ಲಖನೌ ಪೊಲೀಸರ ತಲೆ ಮೇಲೆ ಬೆಂಗಳೂರು ಪೊಲೀಸರ ಕ್ಯಾಪ್‌!

ಹೊಸದಿಲ್ಲಿ: ಬೆಂಗಳೂರು ಟ್ರಾಫಿಕ್‌ ಪೊಲೀಸರು ತೊಡುವ ಬಿಳಿ ಬಣ್ಣದ 'ಕೌಬಾಯ್‌' ರೀತಿಯ ಕ್ಯಾಪ್‌ಗಳು ಇನ್ನು ಮುಂದೆ ಉತ್ತರ ಪ್ರದೇಶದ ಲಖನೌ ಟ್ರಾಫಿಕ್‌ ಪೊಲೀಸರ ತಲೆ ಮೇಲೆ ಕಂಡರೂ ಅಚ್ಚರಿಪಡಬೇಕಿಲ್ಲ!

ಸದಾ ಬಿಸಿಲಲ್ಲಿ ನಿಂತ ಟ್ರಾಫಿಕ್‌ ನಿಯಂತ್ರಿಸುವ ಪೊಲೀಸರ ತಲೆಯನ್ನು ಈ ಕ್ಯಾಪ್‌ಗಳು ಕಾಯುತ್ತವೆ. ಲಖನೌ ಟ್ರಾಫಿಕ್‌ ಪೊಲೀಸರು ಸದ್ಯ ಖಾಕಿ ಬಣ್ಣದ ಉಣ್ಣೆಯ ಕ್ಯಾಪ್‌ಗಳನ್ನು ಬಳಸುತ್ತಿದ್ದಾರೆ. ಆದರೆ, ಬಿಸಿಲಲ್ಲಿ ಪೊಲೀಸರ ನೆತ್ತಿಯನ್ನು ತಂಪಾಗಿಡುವಲ್ಲಿ ಈ ಕ್ಯಾಪ್‌ಗಳು ಸೋಲುತ್ತಿವೆ. ಈ ಹಿನ್ನೆಲೆಯಲ್ಲಿ ಬೆಂಗಳೂರು ಟ್ರಾಫಿಕ್‌ ಪೊಲೀಸರು ಧರಿಸುವ ಬಿಳಿ ಬಣ್ಣದ ಕೌಬಾಯ್‌ ರೀತಿಯ ಕ್ಯಾಪ್‌ಗಳನ್ನು ಬಳಸಲು ಅಲ್ಲಿನ ಅಧಿಕಾರಿಗಳು ನಿರ್ಧರಿಸಿದ್ದಾರೆ. ಮೊದಲ ಹಂತದಲ್ಲಿ 50 ಕ್ಯಾಪ್‌ಗಳನ್ನು ಬಳಸಲು ತೀರ್ಮಾನಿಸಲಾಗಿದ್ದು, ಈಗಾಗಲೇ ಬೆಂಗಳೂರಿನಿಂದ ತರಿಸಿಕೊಳ್ಳುವ ವ್ಯವಸ್ಥೆ ಮಾಡಿಕೊಳ್ಳಲಾಗಿದೆ ಎನ್ನುತ್ತಾರೆ ಲಖನೌನ ಹಿರಿಯ ಪೊಲೀಸ್‌ ಅಧಿಕಾರಿಗಳು.

''ಲಖನೌ ಪೊಲೀಸರು ಬಳಸುತ್ತಿರುವ ಉಣ್ಣೆಯ ಕ್ಯಾಪ್‌ಗಳು ಬೇಸಿಗೆಯಲ್ಲಿ ಹೆಚ್ಚು ಶಾಖಕ್ಕೆ ಕಾರಣವಾಗುತ್ತಿವೆ. ಇದಕ್ಕೆ ಪರ್ಯಾಯ ಹ್ಯಾಟ್‌ಗಳ ಬಗ್ಗೆ ಆನ್‌ಲೈನ್‌ನಲ್ಲಿ ಹುಡುಕುತ್ತಿದ್ದಾಗ ಬೆಂಗಳೂರು ಪೊಲೀಸರು ಬಳಸುತ್ತಿರುವ ಹತ್ತಿಯಿಂದ ಮಾಡಲಾದ ಹ್ಯಾಟ್‌ಗಳ ಬಗ್ಗೆ ಗೊತ್ತಾಯಿತು. ಈ ಟೋಪಿಗಳು ಲಖನೌ ಪೊಲೀಸರಿಗೆ ಸೂಕ್ತವಾಗುತ್ತವೆ ಎಂದು ಭಾವಿಸಿ ಅವುಗಳನ್ನು ಬಳಸಲು ನಿರ್ಧರಿಸಲಾಗಿದೆ,'' ಎನ್ನುತ್ತಾರೆ ಅಧಿಕಾರಿಗಳು.

ಈಗಾಗಲೇ ಕೆಲವು ಪೊಲೀಸರು ಬೆಂಗಳೂರು ಮಾದರಿಯ ಹ್ಯಾಟ್‌ಗಳನ್ನು ಬಳಸುತ್ತಿದ್ದಾರೆ. ಈ ಹ್ಯಾಟ್‌ಗಳು ಹೆಚ್ಚು ಆಹ್ಲಾದಕರ ಅನುಭವ ನೀಡುತ್ತಿರುವುದರಿಂದ ಇನ್ನೂ 50 ಹ್ಯಾಟ್‌ಗಳನ್ನು ತರಿಸಿಕೊಳ್ಳಲಾಗುತ್ತಿದೆ.