ಕಾಡಿನ ಬಾಲಕಿ 'ಮೋಗ್ಲಿ'ಗೆ ಹೊಸ ಮನೆ, ಹೆಸರು

ಬಹರೈಚ್: ಮನುಷ್ಯರ ಸಂಪರ್ಕ ಇಲ್ಲದೆ ಕೋತಿಗಳ ಜತೆ ಬೆಳೆದ 8 ವರ್ಷದ ಬಾಲಕಿಯನ್ನು ಲಖನೌನ ಮಕ್ಕಳ ಪಾಲನಾ ಸಂಸ್ಥೆ ದತ್ತು ಪಡೆದಿದೆ.

ನಿರ್ವಾಣ್‌ ಎಂಬ ಸಂಸ್ಥೆಯು ಬಾಲಕಿಯನ್ನು ದತ್ತು ಪಡೆದಿದ್ದು ಈ ಬಾಲಕಿಗೆ 'ಎಹ್ಸಾಸ್‌' ಎಂದು ನಾಮಕರಣ ಮಾಡಲಾಗಿದೆ 'ಮಗುವಿನ ಜಾತಿ, ಧರ್ಮ ಹಾಗೂ ಇತರ ಯಾವುದೇ ಮಾಹಿತಿ ಇಲ್ಲ, ಹೀಗಾಗಿ ನಾವು ಮಗುವಿಗೆ ಈ ಹೆಸರಿಟ್ಟಿದ್ದೇವೆ,' ಎಂದು ಸಂಸ್ಥೆಯ ಅಧ್ಯಕ್ಷ ಸುರೇಶ್‌ ಧಾಪೋಲ ಹೇಳಿದ್ದಾರೆ.

'ಮಗುವಿನ ಕುರಿತು ಈಗ ಏನೂ ಹೇಳಲು ಸಾಧ್ಯವಿಲ್ಲ, ಏಕೆಂದರೆ ಬಾಲಕಿ ಸಾಮಾನ್ಯ ಮನುಷ್ಯರು ಮಾತನಾಡುವ ರೀತಿಯಲ್ಲಿ ಸಂವಹನ ಸಾಧ್ಯವಿಲ್ಲ. ಆಕೆಗೆ ಮೊದಲು ಮನುಷ್ಯರಂತೆ ನಡೆಯಲು, ತಿನ್ನಲು, ವರ್ತಿಸಲು ತರಬೇತಿ ನೀಡಬೇಕಾಗುತ್ತದೆ ಎಂದು ಅವರು ಹೇಳಿದರು.

ಬಾಲಕಿಯ ಆರೋಗ್ಯ ವಿಚಾರಣೆಗೆ ಮಹಿಳಾ ಹಾಗೂ ಮಕ್ಕಳ ಕಲ್ಯಾಣ ಸಚಿವೆ ರೀಟಾ ಬಹುಗುಣ ಜೋಶಿ ಕೇಂದ್ರಕ್ಕೆ ಶನಿವಾರ ಭೇಟಿ ನೀಡಿದ್ದರು. ಬಾಲಕಿ ಕಾಡಿನಲ್ಲಿ ವಾಸವಿದ್ದ ಕಾರಣ ಆಕೆಗೆ ರೇಬಿಸ್‌ ಅಥವಾ ಬೇರೆ ಯಾವುದಾದರೂ ರೋಗಗಳಿವೆಯೇ ಎಂದು ಪರೀಕ್ಷಿಸಲು ವೈದ್ಯರೂ ಆಕೆಯ ರಕ್ತದ ಮಾದರಿಯನ್ನು ಸಂಗ್ರಹಿಸಿದ್ದಾರೆ.

8 ವರ್ಷ ಕೋತಿಗಳ ಜತೆ ವಾಸ

ಕತರ್ನಿಯಾಘಾಟ್‌ನಲ್ಲಿ ಕೋತಿಗಳ ಮಧ್ಯೆ ಇದ್ದ ಈ ಬಾಲಕಿಯನ್ನು ಶುಕ್ರವಾರ ರಕ್ಷಿಸಲಾಗಿತ್ತು. ಆಗ ಮಗು ಮನುಷ್ಯರನ್ನು ಕಂಡ ಕೂಡಲೇ ಬೆದರಿ ಕೋತಿಗಳಂತೆ ವರ್ತಿಸಿತು. ಬಹಳ ಸಾಹಸಟ್ಟು ಮಗುವನ್ನು ಕೋತಿಗಳ ಮಧ್ಯೆದಿಂದ ಕರೆ ತರಲಾಗಿತ್ತು, ಬಳಿಕ ಚಿಕಿತ್ಸೆಗೆ ಆಸ್ಪತ್ರೆಗೆ ದಾಖಲಿಸಲಾಗಿತ್ತು.