ಗುಡಿಸಲಿನಲ್ಲಿ ವಾಸವಾಗಿರುವ ಬಿಜೆಪಿ ಶಾಸಕನಿಗೆ ಮನೆ ಕಟ್ಟಿಕೊಡಲು ಮುಂದಾದ ಜನ!

ಮುರೈನಾ: ಸಾಮಾನ್ಯವಾಗಿ ಜನಪ್ರತಿನಿಧಿಗಳೆಂದರೆ ದೊಡ್ಡ ದೊಡ್ಡ ಮನೆ, ಐಷಾರಾಮಿ ಕಾರು ಹಾಗೂ ವಿಲಾಸಿ ಜೀವನ ನಡೆಸುತ್ತಾರೆ ಎಂದೇ ಎಲ್ಲರೂ ಭಾವಿಸುತ್ತಾರೆ. ಆದರೆ, ಮಧ್ಯಪ್ರದೇಶದ ಬಿಜೆಪಿ ಶಾಸಕರೊಬ್ಬರು ಇದಕ್ಕೆ ವಿರುದ್ಧವಾಗಿದ್ದಾರೆ.

ಹೌದು, ಇಲ್ಲಿನ ವಿಜಯಪುರ್ ವಿಧಾನಸಭಾ ಕ್ಷೇತ್ರದ ಶಾಸಕ ಸೀತಾರಾಮ್ ಅದಿವಾಸಿ (55) ಅವರು ತಮ್ಮ ಪತ್ನಿಯೊಂದಿಗೆ ಗುಡಿಸಲಿನಲ್ಲಿಯೇ ವಾಸವಾಗಿದ್ದಾರೆ. ಜನತೆಗಾಗಿ ಶ್ರಮಿಸುವ ಇವರ ಶೋಚನೀಯ ಸ್ಥಿತಿ ನೋಡಿ ಜನರೇ ಹಣ ಸಂಗ್ರಹಿಸಿ ಮನೆ ಕಟ್ಟಿಸಿಕೊಡಲು ಮುಂದಾಗಿದ್ದಾರೆ.

ಕಳೆದ ವರ್ಷ ನಡೆದ ಮಧ್ಯಪ್ರದೇಶ ವಿಧಾನಸಭೆ ಚುನಾವಣೆಯಲ್ಲಿ ವಿಜಯಪುರ ಕ್ಷೇತ್ರದಿಂದ ಕಣಕ್ಕಿಳಿದಿದ್ದ ಸೀತಾರಾಮ, ಕಾಂಗ್ರೆಸ್‌ನ ಬಲಿಷ್ಠ ಅಭ್ಯರ್ಥಿ ರಾಮ್‌ನಿವಾಸ್ ರಾವತ್‌ ಅವರನ್ನು ಸೋಲಿಸುವ ಮೂಲಕ ಮೊದಲ ಬಾರಿಗೆ ಶಾಸಕರಾಗಿ ಆಯ್ಕೆಯಾಗಿದ್ದರು. ಈಗ ತಮ್ಮ ಮೊದಲ ಸಂಬಳದ ನಿರೀಕ್ಷೆಯಲ್ಲಿದ್ದಾರೆ.

ರಾಜ್ಯದ ಶಾಸಕರಿಗೆ 1.10 ಲಕ್ಷ ಸಂಬಳ ನಿಗದಿಪಡಿಸಲಾಗಿದೆ ಎಂದು ಮಧ್ಯಪ್ರದೇಶ ಸರಕಾರದ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

ಕ್ಷೇತ್ರದ ಜನತೆಗಾಗಿ ಹಗಲಿರುಳು ಶ್ರಮಿಸುತ್ತಿರುವ ಶಾಸಕರು ಕೊಳಗೇರಿಯಲ್ಲಿ ವಾಸವಾಗಿರುವುದನ್ನು ನೋಡಲಾಗುತ್ತಿಲ್ಲ. ಹೀಗಾಗಿ ನಾವೆಲ್ಲರೂ ಸ್ವಇಚ್ಛೆಯಿಂದ ಹಣ ಸಂಗ್ರಹಿಸಿ ಶಾಸಕರಿಗೆ ಎರಡು ಕೊಠಡಿಯ ಮನೆ ನಿರ್ಮಿಸಿ ಕೊಡುತ್ತಿದ್ದೇವೆ ಎಂದು ಪಿಪ್ರಾಣಿ ಗ್ರಾಮಸ್ಥರಾದ ಧನರಾಜ್ ಹೇಳಿಕೊಂಡಿದ್ದಾರೆ.

ಬುಡಕಟ್ಟು ಸಮುದಾಯಕ್ಕೆ ಸೇರಿದ ಇವರು, ಶಾಸಕರ ಅನುದಾನವನ್ನೆಲ್ಲ ಸಂಪೂರ್ಣ ಜನಸೇವೆಗೆ ಬಳಸುವ ಮೂಲಕ ನಿಸ್ವಾರ್ಥ ರಾಜಕಾರಣಿ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ. ಇದೇ ಕಾರಣಕ್ಕಾಗಿ ಜನರು ತಾವೇ ಹಣ ಸಂಗ್ರಹಿಸಿ ಶಾಸಕರಿಗೆ ಮನೆ ಕಟ್ಟಿಸಿಕೊಡುತ್ತಿದ್ದಾರೆ.