'ಎ ಪ್ಲಸ್‌' ಗ್ರೇಡ್‌ ಬರದಿದ್ದಕ್ಕೆ ಗುದ್ದಲಿಯಿಂದ ಮಗನಿಗೆ ಹೊಡೆದ ತಂದೆ: ಪೊಲೀಸರಿಂದ ವ್ಯಕ್ತಿ ಬಂಧನ

ತಿರುವನಂತಪುರ: ಕೇರಳದ ಎಸ್‌ಎಸ್‌ಎಲ್‌ಸಿ ಪರೀಕ್ಷೆ ಫಲಿತಾಂಶದಲ್ಲಿ ಎಲ್ಲ ವಿಷಯಗಳಲ್ಲೂ 'ಎ ಪ್ಲಸ್‌' ಗ್ರೇಡ್‌ ತೆಗೆದುಕೊಳ್ಳಲು ವಿಫಲನಾದ ಮಗನ ಮೇಲೆ ತಂದೆ ಹಲ್ಲೆ ಮಾಡಿದ್ದಾರೆ.

ಗುದ್ದಲಿಯ ಮರದ ಹಿಡಿಯಿಂದ ಮಗನ ಮೇಲೆ ಫಲಿತಾಂಶ ಬಂದ ಕೆಲವೇ ಗಂಟೆಗಳ ಬಳಿಕ ಮೇ 6, 2019 ರಂದು ತಂದೆ ಹಲ್ಲೆ ನಡೆಸಿದ್ದಾರೆ ಎಂದು ತಿಳಿದುಬಂದಿದೆ. ಈ ಹಿನ್ನೆಲೆ ಕೇರಳ ಪೊಲೀಸರು ಮೇ 7, 2019 ರಂದು ಆ ವ್ಯಕ್ತಿಯನ್ನು ಬಂಧಿಸಿದ್ದಾರೆ. ಘಟನೆ ಸಂಬಂಧ 43 ವರ್ಷದ ವ್ಯಕ್ತಿ ಸಾಬು ಎಂಬ ದಿನಗೂಲಿ ಕಾರ್ಮಿಕನ ವಿರುದ್ಧ ಕೇಸ್‌ ದಾಖಲಾಗಿದೆ.

ತನ್ನ ಪುತ್ರನ ಕಾಲಿಗೆ ಹೊಡೆದಿದ್ದಾರೆ ಎಂದು ಪುತ್ರ ಹಾಗೂ ತಾಯಿ ಪೊಲೀಸ್‌ ಠಾಣೆಗೆ ಹೋಗಿ ತಂದೆ ವಿರುದ್ಧ ದೂರು ನೀಡಿದ್ದರು. ನಂತರ ಪೊಲೀಸರು ಆತನನ್ನು ಬಂಧಿಸಿ ಸ್ಥಳೀಯ ಕೋರ್ಟ್‌ಗೆ ಹಾಜರುಪಡಿಸಿದ್ದು 14 ದಿನಗಳ ನ್ಯಾಯಾಂಗ ಬಂಧನಕ್ಕೆ ಕೋರ್ಟ್ ಆದೇಶಿಸಿದೆ. ಒಟ್ಟು 10 ವಿಷಯಗಳಲ್ಲಿ 6 ವಿಷಯಗಳಲ್ಲಿ ಬಾಲಕ 'ಎ ಪ್ಲಸ್‌' ಗ್ರೇಡ್ ಪಡೆದುಕೊಂಡಿದ್ದಾನೆ. ಆದರೆ, ತನ್ನ ಪುತ್ರ ಎಲ್ಲಾ ವಿಷಯಗಳಲ್ಲೂ ಟಾಪರ್‌ ಆಗಲಿದ್ದಾನೆ ಎಂದು ತಂದೆ ಎಣಿಸಿದ್ದರು ಎಂದು ತಿಳಿದುಬಂದಿದೆ.

ಮೇ 6,2019 ರಂದು ಕೇರಳ ಎಸ್‌ಎಸ್‌ಎಲ್‌ಸಿ ಪರೀಕ್ಷೆಯ ಫಲಿತಾಂಶ ಪ್ರಕಟವಾಗಿತ್ತು.