ವರದಕ್ಷಿಣೆಗಾಗಿ ವಿವಾಹ ನಿರಾಕರಿಸಿದ ವರನ ತಲೆ ಬೋಳಿಸಿದರು!

ಲಖನೌ: ವರದಕ್ಷಿಣೆಯಾಗಿ ಬೈಕ್ ಹಾಗೂ ಬಂಗಾರ ನೀಡಲಿಲ್ಲವೆಂದು ವಿವಾಹ ನಿರಾಕರಿಸಿದ ಕಾರಣ ಆಕ್ರೋಶಗೊಂಡ ವಧುವಿನ ಕಡೆಯವರು ವರನನ್ನು ಕಟ್ಟಿಹಾಕಿ ತಲೆ ಬೋಳಿಸಿರುವ ಘಟನೆ ಇಲ್ಲಿನ ಇಂದಿರಾ ನಗರದ ಕಲ್ಯಾಣ ಮಂಟಪದಲ್ಲಿ ನಡೆದಿದೆ.

ವಿವಾಹವಾಗಿ ನೆಮ್ಮದಿಯ ಜೀವನ ಸಾಗಿಸಬೇಕಾಗಿದ್ದ ಉತ್ತರ ಪ್ರದೇಶದ ಬಹರಾಯಿಚ್ ಜಿಲ್ಲೆಯ ನಿವಾಸಿ ಅಬ್ದುಲ್ ಕಲಾಂ, ಮದುವೆ ಮನೆಯಲ್ಲಿ ಕಿರಿಕ್ ಮಾಡಿಕೊಂಡು ಪೇಚೆಗೆ ಸಿಲುಕಿದ್ದಾನೆ.

ಹೌದು, ವಿವಾಹದ ಸಂದರ್ಭದಲ್ಲಿ ವರದಕ್ಷಿಣೆಯಾಗಿ ಬೈಕ್ ಹಾಗೂ ಬಂಗಾರ ನೀಡಬೇಕೆಂದು ವರ, ವಧುವಿನ ಕುಟುಂಬಸ್ಥರನ್ನು ಪೀಡಿಸಿದ್ದಾನೆ. ಇದಕ್ಕೆ ವಧುವಿನ ಕಡೆಯವರು ನಿರಾಕರಿಸಿದ ಕಾರಣ ಮದುವೆಯನ್ನೇ ಮುರಿಯಲು ಮುಂದಾದ ಕಾರಣ ಆಕ್ರೋಶಗೊಂಡ ವಧುವಿನ ಕಡೆಯವರು ಆತನನ್ನು ಕಟ್ಟಿಹಾಕಿ ತಲೆ ಬೋಳಿಸಿ, ಪೊಲೀಸರಿಗೆ ಒಪ್ಪಿಸಿದ್ದಾರೆ.

'ನಾನು ವಿವಾಹ ಮಂಟಪದಲ್ಲಿ ಯಾವುದೇ ಹೊಸ ಬೇಡಿಕೆನ್ನಿಟ್ಟಿರಲಿಲ್ಲ. ವಿವಾಹಕ್ಕೂ ಮುನ್ನವೇ ವರದಕ್ಷಣೆಯಾಗಿ ಬೈಕ್ ಹಾಗೂ ಬಂಗಾರ ನೀಡಬೇಕೆಂಬ ಮಾತಕತೆ ನಡೆದಿತ್ತು' ಎಂದು ವರ ಹೇಳಿಕೊಂಡಿದ್ದಾನೆ.