಾಗದೆ ಹತಾಶರಾದರು.

ಹೆಚ್ಚಿನವರು ಜುಲೈ 1ರೊಳಗೆ ಆಧಾರ್‌ ಲಿಂಕ್‌ ಮಾಡದಿದ್ದರೆ, ತಮ್ಮ ಪ್ಯಾನ್‌ ಕಾರ್ಡ್‌ ಅನರ್ಹಗೊಳ್ಳುತ್ತದೆ ಎಂಬ ಭೀತಿಯಲ್ಲಿದ್ದಾರೆ. ಆದರೆ, ಇದು ನಿಜವಲ್ಲ.

ಆದಾಯ ತೆರಿಗೆ ಇಲಾಖೆ ಸೂಚನೆ ಪ್ರಕಾರ, ಜುಲೈ 1ರಿಂದ ಪ್ಯಾನ್‌ ಕಾರ್ಡ್‌ಗೆ ಆಧಾರ್‌ ಲಿಂಕ್‌ ಮಾಡುವುದು ಕಡ್ಡಾಯ. ಹಾಗಂತ, ಜುಲೈ 1ರೊಳಗೆ ಲಿಂಕ್‌ ಮಾಡಲೇಬೇಕು ಎನ್ನುವುದು ಕಡ್ಡಾಯವಲ್ಲ.

ಒಂದೊಮ್ಮೆ ಜುಲೈ 1ರೊಳಗೆ ಲಿಂಕ್‌ ಮಾಡಲು ಸಧ್ಯವಾಗದೆ ಇದ್ದರೆ ಯಾವ ಕಾರಣಕ್ಕೂ ಪ್ಯಾನ್‌ ಕಾರ್ಡ್‌ ಅನರ್ಹಗೊಳ್ಳುವುದಿಲ್ಲ. ಆದರೆ, ಜುಲೈ 1ರ ಬಳಿಕ ಪ್ಯಾನ್‌ ಮತ್ತು ಆಧಾರ್‌ ಲಿಂಕ್‌ ಮಾಡುವುದು ಕಡ್ಡಾಯವಾಗುತ್ತದೆ. ಬಹುಶಃ ಮುಂದೆ ಯಾವುದಾದರೂ ದಿನವನ್ನು ಡೆಡ್‌ ಲೈನ್‌ ಆಗಿ ಸರಕಾರ ನಿಗದಿಪಡಿಸಲೂ ಬಹುದು. ಸರಕಾರ ಇನ್ನೂ ಆ ದಿನವನ್ನು ನಿರ್ಧರಿಸಿಲ್ಲ.

ಆದಾಯ ತೆರಿಗೆ ಕಾಯಿದೆಯ 139ಎಎ ಸೆಕ್ಷನ್‌ ಪ್ರಕಾರ, 2017ರ ಜುಲೈ 1ಕ್ಕೆ ಮೊದಲು ಪ್ಯಾನ್‌ ನಂಬರ್‌ ಪಡೆದ ವ್ಯಕ್ತಿ, ತಾನು ಆಧಾರ್‌ ನಂಬರನ್ನೂ ಹೊಂದಿದ್ದರೆ ಅವೆರಡನ್ನು ಕೇಂದ್ರ ಸರಕಾರ ನಿಗದಿಮಾಡುವ ಅಂತಿಮ ದಿನಾಂಕದ ಒಳಗೆ ಲಿಂಕ್‌ ಮಾಡಬೇಕು. ಒಂದೊಮ್ಮೆ ನಿಗದಿತ ದಿನಾಂಕದೊಳಗೆ ಲಿಂಕ್‌ ಮಾಡದೆ ಇದ್ದರೆ, ಅವರು ಪ್ಯಾನ್‌ ನಂಬರ್‌ ಹೊಂದಿಲ್ಲ ಎಂಬಂತೆ ಪರಿಗಣಿಸಲಾಗುವುದು.

ಇದರಲ್ಲಿ ಕೇಂದ್ರ ಸರಕಾರ ನಿಗದಿಪಡಿಸುವ ದಿನದಂದು ಇಲ್ಲವೇ ಅದರೊಳಗೆ ಎನ್ನುವುದನ್ನು ಸೂಚನೆಯಲ್ಲಿ ಸ್ಪಷ್ಟಪಡಿಸಲಾಗಿದೆ.

ಜುಲೈ 1ರಿಂದ ಹೊಸ ಪ್ಯಾನ್‌ ಕಾರ್ಡ್‌ ಮಾಡಿಸುವವರು ಅರ್ಜಿಯಲ್ಲಿ ಆಧಾರ್‌ ಕಾರ್ಡ್‌ ನಂಬರನ್ನೂ ನಮೂದಿಸಬೇಕಾಗುತ್ತದೆ. ಜತೆಗೆ ಜುಲೈ 31ರೊಳಗೆ ಇನ್‌ಕಂ ಟ್ಯಾಕ್ಸ್‌ ರಿಟರ್ನ್ಸ್‌ ಸಲ್ಲಿಸುವವರು ಅದಕ್ಕಿಂತ ಮೊದಲು ಆಧಾರ್‌ ಮತ್ತು ಪ್ಯಾನ್‌ ಲಿಂಕ್‌ ಮಾಡಲೇಬೇಕು.

ಲಿಂಕ್‌ ಮಾಡುವ ಸರಳ ವಿಧಾನ

ವೆಬ್‌ ಸೈಟ್‌ ಮೂಲಕ

https://incometaxindiaefiling.gov.in/e-Filing/Services/LinkAadhaarHome.html ಎಂಬ ಇನ್‌ಕಂ ಟ್ಯಾಕ್ಸ್‌ ವೆಬ್‌ಸೈಟಿಗೆ ಹೋಗಿ ಅಲ್ಲಿ ಆಧಾರ್‌-ಪ್ಯಾನ್‌ ಲಿಂಕ್‌ ಎಂಬ ಲಿಂಕ್‌ ಕ್ಲಿಕ್‌ ಮಾಡಬೇಕು.

ಆಗ ತೆರೆದುಕೊಳ್ಳುವ ಕಿಟಕಿ(ವಿಂಡೋ)ಯಲ್ಲಿ ನಮೂದಿಸಿದ ಬಾಕ್ಸ್‌ಗಳಲ್ಲಿ ಪ್ಯಾನ್‌ ನಂಬರ್‌, ಆಧಾರ್‌ ನಂಬರ್‌, ಆಧಾರ್‌ ಕಾರ್ಡ್‌ನಲ್ಲಿರುವ ಹೆಸರು ಮತ್ತು ಅಲ್ಲಿ ಮೂಡುವ ಕ್ಯಾಪಿಟಲ್‌ ಕ್ಯಾರೆಕ್ಟರ್‌ಗಳನ್ನು ನಮೂದಿಸಿದರೆ ಆಯಿತು.

ಎಸ್‌ಎಂಎಸ್‌ ಮೂಲಕ

UIDPAN<SPACE><12 digit Aadhaar><Space><10 digit PAN>

ಟೈಪ್‌ ಮಾಡಿ 567678/56161ಗೆ ಮೆಸೇಜ್‌ ಮಾಡಿದರೆ ಆಯಿತು.