ಸೆಲ್ಫೀ ತೆಗೆದುಕೊಳ್ಳಲು ಹೋದವನಿಗೆ ಥಳಿಸಿದ ಆನೆ

ತಿರುವನಂತಪುರಂ: 'ಆನೆಯೊಟ್ಟಿಗೆ ನಾನೇ' ಎಂದು ಸಾಮಾಜಿಕ ಜಾಲತಾಣಗಳಲ್ಲಿ ಸ್ಟೇಟಸ್ ಅಪ್‌ಡೋಟ್ ಮಾಡುವ ಇರಾದೆಯಿಂದಲೋ ಏನೋ, ಸೆಲ್ಫೀ ತೆಗೆದುಕೊಳ್ಳಲು ಹೋದ ವ್ಯಕ್ತಿಗೆ ಆನೆ ಥಳಿಸಿದ್ದು, ಸೆಲ್ಫೀಯೂ ಸಾಕು, ಎಲ್ಲವೂ ಸಾಕು ಎನ್ನುವ ಹಾಗೆ ಮಾಡಿದೆ.

ಇಲ್ಲಿನ ಸಮೀಪದ ಕಿಲಿಮನೂರ್‌ನ ಮಲಯಮಾಡೊಮ್‌ನ ಉಮಾಮಹೇಶ್ವರ ಮಂದಿರದ ದೇವಸ್ವಂನ ಆನೆ ಮೆರವಣಿಗೆ ನಂತರ ವಿಶ್ರಾಂತಿ ಪಡೆಯುತ್ತಿತ್ತು. ಮಾವುತರೂ ಈ ಆನೆಯೊಂದಿಗೆ ವಿಶ್ರಮಿಸುತ್ತಿದ್ದರು. ಆಗಲೇ ನಮೋಮ್ ಮೂಲದ ಶ್ರೀಲಾಲ್ ಎಂಬುವವರು ಆನೆಗೆ ಬಾಳೆಹಣ್ಣನ್ನು ಕೊಟ್ಟು, ತಮ್ಮ ಮೊಬೈಲ್‌ನಲ್ಲಿ ಸೆಲ್ಫೀ ತೆಗೆದುಕೊಳ್ಳಲು ಮುಂದಾದರು. ಇದರಿಂದ ಇರಿಸುಮುರಿಸುಗೊಂಡ ಆನೆ ತನ್ನ ಸೊಂಡಿಲನಿಂದ ಶ್ರೀಲಾಲ್‌ನನ್ನು ನೂಕಿ, ಬೀಳಿಸಿದೆ.

ಕೂಗನ್ನು ಕೇಳಿಸಿಕೊಂಡ ದೇವಸ್ಥಾನದ ಆಡಳಿತ ಮಂಡಳಿಯ ಸದಸ್ಯರು ಗಾಯಗೊಂಡವನನ್ನು ಆಸ್ಪತ್ರೆಗೆ ದಾಖಲಿಸಿದೆ.

ತೊಡೆಯ ಭಾಗದಲ್ಲಿ ಶ್ರೀಲಾಲ್‌ಗೆ ಗಂಭೀರ ಗಾಯಗಳಾಗಿದ್ದು, ತಿರುವನಂತಪುರಮ್ ವೈದ್ಯಕೀಯ ಕಾಲೇಜಿನಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.