ಅಮ್ಮ ಮದುವೆಗೆ ಒಪ್ಪಲಿಲ್ಲವೆಂದು ಮಗಳ ಅಪಹರಣ

ಹೊಸದಿಲ್ಲಿ: ನಾಲ್ಕು ಮಕ್ಕಳ ತಾಯಿಯಾಗಿರುವ ಮಹಿಳೆಯ ಬಳಿ ಮದುವೆಯಾಗುಂತೆ ಪೀಡಿಸುತ್ತಿದ್ದ ವ್ಯಕ್ತಿಯೊಬ್ಬ ಆಕೆ ಒಪ್ಪದಿದ್ದಾಗ , 9 ವರ್ಷದ ಮಗಳನ್ನೇ ಅಪಹರಿಸಿದ ಘಟನೆ ಹೊಸದಿಲ್ಲಿಯಲ್ಲಿ ನಡೆದಿದೆ.

ಪತಿಯಿಂದ ದೂರವಾಗಿರುವ ಮಹಿಳೆ ತಾನೇ ದುಡಿದುಕೊಂಡು ಮೂವರು ಹೆಣ್ಣು ಮಕ್ಕಳು ಮತ್ತು ಮಗನನ್ನು ಸಾಕುತ್ತಿದ್ದಾಳೆ. ಮೂರು ತಿಂಗಳ ಹಿಂದೆ ಆಕೆ ಕೆಲಸದ ನಿಮಿತ್ತ ಆಕೆ ಕಮಲೇಶ್ (28) ಎನ್ನುವವನನ್ನು ಭೇಟಿಯಾಗಿದ್ದಳು. ಕೆಲವು ಬಾರಿಯ ಭೇಟಿಯ ಬಳಿಕ ಆತನಿಗೆ ಆಕೆಯ ಮೇಲೆ ಪ್ರೀತಿ ಹುಟ್ಟಿದೆ. ಮದುವೆಯಾಗೋಣ ಎಂದ ಆತನ ಮಾತಿಗೆ ಆಘಾತಗೊಂಡ ಆಕೆ ನಯವಾಗಿ ನಿರಾಕರಿಸಿದ್ದಾಳೆ.

ಆದರೆ ಹೇಗಾದರೂ ಮಾಡಿ ಆಕೆಯನ್ನು ಒಪ್ಪಸಲೇಬೇಕೆಂದು ಹಠ ತೊಟ್ಟ ಆತ ಆಕೆಯ 9 ವರ್ಷದ ಮಗಳನ್ನು ಅಪಹರಿಸಿದ.

ಮಗಳು ಕಾಣೆಯಾದಾಗ ಆಕೆಗೆ ಕಮಲೇಶ್ ಮೇಲೆ ಸಂಶಯ ಬರಲಿಲ್ಲ. ಆದರೆ ಆಕೆಯ ಮನೆಯ ಹತ್ತಿರದ ಸಿಸಿ ಕ್ಯಾಮರಾ ಪರೀಕ್ಷಿಸಿದ ಪೊಲೀಸರಿಗೆ ಬಾಲಕಿ ಬೈಕ್ ಮೇಲೆ ಹೋಗಿರುವುದು ತಿಳಿದುಬಂದಿದೆ. ಆ ದೃಶ್ಯಾವಳಿ ನೋಡಿದ ಆಕೆಗೆ ಮಗುವನ್ನು ಅಪಹರಿಸಿದ್ದು ಕಮಲೇಶ್ ಎನ್ನುವುದು ಸ್ಪಷ್ಟವಾಯಿತು.

ತಕ್ಷಣ ಕಾರ್ಯಾಚರಣೆಗಿಳಿದ ಪೊಲೀಸರು ಆತನನ್ನು ಬಂಧಿಸುವಲ್ಲಿ ಯಶಸ್ವಿಯಾದರು.