ಮರದಲ್ಲಿ ಮೂಡಿದ ಓಂ, ಹಾವು: ಜನರಿಂದ ಪೂಜೆ

ಲಖ್ನೋ: ಉತ್ತರ ಪ್ರದೇಶದ ಲಖ್ನೋದ ಗುಡಾಂಬದ ಗ್ರಾಮವೊಂದರ ಮರದಲ್ಲಿ ಹಾವು ಮತ್ತು ಓಂ ಉಬ್ಬು ಚಿತ್ರ ಮೂಡಿದ್ದು, ಅದು ದೇವರ ವಿಶಿಷ್ಟತೆಯೆಂದು ನಂಬಿರುವ ಜನರು ಮರಕ್ಕೆ ಪೂಜೆ ಪುನಸ್ಕಾರ ಮಾಡತೊಡಗಿದ್ದಾರೆ.

ಕಪಾಸಿ ಗ್ರಾಮದಲ್ಲಿ ಕುರ್ಸಿ ರಸ್ತೆಯ ಬಳಿ ಹಳೆಯ ಕಾಂಕೋಹರ್ ಮರವೊಂದರಲ್ಲಿ ಕೆಲದಿನಗಳ ಹಿಂದೆ ಹಾವು ಮತ್ತು ಓಂ ಆಕೃತಿ ಮೂಡಿದೆ. ಅದರ ಬಗ್ಗೆ ಸುದ್ದಿ ಹರಡುತ್ತಲೇ ಜನರು ಧಾವಿಸಿದ್ದು, ಪೂಜೆ ಸಲ್ಲಿಸುತ್ತಿದ್ದಾರೆ.

ಸುತ್ತಲಿನ ಗ್ರಾಮಗಳಿಗೂ ಮರದಲ್ಲಿ ಓಂ ಮತ್ತು ಹಾವಿನ ಆಕೃತಿ ಮೂಡಿರುವ ಬಗ್ಗೆ ಸುದ್ದಿ ತಲುಪಿದ್ದು, ಹೆಚ್ಚಿನ ಸಂಖ್ಯೆಯಲ್ಲಿ ಜನರು ಭಯಭಕ್ತಿಯಿಂದ ಬಂದು ಮರಕ್ಕೆ ಪೂಜೆ ಸಲ್ಲಿಸುತ್ತಿದ್ದಾರೆ.

ಆದರೆ ಮರದಲ್ಲಿ ಈ ರೀತಿ ಆಕೃತಿ ಮೂಡುವುದು ಸಹಜವಾಗಿದ್ದು , ಅದಕ್ಕೆ ವಿಶೇಷ ಅರ್ಥ ಕಲ್ಪಿಸಬೇಕಿಲ್ಲ ಎಂದು ತಜ್ಞರು ಹೇಳಿದ್ದಾರೆ.

ಮೂಲ ವರದಿ: ನವಭಾರತ್ ಟೈಮ್ಸ್