ದೇಶ ಇಬ್ಭಾಗ ಮಾಡುವ ತುಕ್ಡೆ, ತುಕ್ಡೆ ಗ್ಯಾಂಗ್‌ ಸೋಲಿಸುವ ಸಮಯ ಬಂದಿದೆ: ಅಮಿತ್‌ ಶಾ

ಹೊಸದಿಲ್ಲಿ: ಪೌರತ್ವ ತಿದ್ದುಪಡಿ ಕಾಯಿದೆ ವಿಷಯದಲ್ಲಿ ಪ್ರತಿಭಟನೆ, ಪ್ರತಿರೋಧ ಮತ್ತು ಹಿಂಸಾಚಾರದ ಅಬ್ಬರ ಈಗ ತಣ್ಣಗಾಗಿದೆ. ಆದರೆ ವಾದ-ಪ್ರತಿಪಾದ, ಏಟು-ಎದಿರೇಟಿನ ಭರಾಟೆ ಜೋರಾಗಿದೆ. ನೂತನ ಕಾಯಿದೆ ವಿಷಯದಲ್ಲಿಬಿಜೆಪಿ ಮತ್ತು ಪ್ರತಿಪಕ್ಷಗಳ ಮುಖಂಡರು ಗುರುವಾರ ತಮ್ಮದೇ ಧಾಟಿಯಲ್ಲಿ ಸಮರ್ಥನೆ ಮತ್ತು ದೂಷಣೆಯ ಜಂಗಿಕುಸ್ತಿ ನಡೆಸಿ ಗಮನ ಸೆಳೆದರು.

ಗೊಂದಲ ಸೃಷ್ಟಿಸುತ್ತಿದೆ ಕಾಂಗ್ರೆಸ್‌

ಪೌರತ್ವ ತಿದ್ದುಪಡಿ ಕಾಯಿದೆ ವಿಷಯದಲ್ಲಿಕಾಂಗ್ರೆಸ್‌ ನೇತೃತ್ವದ ಪ್ರತಿಪಕ್ಷಗಳು ಗೊಂದಲ ಸೃಷ್ಟಿಸುವ ಕೆಲಸ ಮಾಡುತ್ತಿದ್ದು, ಆ ಮೂಲಕ ಇಡೀ ದೇಶದ ನೆಮ್ಮದಿ ಕದಡಲಾಗುತ್ತಿದೆ ಎಂದು ಕೇಂದ್ರ ಗೃಹ ಸಚಿವ ಅಮಿತ್‌ ಶಾ ಆರೋಪಿಸಿದರು.

ದಿಲ್ಲಿ ಅಭಿವೃದ್ಧಿ ಪ್ರಾಧಿಕಾರ ಏರ್ಪಡಿಸಿದ್ದ ಕಾರ್ಯಕ್ರಮದಲ್ಲಿ ಮಾತನಾಡಿದ ಶಾ, ಪೌರತ್ವ ವಿಷಯದಲ್ಲಿ ಎಡ ಪಂಥೀಯ ಚಿಂತಕರು ತಳೆದ ನಿಲುವನ್ನು ಖಂಡಿಸಿದರು. ಅವರನ್ನು ‘ತುಕ್ಡೆ ತುಕ್ಡೆ ಗ್ಯಾಂಗ್‌’ ಎಂದು ಜರಿದರು.

‘‘ದಿಲ್ಲಿಸೇರಿದಂತೆ ದೇಶದೆಲ್ಲಡೆ ನೆಮ್ಮದಿ ಕದಡಲು ಕಾಂಗ್ರೆಸ್‌ ನೇತೃತ್ವದ ಪ್ರತಿಪಕ್ಷಗಳ ಕಾರಣ. ಸಿಎಎ ವಿಷಯದಲ್ಲಿಜನರನ್ನು ದಾರಿ ತಪ್ಪಿಸಿ ನೆಮ್ಮದಿ ಕದಡುವ ಕೆಲಸವನ್ನು ಈ ತುಕ್ಡೆ ತುಕ್ಡೆ ಗ್ಯಾಂಗ್‌ ಮಾಡುತ್ತಿದೆ. ಆದರೆ ದೇಶದ ಅಭಿವೃದ್ಧಿ ಮತ್ತು ಐಕ್ಯತೆ ನಮ್ಮ ಗುರಿ. ಇದನ್ನು ಕದಲಿಸಲು ಯಾರಿಂದಲೂ ಸಾಧ್ಯವಿಲ್ಲ,’’ ಎಂದರು.

ದೇಶ ವಿಭಜಿಸಲು ಯತ್ನಿಸುವ ತುಕ್ಡೆ ತುಕ್ಡೆ ಗ್ಯಾಂಗ್‌ಗೆ ಹೊಸದಿಲ್ಲಿಯ ಜನರು ಪಾಠ ಕಲಿಸಲು ಅವಕಾಶ ಒದಗಿ ಬಂದಿದೆ ಎಂದು ಸಚಿವ ಅಮಿತ್‌ ಶಾ ಹೇಳಿದರು.