ತಾಯಿ ಮಡಿಲಲ್ಲಿದ್ದ 3 ವರ್ಷದ ಮಗು ಹೊತ್ತೊಯ್ದ ಚಿರತೆ

ಅಲಿಪುರ್ದುವಾರ್: ಪಶ್ಚಿಮ ಬಂಗಾಳದ ಅಲಿಪುರ್ದುವಾರ್ ಜಿಲ್ಲೆಯ ಚಹಾ ತೊಟವೊಂದರಲ್ಲಿ ಚಿರತೆಯೊಂದು ತಾಯಿಯ ಮಡಿಲಿನಲ್ಲಿದ್ದ ಮೂರು ವರ್ಷದ ಹೆಣ್ಣು ಮಗುವನ್ನು ಹೊತೊಯ್ದು ಕೊಂದು ಹಾಕಿದ ಆಘಾತಕಾರಿ ಘಟನೆಯೊಂದು ನಡೆದಿದೆ.

ಗಾರ್ಗಂದ ಚಹಾ ತೋಟದಲ್ಲಿ ಕಾರ್ಮಿಕಳಾಗಿ ಕೆಲಸ ಮಾಡುತ್ತಿದ್ದ ಪೂಜಾ ಓರಾನ್ ಎಂಬವರು ತೋಟದಲ್ಲಿರುವ ತನ್ನ ಮನೆಯ ಹೊರ ಭಾಗದಲ್ಲಿ ಅಡುಗೆ ಮಾಡುತ್ತಿದ್ದರು. ಈ ಸಂದರ್ಭದಲ್ಲಿ ಏಕಾಏಕಿ ತೋಟಕ್ಕೆ ನುಗ್ಗಿದ ಚಿರತೆ ತಾಯಿ ಪೂಜಾ ಮಡಿಲಿನಲ್ಲಿದ್ದ ಪುತ್ರಿ ಪ್ರಣಿತಾ ಓರಾನ್‌ಳನ್ನು ಹೊತ್ತೊಯ್ದು ಕೊಂದು ಹಾಕಿದೆ.

ಅಲಿಪುರ್ದುವಾರ್‌ನ ಬಿರ್ಪಾರಾ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿರುವ ಪೂಜಾ ಅವರ ನಿವಾಸದಿಂದ ಸುಮಾರು ಮೂರು ಕಿ.ಮೀ ದೂರದಲ್ಲಿರುವ ಪ್ರದೇಶದಲ್ಲಿ ಪ್ರಣಿತಾಳ ಮೃತದೇಹ ಪತ್ತೆಯಾಗಿದೆ.

'ಪುತ್ರಿಯನ್ನು ರಕ್ಷಿಸಲು ಚಿರತೆ ಜತೆ ಕಾದಾಡಲು ಯತ್ನಿಸಿದೆ. ಆದರೆ, ನನ್ನ ಪ್ರಯತ್ನ ವಿಫಲವಾಯ್ತು' ಎಂದು ತಾಯಿ ಓರಾನ್ ಅಳಲು ತೊಡಿಕೊಂಡಿದ್ದಾರೆ.