ಅನಧಿಕೃತ ಷರಿಯಾ ಕೋರ್ಟ್‌ಗಳಿಗೆ ಮದ್ರಾಸ್‌ ಹೈಕೋರ್ಟ್‌ ನಿಷೇಧ

ಚೆನ್ನೈ: ಮಸೀದಿಗಳ ಆವರಣಗಳಲ್ಲಿ ಕಾರ್ಯ ನಿರ್ವಹಿಸುತ್ತಿರುವ ಅನಧಿಕೃತ ಷರಿಯಾ ಕೋರ್ಟ್‌ಗಳನ್ನು ನಿಷೇಧಿಸಿ ಮದ್ರಾಸ್‌ ಹೈಕೋರ್ಟ್‌ ಆದೇಶ ಪ್ರಕಟಿಸಿದೆ.

ಧಾರ್ಮಿಕ ಸ್ಥಳಗಳು ಧಾರ್ಮಿಕ ಕಾರ್ಯಕ್ರಮಗಳಿಗಾಗಿ ಮಾತ್ರ ಇರಬೇಕು. ಷರಿಯಾ ಕೋರ್ಟ್‌ಗಳಾಗಿ ಕಾರ್ಯ ನಿರ್ವಹಿಸುವಂತಿಲ್ಲ. ಈ ವಿಚಾರದಲ್ಲಿ ರಾಜ್ಯ ಸರಕಾರವು ಒಂದು ತಿಂಗಳೊಳಗೆ ಸ್ಥಿತಿ-ಗತಿ ವರದಿ ಸಲ್ಲಿಸಬೇಕು ಎಂದು ಮುಖ್ಯನ್ಯಾಯಮೂರ್ತಿ ಸಂಜಯ್‌ ಕಿಷನ್‌ ಕೌಲ್‌ ಮತ್ತು ನ್ಯಾಯಮೂರ್ತಿ ಎಂ. ಸುಂದರ್‌ ಹೇಳಿದರು.

ಅಣ್ಣಾ ಸಲೈನಲ್ಲಿರುವ ಮಕ್ಕಾ ಮಸ್ಜಿದ್‌ ಷರಿಯತ್‌ ಕೌನ್ಸಿಲ್‌ ಮಸೀದಿ ಆವರಣದಲ್ಲಿ ದೈನಂದಿನ ಕೋರ್ಟ್‌ ರೀತಿ ಕಾರ್ಯನಿರ್ವಹಿಸುತ್ತಿದೆ. ಇಲ್ಲಿ ವೈವಾಹಿಕ ಬಿಕ್ಕಟ್ಟುಗಳ ಸಂಬಂಧ ನೋಟಿಸ್‌ ನೀಡಿಕೆ, ವಿಚ್ಛೇದನ ಆದೇಶ ಹೊರಡಿಸುವಿಕೆ ನಡೆಯುತ್ತಿದೆ ಎಂದು ಅನಿವಾಸಿ ಭಾರತೀಯ ಅಬ್ದುಲ್‌ ರೆಹಮಾನ್‌ ಅವರು ಸಾರ್ವಜನಿಕ ಹಿತಾಸಕ್ತಿ ಅರ್ಜಿ ದಾಖಲಿಸಿದ್ದರು. ಈ ಷರಿಯಾ ಕೋರ್ಟ್‌ಗಳಿಂದಾಗಿ ರಾಜ್ಯದಲ್ಲಿ ಬಹಳಷ್ಟು ಅಮಾಯಕ ಮುಸ್ಲಿಮರು ಸದ್ದಿಲ್ಲದೆ ನಲುಗುತ್ತಿದ್ದಾರೆ ಎಂದು ಅರ್ಜಿದಾರರ ಪರ ವಕೀಲ ಸಿರಾಜುದ್ದೀನ್‌ ಕೋರ್ಟ್‌ಗೆ ತಿಳಿಸಿದರು.

ಅರ್ಜಿದಾರ ಅಬ್ದುಲ್‌ ರೆಹಮಾನ್‌ ಅವರೂ ಈ ಷರಿಯಾ ಕೋರ್ಟ್‌ನ ಆದೇಶದ ಸಂತ್ರಸ್ತ. ಇವರಿಗೆ ಪತ್ನಿಯ ಜತೆ ಸೇರಬೇಕೆಂಬ ಇಷ್ಟವಿದ್ದರೂ ಷರಿಯಾ ಕೋರ್ಟ್‌ ತಲಾಖ್‌ ಪತ್ರಕ್ಕೆ ಸಹಿ ಮಾಡಿಸಿ ವಿಚ್ಛೇದನ ಆದೇಶ ನೀಡಿದೆ.

Madras high court bans unauthorised 'sharia courts: Unauthorised 'Sharia' courts functioning on mosque premises in Tamil Nadu cannot exist anymore, as the Madras high court has banned them.