ಮಾಜಿ ಆಪ್‌ ಮುಖಂಡನಿಂದ ಶ್ರೀಕೃಷ್ಣನ ಅವಹೇಳನ

ಹೊಸದಿಲ್ಲಿ: ಹೆಣ್ಣು ಮಕ್ಕಳ ರಕ್ಷಣೆಗೆ ಪ್ರಾರಂಭಿಸಿರುವ ಆ್ಯಂಟಿ ರೋಮಿಯೋ ಪಡೆಗೆ ಕೆಣಕಲು ಹೋಗಿ ಆಪ್‌ನ ಮಾಜಿ ನಾಯಕ ನ್ಯಾಯವಾದಿ ಪ್ರಶಾಂತ್ ಭೂಷಣ್ ಶ್ರೀಕೃಷ್ಣನ ಕುರಿತು ವಿವಾದಾತ್ಮಕ ಹೇಳಿಕೆ ನೀಡಿದ್ದಾರೆ.

ಶ್ರೀಕೃಷ್ಣನಿಗೆ ಅವಮಾನವಾಗುವ ರೀತಿಯಲ್ಲಿ ಹೇಳಿಕೆ ನೀಡಿರುವ ಪ್ರಶಾಂತ್, ರೋಡ್‌ ರೋಮಿಯೋಗಳು ಕೇವಲ ಒಬ್ಬರನ್ನು ಇಷ್ಟ ಪಡುತ್ತಿದ್ದರು. ಆದರೆ ಶ್ರೀಕೃಷ್ಣ ಮಹಿಳೆಯರನ್ನು ಚುಡಾಯಿಸುತ್ತಿದ್ದ, ಅದಕ್ಕಾಗಿಯೇ ಪ್ರಸಿದ್ಧಿಯನ್ನೂಗಳಿಸಿದ್ದ. ಸಿಎಂ ಆದಿತ್ಯನಾಥ್ ತಾವು ರಚಿಸಿರುವ ದಳವನ್ನು ಆ್ಯಂಟಿ ಕೃಷ್ಣ ದಳ ಎಂದು ಹೆಸರಿಸುವ ಧೈರ್ಯ ತೋರುತ್ತಾರೆಯೇ? ಎಂದು ಪ್ರಶ್ನಿಸಿ ಟ್ವೀಟ್‌ ಮಾಡಿದ್ದಾರೆ.

ಇವರಿಗೆ ಸಾಥ್ ನೀಡಿದ ಸ್ವರಾಜ್ ಇಂಡಿಯಾದ ವಕ್ತಾರ ಅನುಪಮ್, ಉ.ಪ್ರದೇಶದ ಆ್ಯಂಟಿ ರೋಮಿಯೋ ದಳ ಷೇಕ್ಸ್ ಪಿಯರ್‌ಗೆ ನೀಡಿರುವ ಗೌರವವಾಗಿದೆ. ಒಂದು ವೇಳೆ ಇಂಗ್ಲೆಂಡ್‌ನಲ್ಲಿ ಮಹಿಳೆಯರ ಚುಡಾಯಿಸುವವರನ್ನು ತಡೆಗಟ್ಟಲು ಆ್ಯಂಟಿ ಕೃಷ್ಣ ದಳವನ್ನು ಪ್ರಾರಂಭಿಸಿದರೆ ಅಚ್ಚರಿ ಪಡಬೇಕಿಲ್ಲ ಎಂದು ಟ್ವೀಟ್‌ ಮಾಡಿದ್ದಾರೆ.

ಇದೀಗ ಇಬ್ಬರ ಟ್ವೀಟ್‌ಗೆ ನೆಟ್‌ ಬಳಕೆದಾರರು ರಿಯಾಕ್ಟ್‌ ಮಾಡಲು ಪ್ರಾರಂಭಿಸಿದ್ದು, ಭೂಷಣ್‌ ಟ್ವೀಟ್‌ಗೆ ಖಾರ ಪ್ರಕ್ರಿಯೆಗಳು ವ್ಯಕ್ತವಾಗಿದೆ. ಇದೇ ವೇಳೆ, ಕೃಷ್ಣನ ಕುರಿತು ಅವಹೇಳನಕಾರಿ ಮಾತನಾಡಿರುವ ಭೂಷಣ್‌ ವಿರುದ್ಧ ದೂರು ಸಲ್ಲಿಸುವುದಾಗಿ ದಿಲ್ಲಿಯ ಬಿಜೆಪಿ ವಕ್ತಾರ ತಜಿಂದರ್‌ ಪಾಲ್‌ ಎಸ್‌ ಬಗ್ಗಾ ಹೇಳಿದ್ದಾರೆ.