ಎರಡನೇ ಅತ್ಯುತ್ತಮ ಸಾಂಪ್ರದಾಯಿಕ ತಾಣ ಮಧುರೈ ಮೀನಾಕ್ಷಿ ದೇಗುಲ

ಮಧುರೈ: ತಮಿಳುನಾಡಿನ ಮಧುರೈನಲ್ಲಿರುವ ಮೀನಾಕ್ಷಿ ಸುಂದರೇಶ್ವರ ದೇವಾಲಯವು ದೇಶದಲ್ಲೇ 2ನೇ ಅತ್ಯತ್ತಮವಾಗಿ ನಿರ್ವಹಿಸಲ್ಪಡುವ ಸಾಂಪ್ರದಾಯಿಕ ಸ್ಥಳವಾಗಿ ಆಯ್ಕೆಯಾಗಿದೆ. ಜಮ್ಮು ಮತ್ತು ಕಾಶ್ಮೀರದ ವೈಷ್ಣೋದೇವಿ ದೇಗುಲವು ದೇಶದಲ್ಲೇ ಅತ್ಯತ್ತಮ ಸಾಂಪ್ರದಾಯ ತಾಣವಾಗಿ ಗುರುತಿಸಲ್ಪಟ್ಟಿದೆ.

'2019ರ ಸ್ವಚ್ಛ ಸಾಂಪ್ರದಾಯಿಕ ಕಾರ್ಯಕ್ರಮದಡಿ ಜಲ ಶಕ್ತಿ ಅಭಿಯಾನ ಸಚಿವಾಲಯವು ಮೀನಾಕ್ಷಿ ದೇವಾಲಯವನ್ನು ಅತ್ಯಂತ ಸ್ವಚ್ಛ ಸಾಂಪ್ರದಾಯಿಕ ತಾಣವಾಗಿ ಆಯ್ಕೆ ಮಾಡಿದೆ. ದೇವಾಲಯದ ಆವರಣವನ್ನು ಸ್ವಚ್ಛವಾಗಿ ಇಟ್ಟಿರುವುದಕ್ಕೆ ಮಧುರೈ ಪಾಲಿಕೆಗೂ ಪ್ರಶಸ್ತಿ ನೀಡಲಾಗಿದೆ. 2017ರಲ್ಲಿ ಈ ದೇವಾಲಯ ದೇಶದಲ್ಲೇ ಅತ್ಯುತ್ತಮ ಸಾಂಪ್ರದಾಯಿಕ ಸ್ಥಳವಾಗಿ ಆಯ್ಕೆಯಾಗಿತ್ತು.

ಜಲಶಕ್ತಿ ಮಂತ್ರಿ ಗಜೇಂದ್ರ ಸಿಂಗ್‌ ಶೆಖಾವತ್, ಹಾಗೂ ಜಲಶಕ್ತಿ ಅಭಿಯಾನದ ರಾಜ್ಯ ಮಂತ್ರಿ ಲಾಲ್ ಕಟಾರಿಯಾ ಅವರಿಂದ ಮಧುರೈ ಪಾಲಿಕೆಯ ಆಯುಕ್ತ ಎಸ್‌. ವಿಶಾಖನ್‌ ಇತ್ತೀಚೆಗೆ ಪ್ರಶಸ್ತಿ ಸ್ವೀಕರಿಸಿದರು.

ದೇವಾಲಯ ಮತ್ತು ದೇವಾಲಯದ ಆವರಣವನ್ನು ಖಾಸಗಿ ಮತ್ತು ಸಾರ್ವಜನಿಕ ಪಾಲುದಾರಿಕೆ ಕಂಪನಿಗಳ 'ಕಾಪೋರೇಟ್‌ ಸಾಮಾಜಿಕ ಹೊಣೆಗಾರಿಕೆ ನಿಧಿಯಿಂದ' (ಸಿಎಸ್‌ಆರ್‌) ನಿರ್ವಹಣೆ ಮಾಡಲಾಗಿದೆ. ದೇವಾಲಯವನ್ನು ಸ್ವಚ್ಛವಾಗಿಟ್ಟುಕೊಳ್ಳಲು ಪಾಲಿಕೆಯು ಇತ್ತೀಚಿನ ವರ್ಷಗಳಲ್ಲಿ ಹಲವಾರು ಕ್ರಮಗಳನ್ನು ಕೈಗೊಳ್ಳಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ದೇವಾಲಯದಲ್ಲಿ 25 ಇ-ಶೌಚಾಲಯಗಳು, ವಿಶೇ ಷ ಕಸದ ಬುಟ್ಟಿಗಳನ್ನು ಇರಿಸಲಾಗಿದೆ. ದೇವಾಲಯದ ಸುತ್ತ ಪ್ಲಾಸ್ಟಿಕ್‌ ಬಳಕೆಯನ್ನು ಕಡ್ಡಾಯವಾಗಿ ನಿಷೇಧಿಸಲಾಗಿದೆ. 15 ಕುಡಿಯುವ ನೀರಿನ ಶುದ್ಧೀಕರಣ ಘಟಕಗಳನ್ನು ಅನುಷ್ಠಾನಗೊಳಿಸಲಾಗಿದೆ. ದೇವಾಲಯದ ಆವರಣದಲ್ಲಿ ಭಕ್ತರ ಓಡಾಟಕ್ಕಾಗಿ 5 ಬ್ಯಾಟರಿ ಚಾಲಿತ ವಾಹನಗಳ ವ್ಯವಸ್ಥೆಯೂ ಇದೆ.

ದೇವಾಲಯ ಸ್ವಚ್ಛತಾ ಕಾರ್ಯಕ್ಕೆ ಬಳಸುವ ಸಲಕರಣೆಗಳು ಕೂಡ ಅತ್ಯಾಧುನಿಕವಾಗಿವೆ. ದೇವಾಲಯದ ಆವರಣದಲ್ಲಿ ಉಗುಳಿದರೆ ಐವತ್ತು ರುಪಾಯಿ ದಂಡ ವಿಧಿಸುವ ನಿಯಮವೂ ಜಾರಿಯಲ್ಲಿದೆ.