ಮಲ್ಯ ಪಾಸ್‌ಪೋರ್ಟ್‌ ರದ್ದತಿಗೆ ಇಡಿ ಮನವಿ

ಹೊಸದಿಲ್ಲಿ: ಹಲವಾರು ಬಾರಿ ಸಮನ್ಸ್‌ ನೀಡಿದ್ದರೂ, ವಿಚಾರಣೆಗೆ ಹಾಜರಾಗಲು ವಿಫಲರಾಗಿರುವ ಮದ್ಯದ ದೊರೆ, ಸುಸ್ತಿದಾರ ವಿಜಯ್‌ ಮಲ್ಯ ಅವರ ಪಾಸ್‌ಪೋರ್ಟ್‌ ರದ್ದು ಪಡಿಸುವಂತೆ ದಿಲ್ಲಿ ಪ್ರಾಂತೀಯ ಪಾಸ್‌ಪೋರ್ಟ್‌ ಕಚೇರಿಗೆ ಜಾರಿ ನಿರ್ದೇಶನಾಲಯ ಬುಧವಾರ ಸೂಚಿಸಿದೆ. ಇದರೊಂದಿಗೆ ಅವರು ಮುಂದಿನ ದಿನಗಳಲ್ಲಿ ವಿಚಾರಣೆ ಎದುರಿಸಲೇಬೇಕಾದ ಅನಿವಾರ್ಯತೆ ಸೃಷ್ಟಿಯಾಗಲಿದೆ.

ಐಡಿಬಿಐ ಬ್ಯಾಂಕ್‌ನಲ್ಲಿ 900 ಕೋಟಿ ರೂ. ಸಾಲಪಡೆದಿರುವ ಮಲ್ಯ, ಅದನ್ನು ಮರುಪಾವತಿಸುವಲ್ಲಿ ವಿಫಲರಾಗಿದ್ದಾರೆ. ಈ ಸಂಬಂಧ ವಿಚಾರಣೆಗೆ ಹಾಜರಾಗುವಂತೆ ಮೂರು ಸಲ ಸಮನ್ಸ್‌ ನೀಡಿದ್ದರೂ ಹಾಜರಾಗಿರಲಿಲ್ಲ. ತನಿಖೆಗೆ ಅಸಹಾಕಾರ ತೋರುತ್ತಿರುವ ರಾಜ್ಯಸಭೆ ಸದಸ್ಯರೂ ಆಗಿರುವ ಮಲ್ಯ ಅವರ ರಾಜತಾಂತ್ರಿಕ ಪಾಸ್‌ಪೋರ್ಟ್‌ಅನ್ನು ‘1967ರ ಪಾಸ್‌ಪೋರ್ಟ್‌ ಕಾಯಿದೆ’ಯಡಿ ರದ್ದುಪಡಿಸುವಲ್ಲಿ ಕ್ರಮ ಕೈಗೊಳ್ಳುವಂತೆ ವಿದೇಶಾಂಗ ಸಚಿವಾಲಯಕ್ಕೆ ಜಾರಿ ನಿರ್ದೇಶನಾಲಯ ವಿವರವಾದ ಪತ್ರ ಬರೆದಿದೆ. ಸುಸ್ತಿದಾರರಾಗಿ ಬಂಧನ ಭೀತಿ ಎದುರಿಸುತ್ತಿದ್ದ ಮಲ್ಯ ಕಳೆದ ಮಾರ್ಚ್ 2ರಂದು ಬ್ರಿಟನ್‌ಗೆ ಹಾರಿದ್ದರು.