ಮಕ್ಕಳನ್ನು ಬಿಟ್ಟು, ಶಾಲಾ ಬ್ಯಾಗ್‌ ಹೊತ್ತೊಯ್ಯುವ ವಾಹನ!

ಕಣ್ಣೂರು: ವಿದ್ಯಾರ್ಥಿಗಳ ಬ್ಯಾಗ್ ಹೊರೆಯನ್ನು ಕಡಿಮೆ ಮಾಡಲು ಕೇರಳದ ಪ್ರಾಥಮಿಕ ಶಾಲೆಯೊಂದು ಹೊಸ ತಂತ್ರವನ್ನು ರೂಪಿಸಿಕೊಂಡಿದ್ದು, ಶಾಲಾ ವಾಹನದ ಮೂಲಕ ಮಕ್ಕಳ ಮನೆ ಬಾಗಿಲಿಗೆ ಬಂದು ಅವರ ಸ್ಕೂಲ್ ಬ್ಯಾಗನ್ನು ಪಿಕ್ ಮಾಡಿಕೊಂಡು ಶಾಲೆಗೆ ತಲುಪಿಸುವ ಯೋಜನೆಯಲ್ಲಿ ಸಕ್ಸಸ್‌ ಆಗಿದೆ.

ಕಟ್ಟಂಪಲ್ಲಿಯ ಜಿಎಂ ಉಪ್ಪೆರ್‌ ಪ್ರಾಥಮಿಕ ಶಾಲೆ ಈ ನೂತನ ಯೋಜನೆ ರೂಪಿಸಿದ್ದು ಮಕ್ಕಳ ಶಾಲಾ ಬ್ಯಾಗ್ ಹೊರೆಯನ್ನು ಕಡಿತಗೊಳಿಸುವ ಉದ್ದೇಶದಿಂದ ನಿಗದಿತ ಸ್ಥಳಗಳಲ್ಲಿ ವಿಶೇಷ ವಾಹನವೊಂದನ್ನು ಗೊತ್ತುಪಡಿಸಿ ಅಲ್ಲಿಂದ ಬ್ಯಾಗ್‌ನ್ನು ಶಾಲೆಗೆ ತಲುಪಿಸುವ ಯೋಜನೆ ಮಾಡಿದೆ. ಹೀಗಾಗಿ ಮಕ್ಕಳು ಆರಾಮವಾಗಿ ನಡೆದುಕೊಂಡು ಶಾಲೆಗೆ ಹೋಗುತ್ತಾರೆ.

ಒಟ್ಟು 300 ವಿದ್ಯಾರ್ಥಿಗಳಿಗೆ ಸ್ಕೂಲ್ ಬ್ಯಾಗ್ ಪಿಕ್ ಅಪ್ ಯೋಜನೆಯಿಂದ ಪ್ರಯೋಜನವಾಗುತ್ತಿದೆ. ಬ್ಯಾಗ್ ಹೊರುವ ಕಷ್ಟವಿಲ್ಲದೇ ಮಕ್ಕಳು ಕೂಡ ಖುಷಿಯಾಗಿದ್ದಾರೆ. ಹೆಚ್ಚು ಬಡ ವರ್ಗದವರೇ ಇರುವ ಈ ಸ್ಥಳದಲ್ಲಿ ಸದ್ಯ ಈ ಸೇವೆಯನ್ನು ಉಚಿತವಾಗಿ ನೀಡಲಾಗುತ್ತಿದೆ.

ಕಳೆದ ವರ್ಷದಿಂದಲೇ ಈ ಯೋಜನೆ ಜಾರಿಯಲ್ಲಿದ್ದು ಹಲವರು ಈ ಯೋಜನೆಯನ್ನು ಸದುಪಯೋಗಪಡಿಸಿಕೊಂಡಿದ್ದಾರೆ. ಹೀಗಾಗಿ ಮುಂದಿನ ದಿನಗಳಲ್ಲಿ ಖರ್ಚನ್ನು ಭರಿಸಲು ಪ್ರತಿ ವಿದ್ಯಾರ್ಥಿಯಿಂದ ತಿಂಗಳಿಗೆ 15-20 ರೂಪಾಯಿ ಪಡೆಯುವ ಕುರಿತು ಚಿಂತನೆ ನಡೆಸಲಾಗಿದೆ ಎನ್ನುತ್ತಾರೆ ಶಾಲಾ ಸಿಬ್ಬಂದಿ.