ಮಕ್ಕಳ ರಕ್ಷಣೆಗೆ ಹೊಸ ಪ್ಲಾನ್

ಗಾಜಿಯಾಬಾದ್: ಮಕ್ಕಳ ಅಪಹರಣಗಳ ತಡೆಗೆ ಪೋಷಕರು ಹೊಸ ದಾರಿ ಕಂಡು ಕೊಂಡಿದ್ದಾರೆ. ಅಷ್ಟು ಮಾತ್ರ ಅಲ್ಲ ಈ ಹೊಸ ಉಪಾಯದಿಂದ ಮಗುವೊಂದು ಅಪಹರಣಕಾರರಿಂದ ಬಚಾವಾಗಿದೆ.

ಇಂದಿರಾಪುರದ ಪಾರ್ಶ್ವನಾಥ್ ಮೆಜೆಸ್ಟಿಕ್‌ ಸೊಸೈಟಿಯ ಬಳಿ ನಿಂತಿದ್ದ ಸಣ್ಣ ಹುಡುಗಿಯನ್ನು ಅಪಹರಣ ಮಾಡಲು ಯುವಕನೋರ್ವ ಮುಂದಾಗಿದ್ದು, ಹುಡುಗಿಯ ಬಳಿ ತೆರಳಿ ತಂದೆಗೆ ಅಫಘಾತವಾಗಿದ್ದು, ಕೂಡಲೇ ತನ್ನ ಜತೆ ಬರುವಂತೆ ತಿಳಿಸಿದ್ದಾನೆ. ಒಂದು ಕ್ಷಣ ಆಲೋಚನೆ ಮಾಡಿದ ಹುಡುಗಿ, ಆತನಿಗೆ ತನ್ನ ತಂದೆಯ ಬಗ್ಗೆ ಪ್ರಶ್ನೆಗಳನ್ನು ಕೇಳಲು ಆರಂಭಿಸಿದ್ದಾಳೆ. ಅಷ್ಟು ಮಾತ್ರ ಅಲ್ಲ ತನ್ನ ತಂದೆಯ ವಿಶೇಷ ಕೋಡ್‌ ಏನು ಎಂದೂ ಪ್ರಶ್ನಿಸಿದ್ದಾಳೆ. ಇಷ್ಟು ಕೇಳಿದ ಅಪಹರಣಕಾರ ಕಕ್ಕಾಬಿಕ್ಕಿಯಾಗಿ ಪರಾರಿಯಾಗಿದ್ದಾನೆ.

ಹೆಚ್ಚುತ್ತಿರುವ ಮಕ್ಕಳ ಅಪಹರಣ ಪ್ರಕರಣಗಳಿಂದ ಪಾರಾಗಲು ಪೋಷಕರು ಮಕ್ಕಳೊಂದಿಗೆ ಸೀಕ್ರೆಟ್‌ ಕೋಡ್‌ ಹಂಚಿಕೊಳ್ಳುತ್ತಿದ್ದಾರೆ. ಅಪರಿಚಿತರು ತನ್ನ ಕುಟುಂಬದ ಬಗ್ಗೆ ಮಾತನಾಡಿದರೆ, ಈ ಸೀಕ್ರೆಟ್‌ ಕೋಡ್‌ ಹೇಳಬೇಕು. ಇಲ್ಲವಾದಲ್ಲಿ ಅವರೊಂದಿಗೆ ವ್ಯವಹರಿಸದಂತೆ ಪೋಷಕರು ಮಕ್ಕಳಲ್ಲಿ ಜಾಗೃತಿ ಮೂಡಿಸುತ್ತಿದ್ದಾರೆ. ಈ ಹೊಸ ಉಪಾಯ ಈಗ ವರ್ಕೌಟ್‌ ಆಗಿದೆ.

ಬಾಲಕಿಯ ಪೋಷಕರು ಈ ಕುರಿತು ಪೊಲೀಸರಿಗೆ ದೂರು ನೀಡಿದ್ದು, ಸಿಸಿಟಿವಿ ಸಹಾಯದಿಂದ ಆರೋಪಿಯ ಹುಡುಕಾಟಕ್ಕೆ ಮುಂದಾಗಿದ್ದಾರೆ.

ಮೂಲ ವರದಿ