ಕೊಳ್ಳೆಗಾಲದ ಟೆನ್ಜಿನ್‌ 'ಮಿಸ್‌ ಟಿಬೆಟ್‌'

ಧರ್ಮಶಾಲಾ: ಚಾಮರಾಜನಗರ ಜಿಲ್ಲೆಯ ಕೊಳ್ಳೆಗಾಲ ಮೂಲದ ಟೆನ್ಜಿನ್‌ ಪಾಲ್ದೋನ್‌ 2017ರ 'ಮಿಸ್‌ ಟಿಬೆಟ್‌' ಕಿರೀಟ ಮುಡಿಗೇರಿಸಿಕೊಂಡಿದ್ದಾರೆ.

ದೇಶಾಂತರ ಟಿಬೆಟ್‌ ಸರಕಾರ ಹಾಗೂ ಧರ್ಮಗುರು ದಲೈಲಾಮಾ ಅವರ ಕೇಂದ್ರ ಸ್ಥಾನವಾಗಿರುವ ಧರ್ಮಶಾಲಾದಲ್ಲಿ ಭಾನುವಾರ ನಡೆದ 15ನೇ ಆವೃತ್ತಿಯ ಸೌಂದರ್ಯ ಸ್ಪರ್ಧೆಯಲ್ಲಿ ಪಾಲ್ದೋನ್‌ 'ಮಿಸ್‌ ಟಿಬೆಟ್‌' ಆಗಿ ಆಯ್ಕೆಯಾದರು. ಟೆನ್ಜಿನ್‌ ಖೆಚೋಯಿ ಮತ್ತು ಟೆನ್ಜಿನ್‌ ನಾರ್ಡ್ರಾನ್‌ ತಂತರದ ಸ್ಥಾನಗಳಿಗೆ ಆಯ್ಕೆಯಾಗಿದ್ದಾರೆ.

ಸ್ಪೈಸ್‌ ಜೆಟ್‌ ಕ್ಯಾಬಿನ್ ಸಿಬ್ಬಂದಿಯಾಗಿರುವ ಕೊಳ್ಳೆಗಾಲ ಮೂಲದ ಟೆನ್ಜಿನ್‌ಗೆ ಒಂದು ಲಕ್ಷ ರೂ. ನಗದು ಬಹುಮಾನದ ಜತೆಗೆ ವಿಯೆಟ್ನಾಂ ಪ್ರವಾಸದ ಕೊಡುಗೆ ನೀಡಲಾಗಿದೆ.

ಸ್ಪರ್ಧಿಗಳ ಹುಡುಕಾಟವೇ ಸವಾಲಿನ ವಿಷಯವಾಗಿದ್ದರೂ ಈ ಬಾರಿ ದಾಖಲೆ 9 ಮಂದಿ ಸ್ಪರ್ಧಿಸಿದ್ದರು. ಈ ಪೈಕಿ ಯಾರೊಬ್ಬರೂ ಈವರೆಗೆ ಟಿಬೆಟ್‌ಗೆ ಕಾಲಿಟ್ಟಿಲ್ಲ. 1960ರಲ್ಲಿ ದಲೈಲಾಮಾ ದೇಶಾಂತರಗೊಂಡ ನಂತರ ಭಾರತದಲ್ಲಿ ಆಶ್ರಯ ಪಡೆದಿರುವ ಟಿಬೆಟ್‌ ಸಮುದಾಯದ ಹೆಣ್ಣು ಮಕ್ಕಳು ಈ ಸ್ಪರ್ಧೆಯ ಸ್ಪರ್ಧಿಗಳು.