ಪ್ರಧಾನಿ ಹುದ್ದೆಗೆ ಚ್ಯುತಿಯುಂಟಾಗುವ ಹೇಳಿಕೆ ನೀಡುವುದಿಲ್ಲ: ರಾಹುಲ್‌

ಅಹಮದಾಬಾದ್‌: ಪ್ರಧಾನಿ ನರೇಂದ್ರ ಮೋದಿ ಅವರನ್ನು ಟೀಕಿಸುವ ಸಂದರ್ಭದಲ್ಲಿ ಕಾಂಗ್ರೆಸ್‌ ಪಕ್ಷವಾಗಲೀ ಅಥವಾ ಪಕ್ಷದ ಯಾವುದೇ ಸದಸ್ಯರಾಗಲೀ ಬಿಜೆಪಿಯಂತೆ ಪ್ರಧಾನಿ ಹುದ್ದೆಗೆ ಚ್ಯುತಿ ಬರುವಂತಹ ಮಾತುಗಳನ್ನು ಆಡುವುದಿಲ್ಲ ಎಂದು ಕಾಂಗ್ರೆಸ್‌ ಉಪಾಧ್ಯಕ್ಷ ರಾಹುಲ್‌ ಗಾಂಧಿ ಹೇಳಿದ್ದಾರೆ.

ಕಾಂಗ್ರೆಸ್‌ ಸಾಮಾಜಿಕ ಜಾಲತಾಣದ ಸದಸ್ಯರನ್ನು ಉದ್ದೇಶಿಸಿ ಮಾತನಾಡಿರುವ ಕಾಂಗ್ರೆಸ್‌ ಉಪಾಧ್ಯಕ್ಷ ರಾಹುಲ್‌ ಗಾಂಧಿ, 'ಮೋದಿಯವರು ಪ್ರಧಾನಿಯಾಗುವುದಕ್ಕಿಂತಲೂ ಮುನ್ನ ಅಂದಿನ ಪ್ರಧಾನಿಯವರಿಗೆ ಅವಹೇಳನ ಮಾತುಗಳನ್ನು ಆಡುತ್ತಿದ್ದರು. ಆದರೆ ನಾವು ಕೇವಲ ಮೋದಿ ಮತ್ತು ಬಿಜೆಪಿಯವರ ತಪ್ಪುಗಳನ್ನು ಕಂಡು ಹಿಡಿದು ಟೀಕೆ ಮಾಡುತ್ತೇವೆಯೇ ಹೊರತು ಪ್ರಧಾನಿ ಹುದ್ದೆಗೆ ಎಂದಿಗೂ ಚ್ಯುತಿ ಬರುವಂತಹ ಮಾತುಗಳನ್ನು ಆಡುವುದಿಲ್ಲ' ಎಂದು ರಾಹುಲ್‌ ಹೇಳಿದ್ದಾರೆ.

'ನಾವು ಒಂದು ನಿರ್ದಿಷ್ಟ ಗೆರೆಯನ್ನು ದಾಟಿ ಎಂದಿಗೂ ಪ್ರಧಾನಿಯನ್ನು ಅವಹೇಳನ ಮಾಡಲಾರೆವು. ಆದರೆ ಮೋದಿಯವರು ಮಾತ್ರ ಈ ಹಿಂದೆ ಪ್ರಧಾನಿಯವರಿಗೆ ಅವಮಾನವಾಗುವ ಧಾಟಿಯಲ್ಲಿ ಮಾತನಾಡುತ್ತಿದ್ದರು. ಅವರು ನಮಗೆ ಏನೇ ಹೇಳಿದರೂ ನಾವು ಬಿಜೆಪಿ ಅಥವಾ ಮೋದಿಯಂತೆ ಕೀಳು ಮಟ್ಟಕ್ಕೆ ಇಳಿಯಲಾರೆವು' ಎಂದು ರಾಹುಲ್‌ ಪುನರುಚ್ಚರಿಸಿದ್ದಾರೆ.

ಗುಜರಾತ್‌ ವಿಕಾಸಕ್ಕೆ ಹುಚ್ಚು ಹಿಡಿದಿದೆ ಎಂದು ಹೇಳಿರುವ ಕಾಂಗ್ರೆಸ್‌ ಉಪಾಧ್ಯಕ್ಷ, ಇಂತಹ ಸುಳ್ಳು ಹೇಳಿ ಹೇಳಿ ಹುಚ್ಚು ಹಿಡಿದು ಬಿಟ್ಟಿದೆ ಎಂದು ರಾಹುಲ್‌ ಹೇಳಿದ್ದಾರೆ.