ಸೌಂದರ್ಯ ಸ್ಪರ್ಧೆಯಲ್ಲಿ ಮೊದಲ 3 ಸ್ಥಾನ ಬಾಚಿದ ಕರ್ನಾಲ್ ರೈತನ ಹಸುಗಳು

ಲೂಧಿಯಾನಾ: ಮಕ್ಕಳು, ಯುವತಿಯರು, ಯುವಕರು, ವಿವಾಹಿತರು- ಹೀಗೆ ಮನುಷ್ಯರಿಗೆ ಸಂಬಂಧಿಸಿದಂತೆ ಸೌಂದರ್ಯ ಸ್ಪರ್ಧೆ ಆಯೋಜಿತವಾಗುವುದು ನಿಮಗೆ ಗೊತ್ತೇ ಇದೆ. ಆದರೆ ಪಂಜಾಬ್‌ನ ಜಾಗರಣ್‌ನಲ್ಲಿ ಭಾನುವಾರ ಹಸುಗಳಿಗಾಗಿ ಸೌಂದರ್ಯ ಸ್ಪರ್ಧೆಯನ್ನು ಆಯೋಜಿಸಲಾಗಿತ್ತು. ಅದರಲ್ಲಿ ಹರಿಯಾಣಾದ ರೈತನ ಮೂರು ಹಸುಗಳು ಮೊದಲ ಮೂರು ಸ್ಥಾನಗಳನ್ನು ತಮ್ಮದಾಗಿಸಿಕೊಂಡಿವೆ.

ಪ್ರಗತಿಪರ ಡೈರಿ ರೈತರ ಸಂಘದಿಂದ ಆಯೋಜಿತವಾಗಿದ್ದ ಹೈನುಗಾರಿಕೆ ಮತ್ತು ಕೃಷಿ ಮೇಳದಲ್ಲಿ ಹಸುಗಳಿಗಾಗಿ ಸೌಂದರ್ಯ ಸ್ಪರ್ಧೆಯನ್ನು ಇಟ್ಟುಕೊಳ್ಳಲಾಗಿತ್ತು. ಪಂಜಾಬ್ ಮತ್ತು ಹರಿಯಾಣಾದಿಂದ ಕರೆತರಲಾದ 45ಕ್ಕೂ ಹೆಚ್ಚು ಹಸುಗಳು ಈ ಸ್ಪರ್ಧೆಯಲ್ಲಿ ಪಾಲ್ಗೊಂಡಿದ್ದವು.

ಸ್ಪರ್ಧೆಯಲ್ಲಿ ವಿಜೇತವಾಗಿರುವ ಮೂರು ಹಸುವಿನ ಮಾಲೀಕ ಕರ್ನಾಲ್ ಜಿಲ್ಲೆಯ ನಿವಾಸಿ ಬಲ್ದೇವ್ ಸಿಂಗ್ ಎಂಬಾತನಾಗಿದ್ದಾನೆ. ಈ ಮೂರು ಹಸುಗಳು ಎಚ್ಎಫ್ (Holstein Friesian) ತಳಿಗೆ ಸೇರಿವೆ. ಕಳೆದ ವರ್ಷ ಕೂಡ ಇದರಲ್ಲೊಂದು ಹಸು ಸೌಂದರ್ಯ ಸ್ಪರ್ಧೆಯನ್ನು ಗೆದ್ದಿತ್ತು. ಮೊದಲ ಮೂರು ಸ್ಥಾನಗಳನ್ನು ನನ್ನದೇ ಹಸುಗಳು ಗೆದ್ದಿರುವುದು ನಿಜಕ್ಕೂ ದೊಡ್ಡ ಸಾಧನೆ. ಅವುಗಳಿಗೆ ನಾನು ಹೆಸರಿಟ್ಟಿಲ್ಲ. ಅದರಲ್ಲೊಂದು ಆಕಳು 5 ವರ್ಷ ಪ್ರಾಯದ್ದಾಗಿದ್ದು ದಿನಕ್ಕೆ ಸುಮಾರು 55 ಲೀಟರ್ ಹಾಲು ಕೊಡುತ್ತದೆ. ನಾವು ಹಸುಗಳ ಬಗ್ಗೆ ಬಹಳ ಕಾಳಜಿ ವಹಿಸುತ್ತೇವೆ. ಅವುಗಳನ್ನು ನೋಡಿಕೊಳ್ಳಲು ಆಳುಗಳನ್ನು ನೇಮಿಸಿದ್ದೇವೆ. ನನ್ನ ಬಳಿ 60 ಹಸುಗಳಿವೆ ಎಂದಾತ ಹೇಳಿದ್ದಾನೆ .

ಹಸುಗಳ ಸುತ್ತಲೂ ಆರೋಗ್ಯಕರ ವಾತಾವರಣವನ್ನು ಕಾಪಾಡಿಕೊಳ್ಳುವುದನ್ನು ಹೊರತುಪಡಿಸಿ, ಪ್ರತಿದಿನ ಶಾಂಪೂ ಬಳಸಿ ಅವುಗಳ ಮೈ ತೊಳೆಯಲಾಗುತ್ತದೆ. ಅವುಗಳ ರೋಮಗಳನ್ನು ಟ್ರಿಮ್ ಮಾಡಿಸಲಾಗುತ್ತದೆ. ಈ ವರ್ಷ ಮೊದಲ ಬಹುಮಾನ ಗೆದ್ದ ನಮ್ಮ ಹಸು ಕಳೆದ ವರ್ಷ 3 ನೇ ಬಹುಮಾನ ಗೆದ್ದಿತ್ತು. ಎಲ್ಲ ಸ್ಥಾನ ನಮಗೆ ಬಂದಿದ್ದು ನಮಗೆ ಬಹಳ ಸಂತೋಷ ತಂದಿದೆ, ಎಂದು ಹಸುವನ್ನು ನೋಡಿಕೊಳ್ಳುವ ಅನ್ಮೋಲ್ ಸಿಂಗ್ ಖುಷಿ ಪಡುತ್ತಾರೆ.

ಹಸುಗಳ ಸಂರಕ್ಷಣೆಗಾಗಿ ಜಾಗೃತಿಗಾಗಿ ಈ ಸ್ಪರ್ಧೆಯನ್ನು ಹಮ್ಮಿಕೊಳ್ಳಲಾಗುತ್ತದೆ. ಮೊದಲ ಬಹುಮಾನವಾಗಿ 50ಸಾವಿರ, ಎರಡನೆಯ ಬಹುಮಾನವಾಗಿ 40ಸಾವಿರ ಮತ್ತು ಮೂರನೆಯ ಬಹುಮಾನವಾಗಿ 30ಸಾವಿರ ನೀಡಲಾಗಿದೆ. ಅಮೆರಿಕಾ ಮತ್ತು ಕೆನಡಾದಿಂದ ತಲಾ ಇಬ್ಬರು ತೀರ್ಪಗಾರರು ಸ್ಪರ್ಧೆಯ ವಿಜೇತರನ್ನು ಆಯ್ಕೆ ಮಾಡಿದರು, ಎಂದು ಆಯೋಜಕರು ತಿಳಿಸಿದ್ದಾರೆ.