ಜಾಗತಿಕ ಉದ್ಯಮ ಮೇಳ: ಪ್ರಧಾನಿ, ಇವಾಂಕಾ ಸ್ವಾಗತಕ್ಕೆ ಮೇಡ್‌ ಇನ್ ಇಂಡಿಯಾ 'ಮಿತ್ರ'

ಹೊಸದಿಲ್ಲಿ: ಹೈದರಾಬಾದ್‌ನಲ್ಲಿ ಇಂದು ಆರಂಭವಾಗುವ ಜಾಗತಿಕ ಉದ್ಯಮಶೀಲತಾ ಶೃಂಗಸಭೆ (ಗ್ಲೋಬಲ್‌ ಎಂಟರ್‌ಪ್ರನರ್‌ಶಿಪ್‌ ಸಮ್ಮಿಟ್‌-ಜಿಇಎಸ್‌)ಗೆ ಪ್ರಧಾನಿ ನರೇಂದ್ರ ಮೋದಿ ಮತ್ತು ಇವಾಂಕಾ ಟ್ರಂಪ್‌ ಅವರನ್ನು ಸ್ವಾಗತಿಸಲು ವಿಶೇಷ 'ಮಿತ್ರ'ರಿಬ್ಬರು ಸಜ್ಜಾಗಿದ್ದಾರೆ.

ಬೆಂಗಳೂರು ಮೂಲದ ಇನ್‌ವೆಂಟೋ ಅಭಿವೃದ್ಧಿಪಡಿಸಿದ ಸ್ವದೇಶಿ ರೋಬೋಗಳೇ ಈ ವಿಶೇಷ ಪ್ರತಿನಿಧಿಗಳು. ಬಾಲಾಜಿ ವಿಶ್ವನಾಥನ್‌ ಮತ್ತು 14 ಸದಸ್ಯರ ಅವರ ತಂಡ ಈ ರೋಬೋಗಳನ್ನು ಸಿದ್ಧಪಡಿಸಿದ್ದಾರೆ. ಒಂದು ರೋಬೋ ವೇದಿಕೆ (ಡಯಾಸ್‌) ಪಕ್ಕದಲ್ಲಿದ್ದದ್ದು ಅತಿಥಿಗಳ ಜತೆ ಸಂವಾದ ನಡೆಸಲಿದೆ. ಇನ್ನೊಂದು ರೋಬೋ ಪ್ರೇಕ್ಷಕರ ಜತೆ ಸಂವಾದ ನಡೆಸಲಿದೆ.

'ಮೇಡ್‌ ಇನ್‌ ಇಂಡಿಯಾ' ರೋಬೋವನ್ನು ಪ್ರದರ್ಶಿಸಲು ಜಿಇಎಸ್‌ ಉತ್ತಮ ವೇದಿಕೆ. ಅತಿ ಗಣ್ಯರು (ಹೈ ಪ್ರೊಫೈಲ್‌), ಬಿಗಿ ಭದ್ರತೆಯ ಕಾರಣದಿಂದ ಈ 'ಮಿತ್ರ' ಡಯಾಸ್‌ ಬಳಿ ನಿಂತಿರುತ್ತಾನೆ. ಪ್ರಧಾನಿ ಮೋದಿ ಮತ್ತು ಇವಾಂಕಾ ಟ್ರಂಪ್‌ ವೇದಿಕೆಗೆ ಬರುತ್ತಿದ್ದಂತೆ ಈ ರೋಬೋ 'ಮಿತ್ರ' ಅವರತ್ತ ಸಾಗಲಿದ್ದಾನೆ. ಅವರು ಒಂದು ಬಟನ್‌ ಒತ್ತಿದಾಗ ಶೃಂಗಸಭೆಯ ಉದ್ಘಾಟನೆಯ ಸಂಕೇತವಾಗಿ 'ಮಿತ್ರ' ಹಾಡಲು ಶುರು ಮಾಡುತ್ತಾನೆ' ಎಂದು ವಿಶ್ವನಾಥನ್‌ ತಿಳಿಸಿದರು.

ವಿವಿಧ ರೀತಿಯ 1000-1500 ಪದಗುಚ್ಛಗಳನ್ನು ಬಳಸಲು ಈ ರೋಬೋ ಮಿತ್ರನಿಗೆ ಕಲಿಸಲಾಗಿದೆ. ಎರಡನೆಯ ರೋಬೋ ಮುಖ್ಯ ವೇದಿಕೆಯಿಂದ ಹೊರಗಿದ್ದು, ಇತರರ ಜತೆ ಸಂವಾದಿಸಲಿದೆ. 'ಹೌ ಆರ್‌ ಯೂ' (ನೀವು ಹೇಗಿದ್ದೀರಾ?) ಎಂಬ ಪ್ರಶ್ನೆಯಿಂದ ಹಿಡಿದು 'ಎಲಾನ್‌ ಮಸ್ಕ್‌ (ದಕ್ಷಿಣ ಆಫ್ರಿಕಾದ ಖ್ಯಾತ ಉದ್ಯಮಿ, ಹೂಡಿಕೆದಾರ) ಬಗ್ಗೆ ಏನಂತೀರಿ?' ಎಂಬ ಗಂಭೀರ ಪ್ರಶ್ನೆಯನ್ನೂ ಈ ರೋಬೋ ಕೇಳಲಿದೆ.

ಫೈಬರ್‌ ಗ್ಲಾಸ್‌ನಿಂದ ನಿರ್ಮಿಸಲಾದ ಮಿತ್ರಾ-1 ಅನ್ನು ಇದುವರೆಗೆ ಹಲವು ಕಾರ್ಪೊರೇಟ್‌ ಮೇಳಗಳು ಮತ್ತು ಕೌಟುಂಬಿಕ ಕಾರ್ಯಕ್ರಮಗಳಲ್ಲಿ ನಿಯೋಜಿಸಲಾಗಿದೆ. ಇದಕ್ಕೆ ಬಳಸಲಾದ ಚಿಪ್‌ಗಳನ್ನು ಮಾತ್ರ ಆಮದು ಮಾಡಿಕೊಳ್ಳಲಾಗಿದ್ದು, ಉಳಿದೆಲ್ಲ ಭಾಗಗಳು ದೇಶೀಯವಾಗಿಯೇ ನಿರ್ಮಿತವಾಗಿವೆ.

'ಮಿತ್ರ ವೇದಿಕೆಯ ಸುತ್ತಮುತ್ತ ಓಡಾಡಲಿದ್ದು, ಮುಖಚಹರೆ ಮತ್ತು ಧ್ವನಿ ಗುರುತಿಸುವ ತಂತ್ರಜ್ಞಾನ ಹೊಂದಿದೆ. ಹೀಗಾಗಿ ತಾನು ಯಾರ ಜತೆ ಮಾತನಾಡುತ್ತಿದ್ದೇನೆ ಎಂಬುದೂ ಈತನಿಗೆ ತಿಳಿದಿರುತ್ತದೆ' ಎಂದು ವಿಶ್ವನಾಥನ್‌ ತಿಳಿಸಿದರು.