ಎಲ್‌ಟಿಟಿಇ ಮೇಲಿನ ನಿಷೇಧ 5 ವರ್ಷ ಮುಂದುವರಿಕೆ

ಹೊಸದಿಲ್ಲಿ: ಭಾರತದಲ್ಲಿ ಎಲ್‌ಟಿಟಿಇ ಮೇಲಿನ ನಿಷೇಧವನ್ನು ಇನ್ನೂ 5 ವರ್ಷಗಳಿಗೆ ವಿಸ್ತರಿಸಲಾಗಿದೆ.

ಕೇಂದ್ರ ಗೃಹಸಚಿವಾಲಯ ಈ ಸಂಬಂಧ ಹೊಸದಾಗಿ ಅಧಿಸೂಚನೆ ಹೊರಡಿಸಿದ್ದು, ಕಾನೂನು ಬಾಹಿರ ಚಟುವಟಿಕೆಗಳ ನಿಯಂತ್ರಣ ಕಾಯ್ದೆ ಪ್ರಕಾರ ಎಲ್‌ಟಿಟಿಇ ಒಂದು ಕಾನೂನು ಬಾಹಿರ ಸಂಘಟನೆ ಎಂದು ತಿಳಿಸಿದೆ.

1991ರಲ್ಲಿ ಮಾಜಿ ಪ್ರಧಾನಿ ರಾಜೀವ್‌ಗಾಂಧಿ ಹತ್ಯೆಯ ನಂತರ ಭಾರತದಲ್ಲಿ ಎಲ್‌ಟಿಟಿಇಯನ್ನು ನಿಷೇಧಿಸಲಾಗಿತ್ತು.
ಎಲ್‌ಟಿಟಿಇ ಶ್ರೀಲಂಕಾದಲ್ಲಿ ಒಂದು ಸಂಘಟನೆಯಾಗಿದ್ದು, ಅದಕ್ಕೆ ಭಾರತದಲ್ಲಿ ಬೆಂಬಲಿಗರು, ಸಹಾನುಭೂತಿ ಹೊಂದಿರುವವರು ಮತ್ತು ಏಜೆಂಟರು ಇದ್ದಾರೆ ಎಂದು ಅಧಿಸೂಚನೆಯಲ್ಲಿ ತಿಳಿಸಲಾಗಿದೆ.

ತಮಿಳರಿಗಾಗಿ ಪ್ರತ್ಯೇಕ ತಾಯ್ನಾಡು ತಮಿಳ್ ಈಳಂ ಎಲ್‌ಟಿಟಿಇಯ ಗುರಿಯಾಗಿದ್ದು, ಭಾರತದ ಸಾರ್ವಭೌಮತ್ವ ಹಾಗೂ ಪ್ರಾದೇಶಿಕ ಸಮಗ್ರತೆಗೆ ಬೆದರಿಕೆಯಾಗಿದೆ ಎಂದು ತಿಳಿಸಲಾಗಿದೆ.