ಮಹಿಳೆ ಗುಪ್ತಾಂಗದಿಂದ ಕೊರೊನಾ ಟೆಸ್ಟ್‌ಗೆ ಸ್ಯಾಂಪಲ್‌ ಪಡೆದ ಟೆಕ್ನಿಷಿಯನ್‌!

ಮುಂಬಯಿ: ಕೋವಿಡ್‌-19 ಪರೀಕ್ಷೆಗೆ ಸ್ಯಾಂಪಲ್‌ ಸಂಗ್ರಹ ಮಾಡುವುದಾಗಿ ಹೇಳಿ ಮಹಿಳೆಯೊಬ್ಬರ ಗುಪ್ತಾಂಗದಿಂದ ದ್ರಾವಣ ಸಂಗ್ರಹ ಮಾಡಿದ ಲ್ಯಾಬ್‌ ತಂತ್ರಜ್ಞನನ್ನು ಮಹಾರಾಷ್ಟ್ರ ಪೊಲೀಸರು ಅತ್ಯಾಚಾರ ಪ್ರಕರಣದ ಆರೋಪದಡಿ ಬಂಧಿಸಿದ್ದಾರೆ.

ಗಂಟಲಿನ ದ್ರಾವಣ ಪಡೆದ ಬಳಿಕ ಜನಾನಾಂಗದಿಂದಲೂ ಪಡೆಯಬೇಕಾಗಿದೆ ಎಂದು ಆರೋಪಿ ಟೆಕ್ನಿಷಿಯನ್‌ ಮಹಿಳೆಗೆ ಯಾಮಾರಿಸಿದ್ದ.

ಘಟನೆ ಬಗ್ಗೆ ಮಹಾರಾಷ್ಟ್ರದ ಮಹಿಳಾ ಹಾಗೂ ಮಕ್ಕಳ ಕಲ್ಯಾಣ ಸಚಿವೆ ಯಶೋಮತಿ ಠಾಕೂರ್‌ ಆಘಾತ ವ್ಯಕ್ತಪಡಿಸಿದ್ದಾರೆ.

ದೂರುದಾರ ಮಹಿಳೆ ಅಮರಾವತಿಯ ಮಾಲ್‌ ಒಂದರಲ್ಲಿಕೆಲಸ ಮಾಡುತ್ತಿದ್ದು, ಅವರ ಸಹೋದ್ಯೋಗಿಯೊಬ್ಬರಿಗೆ ಕೋವಿಡ್‌-19 ದೃಢಪಟ್ಟಿತ್ತು. ಹೀಗಾಗಿ ಉಳಿದ 20ರಿಂದ 25 ಸಿಬ್ಬಂದಿ ಕೊರೊನಾ ಪರೀಕ್ಷೆಗೆ ಒಳಪಡಲು ಪ್ರಯೋಗಾಲಯಕ್ಕೆ ತೆರಳಿದ್ದರು.

ಈ ವೇಳೆ ಎಲ್ಲರಿಂದಲೂ ಮೂಗಿನ ದ್ರಾವಣ ಪಡೆದ ಆರೋಪಿ ಟೆಕ್ನಿಷಿಯನ್‌, ಮಹಿಳೆ ಬಳಿ ಜನನಾಂಗದಿಂದಲೂ ದ್ರಾವಣ ಪಡೆಯಬೇಕಾಗಿದೆ ಎಂದು ನಂಬಿಸಿ ಕೃತ್ಯ ಎಸಗಿದ್ದ.

ಮನೆಗೆ ಮರಳಿದ ಮಹಿಳೆಗೆ ತಾನು ಮೋಸ ಹೋಗಿರುವುದು ಗೊತ್ತಾಗಿದ್ದು, ಪೊಲೀಸರಿಗೆ ದೂರು ನೀಡಿದ್ದಾರೆ. ಅದರಂತೆ ಬದ್ನೇರಾ ಠಾಣೆಯ ಪೊಲೀಸರು ಆರೋಪಿಯನ್ನು ಬಂಧಿಸಿದ್ದಾರೆ.