ಮಹಾರಾಷ್ಟ್ರದ ವಿಶ್ವಾಸಮತ ಗೆದ್ದ ಸಿಎಂ ಉದ್ಧವ್‌ ಠಾಕ್ರೆ, ಬಿಜೆಪಿ ಸಭಾತ್ಯಾಗ

ಮುಂಬಯಿ: ಶಿವಸೇನೆ ಮುಖ್ಯಸ್ಥ ಉದ್ಧವ್‌ ಠಾಕ್ರೆ ನೇತೃತ್ವದ 'ಮಹಾ ವಿಕಾಸ ಅಘಾಡಿ' ಸರಕಾರ ವಿಶ್ವಾಸಮತ ಗೆಲ್ಲುವ ಮೂಲಕ ಅಧಿಕಾರವನ್ನು ಭದ್ರಪಡಿಸಿಕೊಂಡಿದೆ. ಬಿಜೆಪಿಯ ಎಲ್ಲ 105 ಶಾಸಕರು ಸಭಾತ್ಯಾಗ ಮಾಡುವ ಮೂಲಕ ವಿಶ್ವಾಸಮತ ಪ್ರಕ್ರಿಯೆಯಿಂದ ಹೊರಗುಳಿದರು. ಬಿಜೆಪಿ ಸದಸ್ಯರಿಲ್ಲದ ಅಧಿವೇಶನದಲ್ಲಿ ನಾಲ್ವರು ಮೈತ್ರಿ ಸರಕಾರ ವಿರುದ್ಧ ಮತ ಚಲಾಯಿಸಿದರು.

ಮಹಾರಾಷ್ಟ್ರ ವಿಧಾನಸಭೆಯಲ್ಲಿ ಶನಿವಾರ ಮಧ್ಯಾಹ್ಮದ ನಂತರ ನಡೆದ ವಿಶ್ವಾಸಮತ ಪರೀಕ್ಷೆ ಪ್ರಕ್ರಿಯೆಯಲ್ಲಿ ಉದ್ಧವ್‌ ಠಾಕ್ರೆ ಸರಕಾರದ ಪರ 169 ಶಾಸಕರು ಮತ ಹಾಕಿದರು. ಮೈತ್ರಿ ಸರಕಾರದ ವಿರುದ್ಧ ಯಾರೂ ಮತ ಚಲಾಯಿಸಿಲ್ಲ. ರಾಜ್‌ ಠಾಕ್ರೆ ಅವರ ಎಂಎನ್‌ಎಸ್‌ ಪಕ್ಷದ ಓರ್ವ ಶಾಸಕ ತಟಸ್ಥವಾಗಿ ಉಳಿದರು. ದೇವೇಂದ್ರ ಫಡ್ನವಿಸ್‌ ನೇತೃತ್ವದಲ್ಲಿ 105 ಸದಸ್ಯರು ಸಭಾತ್ಯಾಗ ಮಾಡಿದರು. ಸಂವಿಧಾನಕ್ಕೆ ವಿರುದ್ಧವಾಗಿ ವಿಶೇಷ ಅಧಿವೇಶನ ಕರೆಯಲಾಗಿದೆ, ಸಂವಿಧಾನಕ್ಕೆ ವಿರುದ್ಧವಾಗಿ ಮುಖ್ಯಮಂತ್ರಿ ಮತ್ತು ಸಚಿವರನ್ನು ಆಯ್ಕೆ ಮಾಡಲಾಗಿದೆ ಎಂದು ಬಿಜೆಪಿ ಆರೋಪಿಸಿದೆ.

ಉದ್ಧವ್‌ ಠಾಕ್ರೆ ಪದಗ್ರಹಣಕ್ಕೆ ಶಿವಾಜಿ ಕ್ರೀಡಾಂಗಣವೇ ಏಕೆ?

ದೇವೇಂದ್ರ ಫಡ್ನವಿಸ್‌ ಬಹುಮತ ಸಾಬೀತು ಪಡಿಸುವಲ್ಲಿ ವಿಫಲರಾಗುವ ಮೂಲಕ ಬಿಜೆಪಿ ಸರಕಾರ ಕೇವಲ 4 ದಿನಕ್ಕೆ ಬಿದ್ದು ಹೋಗಿತ್ತು. ನಂತರ ಶಿವಸೇನೆ, ಎನ್‌ಸಿಪಿ ಮತ್ತು ಕಾಂಗ್ರೆಸ್‌ ಒಗ್ಗಟ್ಟಾಗಿ ಸರಕಾರ ರಚಿಸಲು ಅವಕಾಶ ನೀಡುವಂತೆ ರಾಜ್ಯಪಾಲ ಭಗತ್‌ ಸಿಂಗ್‌ ಕೋಶ್ಯಾರಿ ಅವರಿಗೆ ಮನವಿ ಸಲ್ಲಿಸಿದ್ದರು. ತಮ್ಮ ಪರ 162 ಶಾಸಕರ ಬೆಂಬಲವಿರುವುದಾಗಿ ಹೇಳಿದ್ದರು. ಅದರಂತೆ ಮೈತ್ರಿ ಸರಕಾರ ರಚನೆಗೆ ಅವಕಾಶ ನೀಡಿದ್ದರು. ಮುಖ್ಯಮಂತ್ರಿ ಉದ್ಧವ್‌ ಠಾಕ್ರೆಗೆ ಡಿಸೆಂಬರ್‌ 3ರ ಒಳಗೆ ಬಹುಮತ ಸಾಬೀತು ಪಡಿಸುವಂತೆ ತಿಳಿಸಿದ್ದರು.

ರೈತರ ಸಾಲಮನ್ನಾ, ಉದ್ಯೋಗ, 10 ರೂ.ಗೆ ಆಹಾರ : 'ಮಹಾ' ಜನತೆಗೆ ಠಾಕ್ರೆ ಕೊಡುಗೆ