ಗುಂಡೇಟಿನ 10 ದಿನದ ಬಳಿಕ ಬುಲೆಟ್ ಜತೆಗೇ ಆಸ್ಪತ್ರೆಗೆ ಬಂದ!

ಚೆನ್ನೈ: ದೇಹಕ್ಕೆ ಗುಂಡು ತಗುಲಿದರೆ ಆ ನೋವನ್ನು ಸಹಿಸಿಕೊಳ್ಳಲು ಸಾಧ್ಯವೇ? ಈ ವ್ಯಕ್ತಿಯ ಮಟ್ಟಿಗೆ ಅದು ಸಾಧ್ಯ ಎಂದು ಸಾಬೀತಾಗಿದೆ.ಹೌದು, ರೌಡಿ ಶೀಟರ್‌ನೊಬ್ಬ ಗುಂಡು ತಗುಲಿದ 10 ದಿನಗಳ ಬಳಿಕ ಆಸ್ಪತ್ರೆಗೆ ದಾಖಲಾದ ಘಟನೆ ತಮಿಳುನಾಡಿನಲ್ಲಿ ಬೆಳಕಿಗೆ ಬಂದಿದೆ.

ಇಬ್ಬರು ರೌಡಿ ಶೀಟರ್‌ಗಳ ನಡುವೆ ಜೂನ್ 8ರಂದು ಗಲಾಟೆಯಾಗಿತ್ತು. ಈ ಸಂದರ್ಭದಲ್ಲಿ ಎನ್ನೋರ್‌ನ ಡಿ ಸೆಂಥಿಲ್ ಅಲಿಯಾಸ್ ಸುಡುಸೋರು ಸೆಂಥಿಲ್ ಎಂಬಾತನ ಹೊಟ್ಟೆಗೆ ಗುಂಡು ಹೊಕ್ಕಿತ್ತು. ಘಟನೆ ನಡೆದ 10ದಿನಗಳವರೆಗೆ ದೇಹದಲ್ಲಿ ಗುಂಡಿದ್ದರೂ ಆಸ್ಪತ್ರೆಗೆ ಹೋಗದ ಆತ ಮಂಗಳವಾರ ಆಸ್ಪತ್ರೆಗೆ ದಾಖಲಾಗಿದ್ದಾನೆ.

ಸ್ಟೆನ್ಲಿ ಸರಕಾರಿ ಆಸ್ಪತ್ರೆಗೆ ದಾಖಲಾಗಿರುವ ಆತನಿಗೆ ಚಿಕಿತ್ಸೆ ನೀಡಲಾಗಿದ್ದು, ಗುಂಡು ತೆಗೆದ ವೈದ್ಯರು ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ. ಬಳಿಕವಷ್ಟೇ ಪೊಲೀಸರಿಗೆ ಗಲಾಟೆ ನಡೆದ ಬಗ್ಗೆ ಮಾಹಿತಿ ದೊರಕಿದ್ದು ಆರೋಪಿಗಳಾದ ಜೆ. ಅಲೆಕ್ಸಾಂಡರ್ (32) ಮತ್ತು ಪಿ ಟಿ ರಮೇಶ್ (33) ಅವರನ್ನು ಬಂಧಿಸಲಾಯ್ತು.

ಮಾತಿಗೆ ಮಾತು ಬೆಳೆದು ರಮೇಶ್, ಸೆಂಥಿಲ್ ಮೇಲೆ ಗುಂಡು ಹಾರಿಸಿದ್ದ ಎಂದು ತಿಳಿದುಬಂದಿದೆ. ಆತ ಪೊಲೀಸರಲ್ಲಿ ದೂರು ನೀಡಿದರೆ ಪರಿಣಾಮ ನೆಟ್ಟಗಿರುವುದಿಲ್ಲ ಎಂದು ಬೆದರಿಸಿದ್ದರಿಂದ ಸೆಂಥಿಲ್ ಆಸ್ಪತ್ರೆಗೆ ಸಹ ಹೋಗದೆ ನೋವು ನುಂಗಿಕೊಂಡು ಮನೆಯಲ್ಲಿದ್ದ ಎಂದು ತಿಳಿದುಬಂದಿದೆ.