ಬಾಳೆಹಣ್ಣಿಗೆ ದುಬಾರಿ ಬೆಲೆ ವಿಧಿಸಿದ್ದ ಹೋಟೆಲ್‌ಗೆ 25 ಸಾವಿರ ರೂ. ದಂಡ

ಚಂಡೀಗಢ: ನಟ ರಾಹುಲ್‌ ಬೋಸ್‌ ಅವರು ಹೋಟೆಲ್‌ನಲ್ಲಿ ಖರೀದಿಸಿದ ಎರಡು ಬಾಳೆಹಣ್ಣಿಗೆ ಬರೋಬ್ಬರಿ 442.50 ರೂ. ಬಿಲ್‌ ಮಾಡಿದ್ದ ಚಂಡೀಗಢದ ಜೆಡಬ್ಲ್ಯೂ ಮ್ಯಾರಿಯಟ್‌ ಹೋಟೆಲ್‌ಗೆ ರಾಜ್ಯ ಕಂದಾಯ ಮತ್ತು ತೆರಿಗೆ ಇಲಾಖೆ 25,000 ರೂ. ದಂಡ ವಿಧಿಸಿದೆ. ವಿನಾಯಿತಿ ಇರುವ ಪದಾರ್ಥಕ್ಕೂ ತೆರಿಗೆ ವಸೂಲು ಮಾಡುವ ಸಿಜಿಎಸ್‌ಟಿ ಸೆಕ್ಷನ್‌ 11 ಉಲ್ಲಂಘಿಸಿದ ಆರೋಪವನ್ನು ಹೋಟೆಲ್‌ ವಿರುದ್ಧ ಹೊರಿಸಲಾಗಿದೆ. ಹೋಟೆಲ್‌ನಲ್ಲಿ ಎರಡು ಖರೀದಿಸಿದ ಬಾಳೆಹಣ್ಣಿಗೆ ದುಬಾರಿ ಬಿಲ್‌ ಮಾಡಿದ ಬಗ್ಗೆ ನಟ ರಾಹುಲ್‌ ಬೋಸ್‌ ಟ್ವಿಟರ್‌ನಲ್ಲಿ ಹಾಕಿದ ವಿಡಿಯೊ ವೈರಲ್‌ ಆಗಿತ್ತು. ಇದರ ಬೆನ್ನಲ್ಲೇ ಹಲವು ಟ್ವೀಟಿಗರು ಇಂಥದ್ದೇ ತಮ್ಮ ಅನುಭವಗಳನ್ನು ಹಂಚಿಕೊಂಡಿದ್ದರು. ಇದು ದೊಡ್ಡ ಆಂದೋಲನವಾಗಿ ಮಾರ್ಪಟ್ಟಿತ್ತು.