ಆರೇ ತಿಂಗಳಲ್ಲಿ ಐಶ್ವರ್ಯಾಗೆ ಡಿವೋರ್ಸ್ ನೀಡಿದ ಲಾಲು ಪುತ್ರ

ಪಟನಾ: ಬಿಹಾರ ಮಾಜಿ ಮುಖ್ಯಮಂತ್ರಿ ಲಾಲು ಪ್ರಸಾದ್‌ ಯಾದವ್‌ ಅವರ ಪುತ್ರ ತೇಜ್‌ ಪ್ರತಾಪ್‌ ಯಾದವ್‌ (29) ವಿವಾಹವಾಗಿ ಆರೇ ತಿಂಗಳಲ್ಲಿ ವಿಚ್ಛೇದನಕ್ಕೆ ಅರ್ಜಿ ಸಲ್ಲಿಸಿದ್ದಾರೆ.

ಬಿಹಾರದ ಆರೋಗ್ಯ ಸಚಿವರೂ ಆಗಿದ್ದ ತೇಜ್‌ ಪ್ರತಾಪ್‌ ಕಳೆದ ಮೇನಲ್ಲಿ ಆರ್‌ಜೆಡಿ ನಾಯಕ ಚಂದ್ರಿಕಾ ರಾಯ್‌ ಅವರ ಪುತ್ರಿ ಐಶ್ವರ್ಯಾ ರಾಯ್‌ ಅವರನ್ನು ವರಿಸಿದ್ದರು. ಮೇ 12ರಂದು ಪಟನಾದಲ್ಲಿ ಅದ್ಧೂರಿಯಾಗಿ ಇವರಿಬ್ಬರ ವಿವಾಹ ನೆರವೇರಿತ್ತು. ಮೇವು ಹಗರಣದಲ್ಲಿ ಜೈಲುಪಾಲಾಗಿದ್ದ ಲಾಲು ಪೆರೋಲ್‌ ಪಡೆದು ಮದುವೆಗೆ ಹಾಜರಾಗಿದ್ದರು.

ಬಿಹಾರದ ಮಾಜಿ ಮುಖ್ಯಮಂತ್ರಿ ದರೋಗಾ ಪ್ರಸಾದ್‌ ರಾಯ್‌ ಅವರ ಮೊಮ್ಮಗಳೂ ಆಗಿರುವ ಐಶ್ವರ್ಯಾ, ಆರ್‌ಜೆಡಿ ಟಿಕೆಟ್‌ನಿಂದ ಬಿಹಾರದ ಛಾಪ್ರಾ ಕ್ಷೇತ್ರದಲ್ಲಿ 2019ರ ಲೋಕಸಭಾ ಚುನಾವಣೆಗೆ ಸ್ಪರ್ಧಿಸಲಿದ್ದಾರೆ ಎಂಬ ವರದಿಗಳ ಬೆನ್ನಲ್ಲೇ ವಿಚ್ಛೇದನದ ಸುದ್ದಿ ಹೊರಬಿದ್ದಿದೆ.

ಆದರೆ, ಲಾಲು ಕುಟುಂಬ ಅಧಿಕೃತವಾಗಿ ವಿಚ್ಛೇದನ ನಿರ್ಧಾರದ ವಿಚಾರವನ್ನು ಖಚಿತಪಡಿಸಿಲ್ಲ.

ಹಲವು ಆರ್‌ಜೆಡಿ ಪ್ರಚಾರ ಪೋಸ್ಟರ್‌ಗಳಲ್ಲಿ ಐಶ್ವರ್ಯಾ ಅವರು ಫೋಟೊ ಕಾಣಿಸಿಕೊಂಡಿತ್ತು. ಆರ್‌ಜೆಡಿಯಲ್ಲಿ ಲಾಲು ಕುಟುಂಬದವರಿಗಷ್ಟೇ ಟಿಕೆಟ್‌ ದೊರೆಯುತ್ತದೆ ಎಂದು ಆಡಳಿತಾರೂಢ ಜೆಡಿಯು ಲೆವಡಿ ಮಾಡಿತ್ತು. ಇದಕ್ಕೆ ಪ್ರತಿಕ್ರಿಯಿಸಿದ್ದ ತೇಜ್‌ ಪ್ರತಾಪ್‌ ತಮ್ಮ ಪತ್ನಿ ರಾಜಕೀಯಕ್ಕೆ ಬರುವುದಿಲ್ಲ ಎಂದು ಸ್ಪಷ್ಟನೆ ನೀಡಿದ್ದರು.