ವಿಕಲಾಂಗ ಕಾಯಿದೆ ಅಡಿಯಲ್ಲಿ ವೈದ್ಯಕೀಯ ಸೀಟು ಪಡೆದ ಆಶುತೋಷ್ ಪುರ್ಸ್ವಾನಿ

ಅಹಮದಾಬಾದ್: 17ರ ಹರೆಯದ ಆಶುತೋಷ್ ಪುರ್ಸ್ವಾನಿ ತಂದೆಯಂತೆ ವೈದ್ಯನಾಗಬೇಕೆಂದು ಕನಸು ಕಟ್ಟಿದ. ದೃಷ್ಟಿದೋಷವಿರುವ ಬಾಲಕನಾತ. ಈ ಊನತೆ ಅವನ ಕನಸಿನ ಹಾದಿಗೆ ಅಡ್ಡ ಬರಲಿಲ್ಲ. ಆದರೆ ಮೆಡಿಕಲ್ ಕೌನ್ಸಿಲ್ ಆಫ್ ಇಂಡಿಯಾ ಆತನಿಗೆ ಪ್ರವೇಶಾತಿ ನಿರ್ದೇಶನಗಳನ್ನು ಮುಂದಿಟ್ಟುಕೊಂಡು ವೈದ್ಯಕೀಯ ಪದವಿ ಪ್ರವೇಶ ನೀಡಲು ನಿರಾಕರಿಸಲಾಯಿತು. ಛಲ ಬಿಡದ ಬಾಲಕ ಸುಪ್ರೀಂ ಕೋರ್ಟ್ ಮೆಟ್ಟಿಲೇರಿ ವಿಕಲಾಂಗ ವ್ಯಕ್ತಿಗಳ (Persons with Disabilities (PwD) Act) ಕಾಯಿದೆ 2016 ಅಡಿಯಲ್ಲಿ ನ್ಯಾಯ ದೊರಕಿಸಿಕೊಂಡಿದ್ದಾನೆ. ಈ ಮೂಲಕ ಈ ಕಾಯಿದೆ ಅಡಿಯಲ್ಲಿ ವೈದ್ಯಕೀಯ ಸೀಟು ಪಡೆದವರಲ್ಲಿ ಮೊದಲಿಗನೆನಿಸಿದ್ದಾನೆ.

ಆಶುತೋಷ್ ಪುರ್ಸ್ವಾನಿ (17) ಪರ ಸುಪ್ರೀಂ ಆಗಸ್ಟ್ 27ಕ್ಕೆ ತೀರ್ಪು ನೀಡಿತು ಮತ್ತು ಆಗಸ್ಟ್ 31 ಕ್ಕೆ ಆತ ಅಹಮದಾಬಾದಿನ ಬಿಜೆ ವೈದ್ಯಕೀಯ ಕಾಲೇಜಿನಲ್ಲಿ ಶುಲ್ಕ ಭರಿಸಿ ಪ್ರವೇಶಾತಿ ಪಡೆದ.

ನಮ್ಮ ಮೂರು ತಿಂಗಳ ಹೋರಾಟಕ್ಕೆ ನ್ಯಾಯ ದೊರಕಿದ್ದು, ಈ ಮಹತ್ವದ ತೀರ್ಪಿನ ಮೂಲಕ ನ್ಯಾಯಾಲಯ ಸಮಾನತೆ ತತ್ವವನ್ನು ಎತ್ತಿ ಹಿಡಿಯಿತು, ಎಂದು ಆಶುತೋಷ್ ತಂದೆ ಡಾಕ್ಟರ್ ಕಲ್ಮೇಶ್ ಪುರ್ಸ್ವಾನಿ ಪ್ರತಿಕ್ರಿಯಿಸಿದ್ದಾರೆ.

6/18 ದೃಷ್ಟಿ ಹೊಂದಿರುವ ಅಶುತೋಷ್, ಏಮ್ಸ್ ತಜ್ಞರ ವೈದ್ಯಕೀಯ ಮಂಡಳಿ ಕಡಿಮೆ ದೃಷ್ಟಿ ಹೊಂದಿದ ವ್ಯಕ್ತಿಯೆಂದು ಪ್ರಮಾಣೀಕರಿಸಿದ್ದು, PwD ಕಾಯಿದೆ ಅಡಿಯಲ್ಲಾತ ವೈದ್ಯಕೀಯ ಸೀಟು ಪಡೆದುಕೊಂಡಿದ್ದಾನೆ. ಅಂಗವಿಕಲ ವಿದ್ಯಾರ್ಥಿ ಕೋಟಾದಡಿಯಲ್ಲಿಯೇ ಆತ ನೀಟ್ ಪರೀಕ್ಷೆಯಲ್ಲಿ ತೇರ್ಗಡೆಯಾಗಿದ್ದ.

ಸುಪ್ರೀಂನ ಈ ತೀರ್ಪಿನ ಬಳಿಕ ಮೆಡಿಕಲ್ ಕೌನ್ಸಿಲ್ ಆಫ್ ಇಂಡಿಯಾ ಆತನಿಗೆ ಪ್ರವೇಶಾತಿ ನಿರ್ದೇಶನಗಳನ್ನು ಬದಲಾಯಿಸಿಕೊಳ್ಳುವ ಸಾಧ್ಯತೆಗಳಿವೆ.