ಅತ್ಯುತ್ತಮ ಚಾಲಕ ಪ್ರಶಸ್ತಿ ಪುರಸ್ಕೃತನಿಂದಲೇ ಅಪಘಾತ

ಹೈದರಾಬಾದ್‌: ರಸ್ತೆ ಅಪಘಾತದಲ್ಲಿ 58 ಜನರನ್ನು ಬಲಿಪಡೆದ ತೆಲಂಗಾಣದ ಟಿಎಸ್‌ಆರ್‌ಟಿಸಿ ಬಸ್‌ನ ಚಾಲಕ ಕಳೆದ ತಿಂಗಳಷ್ಟೇ 'ಅತ್ಯುತ್ತಮ ಚಾಲಕ' ಪ್ರಶಸ್ತಿಗೆ ಭಾಜನನಾಗಿದ್ದ ಎಂಬ ಅಚ್ಚರಿಯ ಸುದ್ದಿ ಬಹಿರಂಗವಾಗಿದೆ.

'ಅತ್ಯುತ್ತಮ ಚಾಲಕ' ಪ್ರಶಸ್ತಿ ಮಾತ್ರವಲ್ಲದೇ ಈ ಹಿಂದೆ ಅತ್ಯುತ್ತಮ ಇಂಧನ ಸಾಮರ್ಥ್ಯ‌ಕ್ಕಾಗಿ ಬಹುಮಾನವನ್ನು ಸಹ ಈ ಚಾಲಕ ಪಡೆದಿದ್ದ.

ಹೈದರಾಬಾದ್‌ನಿಂದ 200 ಕಿ.ಮೀ. ದೂರದ ಶನಿವಾರಪೇಟೆ ಗ್ರಾಮದ ಘಾಟ್‌ ರಸ್ತೆಯಲ್ಲಿ ಮಂಗಳವಾರ ನಡೆದ ಅಪಫಾತದಲ್ಲಿ 37 ಮಹಿಳೆಯರು, ಐವರು ಮಕ್ಕಳು ಸೇರಿದಂತೆ 57 ಮಂದಿ ಮೃತಪಟ್ಟು, 28 ಮಂದಿ ಗಾಯಗೊಂಡಿದ್ದರು. ತೀವ್ರವಾಗಿ ಗಾಯಗೊಂಡ ಮಹಿಳೆಯೊಬ್ಬರು ಬುಧವಾರ ಮೃತಪಟ್ಟಿದ್ದು, ಈ ಮೂಲಕ ಮೃತಪಟ್ಟವರ ಸಂಖ್ಯೆ 58ಕ್ಕೆ ಏರಿಕೆಯಾಗಿದೆ.

54 ಆಸನಗಳ ಈ ಬಸ್‌ನಲ್ಲಿ ಸುಮಾರು 90 ಮಂದಿ ಪ್ರಯಾಣಿಸುತ್ತಿದ್ದರು. ಘಾಟ್‌ ರಸ್ತೆಯಲ್ಲಿ ಮುಂದಿನಿಂದ ಬರುತ್ತಿದ್ದ ವಾಹನದೊಂದಿಗಿನ ಘರ್ಷಣೆ ಅಥವಾ ಪಕ್ಕದಲ್ಲಿ ಇದ್ದ ಆಳದ ಕಮರಿ ತಪ್ಪಿಸಲು ಹೋಗಿ, ಚಾಲಕನ ನಿಯಂತ್ರಣ ತಪ್ಪಿ ಅಪಘಾತ ಸಂಭವಿಸಿರಬಹುದು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.