ಬಿಜೆಪಿ ಕಚೇರಿಯ ಬಾಗಿಲು ಒಡೆದು ಟಿಎಂಸಿ ಚಿಹ್ನೆ ಬಳಿದ ಮಮತಾ!

ಕೋಲ್ಕೊತಾ: ಸಿಎಂ ಮಮತಾ ಬ್ಯಾನರ್ಜಿ ಮತ್ತವರ ಬೆಂಬಲಿಗರು ಉತ್ತರ 24 ಪರಗಣ ಜಿಲ್ಲೆಯ ನೈಹಾತಿ ಪ್ರದೇಶದಲ್ಲಿರುವ ಬಿಜೆಪಿ ಕಚೇರಿ ಬಾಗಿಲು ಒಡೆದು ಒಳಪ್ರವೇಶಿಸಿ, ಅಲ್ಲಿಯ ಗೋಡೆಗಳ ಮೇಲೆ ಟಿಎಂಸಿಯ ಚಿಹ್ನೆಯ ಬಣ್ಣ ಬಳಿದಿದ್ದಾರೆ.

ಮೇ 30ರಂದು ಇದು ನಡೆದಿದ್ದು, ಲೋಕಸಭೆ ಚುನಾವಣೆ ಮುಗಿದರೂ ಪಶ್ಚಿಮ ಬಂಗಾಳದಲ್ಲಿ ಬಿಜೆಪಿ ಹಾಗೂ ತೃಣಮೂಲ ಕಾಂಗ್ರೆಸ್‌ ನಡುವೆ ಜಿದ್ದಾಜಿದ್ದಿ ಸದ್ಯಕ್ಕೆ ನಿಲ್ಲುವುದಿಲ್ಲ ಎನ್ನುವುದನ್ನು ತೋರಿಸಿಕೊಟ್ಟಿದೆ. ಪ್ರಧಾನಿ ಮೋದಿ ಅವರು ಪ್ರಮಾಣ ವಚನ ಸ್ವೀಕರಿಸಿದ ದಿನವೇ ಬಿಜೆಪಿ ಕಾಯಕರ್ತರು ದೌರ್ಜನ್ಯ ಎಸಗುತ್ತಿದ್ದಾರೆ ಎಂದು ಆರೋಪಿಸಿ ನೈಹಾತಿಯಲ್ಲಿ ಮಮತಾ ಬ್ಯಾನರ್ಜಿ ಪ್ರತಿಭಟನೆ ನಡೆಸಿದ್ದರು. ಪ್ರತಿಭಟನೆ ಬಳಿಕ ಬಿಜೆಪಿ ಕಚೇರಿಯ ಬಾಗಿಲು ಒಡೆದು ಅಲ್ಲಿ ತಮ್ಮ ಪಕ್ಷದ ಚಿಹ್ನೆಯ ಬಣ್ಣ ಬಳಿದಿದ್ದಾರೆ.

''ಇದು ನಮ್ಮ ಪಕ್ಷದ ಕಚೇರಿ. ಆದರೆ ಬಿಜೆಪಿ ಸಂಸದ ಅರ್ಜುನ್‌ ಸಿಂಗ್‌ ಮತ್ತವರ ಬೆಂಬಲಿಗರು ಬಲವಂತದಿಂದ ವಶಪಡಿಸಿಕೊಂಡಿದ್ದಾರೆ,'' ಎಂದು ಟಿಎಂಸಿ ದೂರಿದೆ. ಬಿಜೆಪಿಯು ಇದು ತನ್ನ ಪಕ್ಷದ ಕಚೇರಿ ಎಂದು ಹೇಳಿಕೊಂಡಿದೆ. ಈ ನಡುವೆ, ರಾಜ್ಯದಲ್ಲಿನ ತಮ್ಮ ಪಕ್ಷದ ಕಚೇರಿಗಳನ್ನು ಬಲವಂತದಿಂದ ವಶಪಡಿಸಿಕೊಳ್ಳಲಾಗುತ್ತಿದೆ ಎಂದು ಉಭಯ ಪಕ್ಷಗಳೂ ಪರಸ್ಪರ ಆರೋಪ-ಪ್ರತ್ಯಾರೋಪದಲ್ಲಿ ತೊಡಗಿವೆ.