ಭಾರತದಲ್ಲಿ ಅಪೌಷ್ಟಿಕತೆ ಪ್ರಮಾಣ ಭಾರಿ ಇಳಿಕೆ, ಯುವಜನರಲ್ಲಿ ಬೊಜ್ಜಿನ ಸಮಸ್ಯೆ ಏರಿಕೆ

ನ್ಯೂಯಾರ್ಕ್‌: ಭಾರತದಲ್ಲಿ ಅಪೌಷ್ಟಿಕತೆಯಿಂದ ಬಳಲುವವರ ಸಂಖ್ಯೆ ಗಣನೀಯ ಇಳಿಮುಖವಾಗಿದೆ. ಇದೇ ವೇಳೆ ಬೊಜ್ಜಿನ ಸಮಸ್ಯೆ ಯುವ ಜನರಲ್ಲಿ ಭಾರಿ ಏರಿಕೆಯಾಗಿದೆ. ವಿಶ್ವಸಂಸ್ಥೆ ಬಿಡುಗಡೆ ಮಾಡಿರುವ ಜಾಗತಿಕ ಆಹಾರ ಭದ್ರತೆ ಹಾಗೂ ಪೋಷಣೆ ಕುರಿತ ವರದಿಯಲ್ಲಿ ಈ ಸಂಗತಿಗಳನ್ನು ಪ್ರಸ್ತಾಪಿಸಲಾಗಿದೆ.

ಕಳೆದ 15 ವರ್ಷಗಳಲ್ಲಿ 6 ಕೋಟಿ ಭಾರತೀಯರು ಅಪೌಷ್ಟಿಕತೆಯ ತೊಂದರೆಯಿಂದ ಹೊರಬಂದಿದ್ದಾರೆ ಎಂದು ವಿಶ್ವಸಂಸ್ಥೆ ಹೇಳಿದೆ. 2004-06ರ ಅವಧಿಯಲ್ಲಿ 24.9 ಕೋಟಿ ಭಾರತೀಯರು (ಶೇ.21.7) ಅಪೌಷ್ಟಿಕತೆಯಿಂದ ಬಳಲುತ್ತಿದ್ದರೆ, 2017-19ರ ಅವಧಿಯಲ್ಲಿ ಅಂತಹವರ ಸಂಖ್ಯೆ 18.9 ಕೋಟಿಗೆ (ಶೇ.14) ಇಳಿಕೆಯಾಗಿದೆ ಎಂದು ವಿಶ್ವ ಸಂಸ್ಥೆ ಹೇಳಿದೆ.

ಈ ಸಮೀಕ್ಷೆಯ ವರದಿಯು ಜಾಗತಿಕ ಮಟ್ಟದಲ್ಲಿ ಆಹಾರ ಭದ್ರತೆ ಹಾಗೂ ಅಪೌಷ್ಟಿಕತೆಯ ಕುರಿತು ನಡೆಸುವ ವಿಶ್ವಾಸಾರ್ಹ ವರದಿಯಾಗಿದೆ. 2012ರಿಂದ 2017ರ ಅವಧಿಯಲ್ಲಿ ಭಾರತದಲ್ಲಿಅಪೌಷ್ಟಿಕತೆಯ ಪ್ರಮಾಣ ಭಾರೀ ಕಡಿಮೆಯಾಗಿದ್ದು, 6.2 ಕೋಟಿಯಿಂದ 4.3 ಕೋಟಿಗೆ ಇಳಿಕೆಯಾಗಿದೆ. ಜಾಗತಿಕವಾಗಿ 2019ರಲ್ಲಿ 69 ಕೋಟಿ ಮಂದಿ ಹಸಿವಿನಿಂದ ಬಳಲುತ್ತಿದ್ದು, 2018ಕ್ಕಿಂತ 10 ಕೋಟಿ ಜಾಸ್ತಿಯಾಗಿದೆ ಎಂದು ವಿಶ್ವಸಂಸ್ಥೆ ಅಭಿಪ್ರಾಯಪಟ್ಟಿದೆ.

ಆದರೆ, 2012ರಿಂದ 2016ರ ನಡುವೆ ಹದಿಹರೆಯದ ಮಕ್ಕಳ ಬೊಜ್ಜಿನ ಪ್ರಮಾಣ ಜಾಸ್ತಿಯಾಗಿದೆ. 2012ರಲ್ಲಿ 2.5 ಕೋಟಿ ಮಂದಿ ಬೊಜ್ಜಿನ ಸಮಸ್ಯೆಗೆ ಒಳಗಾಗಿದ್ದರೆ, 2016ರಲ್ಲಿ 3.4 ಕೋಟಿ ಮಂದಿ ಬೊಜ್ಜಿನ ತೊಂದರೆ ಅನುಭವಿಸುತ್ತಿದ್ದಾರೆ.