ನೆರೆ ರಾಜ್ಯಗಳಿಗೂ ವಿಸ್ತರಿಸಿದ ಮಧ್ಯಪ್ರದೇಶ ಬೃಹತ್ ಸೆಕ್ಸ್ ಹಗರಣ!

ಭೋಪಾಲ್‌: ಮಧ್ಯಪ್ರದೇಶದ ಅತಿ ದೊಡ್ಡ ಲೈಂಗಿಕ ಹಗರಣದ ಗಣಿ ಅಗೆದಷ್ಟೂ ಆಳಕ್ಕೆ ಇಳಿಯುತ್ತಲೇ ಇದ್ದು, ಗುರುವಾರ ಬೆಚ್ಚಿ ಬೀಳಿಸುವ ಮತ್ತಷ್ಟು ಮಾಹಿತಿಗಳು ಬಯಲಾಗಿವೆ.

ಹಗರಣಕ್ಕೆ ಸಂಬಂಧಿಸಿದ 1000ಕ್ಕೂ ಹೆಚ್ಚಿನ ವಿಡಿಯೊಗಳನ್ನು ಪರಿಶೀಲಿಸುತ್ತಿರುವ ವಿಶೇಷ ತನಿಖಾ ತಂಡ, ಈ ಹನಿಟ್ರ್ಯಾಪ್‌ ಜಾಲ ಮಧ್ಯಪ್ರದೇಶ ಮಾತ್ರವಲ್ಲದೇ ಛತ್ತೀಸ್‌ಗಢ ಮತ್ತು ಮಹಾರಾಷ್ಟ್ರಕ್ಕೂ ವಿಸ್ತರಿಸಿರುವುದನ್ನು ಪತ್ತೆ ಹಚ್ಚಿದೆ.

ದೇಶದ ಬೃಹತ್‌ ಸೆಕ್ಸ್‌ ಹಗರಣ ಬಯಲು

ವಿಐಪಿಗಳನ್ನು ಮಾತ್ರವಲ್ಲದೆ ಆಯಕಟ್ಟಿನ ಹುದ್ದೆಯಲ್ಲಿರುವ ಅಧಿಕಾರಿಗಳನ್ನು ಕೂಡ ವಂಚಕ ತಂಡ ಬಲೆಗೆ ಬೀಳಿಸಿದೆ. ಅದಕ್ಕಾಗಿ ಚೆಂದದ ಹುಡುಗಿಯರಿಗೆ ಹಣ, ಶಿಕ್ಷಣ ಮತ್ತು ಉದ್ಯೋಗದ ಆಮಿಷ ಒಡ್ಡಿ ದುರ್ಬಳಕೆ ಮಾಡಿಕೊಳ್ಳಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಮುಖ್ಯವಾಗಿ ರಾಜಕಾರಣಿಗಳನ್ನು ಗುರಿಯಾಗಿಸಿಕೊಂಡು ಈ ಗ್ಯಾಂಗ್‌ ಕಾರ್ಯಾಚರಿಸಿದೆ. ದೊಡ್ಡ ಅಧಿಕಾರಿಗಳು ಕೂಡ ಬಲೆಗೆ ಬಿದ್ದಿದ್ದಾರೆ. ಹಣದ ಜತೆಗೆ ಸರಕಾರದ ಪ್ರಮುಖ ಕಾಂಟ್ರಾಕ್ಟರ್‌ಗಳನ್ನು ಕೂಡ ಅಧಿಕಾರಿಗಳಿಂದ ಪಡೆಯಲಾಗಿದೆ. ಇದುವರೆಗೆ ಖೆಡ್ಡಕ್ಕೆ ಬಿದ್ದ ಅಂತಹ 50 ಗಣ್ಯ ಹಾಗೂ 13 ಅಧಿಕಾರಿಗಳನ್ನು ಗುರುತಿಸಲಾಗಿದೆ. ಆರು ಮಂದಿ ವಂಚಕರನ್ನು ಬಂಧಿಸಲಾಗಿದೆ.

ಗ್ಯಾಂಗ್‌ ಸದಸ್ಯರು ಲೈಂಗಿಕ ವಂಚನೆಯನ್ನೇ ಪೂರ್ಣ ಪ್ರಮಾಣದ ದಂಧೆ ಮಾಡಿಕೊಂಡು ನೂರಾರು ಕೋಟಿ ರೂ. ಮೌಲ್ಯದ ಸ್ಥಿರಚಾರಾಸ್ತಿ ಮಾಡಿದ್ದಾರೆ ಎಂದು ಎಸ್‌ಐಟಿ ತಿಳಿಸಿದೆ.