ಮದ್ಯ ತರಲು ತಡವಾಗಿದ್ದಕ್ಕೆ ಪತ್ನಿ ಹತ್ಯೆ

ಥಾಣೆ: ಸರಾಯಿ ತರಲು ತಡವಾಗಿದ್ದಕ್ಕೆ ಪತಿ ಮಹಾಶಯನೊಬ್ಬ ಪತ್ನಿಯನ್ನು ಕೊಂದ ಘಟನೆ ಮಹಾರಾಷ್ಟ್ರದಲ್ಲಿ ನಡೆದಿದೆ.

ಥಾಣೆ ಜಿಲ್ಲೆಯ ಮುಂಬ್ರಾದಲ್ಲಿ ಈ ದುಷ್ಕೃತ್ಯ ನಡೆದಿದ್ದು, 30 ವರ್ಷದ ಆರೋಪಿ ಪ್ರವೀಣ ಪೂರ್ವಿಯಾನನ್ನು ಬಂಧಿಸಲಾಗಿದೆ.

ಗುರುವಾರ ಮಧ್ಯಾಹ್ನ ಪೂರ್ವಿಯಾ, ತನ್ನ ಪತ್ನಿ ಸಂತೋಷಿ (25) ಬಳಿ ಮದ್ಯ ತರುವಂತೆ ಹೇಳಿದ್ದಾನೆ.

ಅದರಂತೆ ಮದ್ಯ ತರಲು ಬಾರ್‌ಗೆ ಹೋಗಿದ್ದ ಆಕೆ ಬರಲು ಸ್ವಲ್ಪ ವಿಳಂಬವಾಗಿದೆ. ಇದರಿಂದ ಸಿಟ್ಟಿಗೆದ್ದ ಆತ ಮನಬಂದಂತೆ ಥಳಿಸಿ ಆಕೆಯನ್ನು ಹತ್ಯೆಗೈದಿದ್ದಾನೆ. ಸ್ಥಳದಲ್ಲೇ ಕುಸಿದು ಬಿದ್ದು ಆಕೆ ಸಾವನ್ನಪ್ಪಿದ್ದಾಳೆ ಎಂದು ತಿಳಿದುಬಂದಿದೆ.

ಶುಕ್ರವಾರ ಮುಂಜಾನೆ ಆರೋಪಿಯನ್ನು ಬಂಧಿಸಲಾಗಿದ್ದು ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.

ಇತ್ತೀಚಿಗೆ ಮಹಾರಾಷ್ಟ್ರದ ಸೋಲಾಪುರದಲ್ಲಿ ಕ್ರೂರ ಪತಿಯೊಬ್ಬ 19 ವರ್ಷದ ಪತ್ನಿಯನ್ನು ವರದಕ್ಷಿಣೆಗಾಗಿ ಥಳಿಸಿ ಕೊಂದು ಹಾಕಿದ್ದ.