ದಾಖಲೆ ನಿರ್ಮಿಸಲು 69 ತಾಸು ಯೋಗ

ಕೊಯಮತ್ತೂರು: ಗಿನ್ನೀಸ್‌ ಬುಕ್‌ ಆಫ್‌ ವರ್ಲ್ಡ್‌ ರೆಕಾರ್ಡ್‌ ಮಾಡುವ ಮಹತ್ವಾಕಾಂಕ್ಷೆಯಲ್ಲಿ ಡಾ.ವಿ.ಗುಣಶೇಖರನ್‌ (45) ದ್ವಿತೀಯ ಅಂತಾರಾಷ್ಟ್ರೀಯ ಯೋಗ ದಿನದ ಸಂದರ್ಭದಲ್ಲಿ 69 ತಾಸು ಯೋಗ ಮಾಡಿದ್ದಾರೆ.

ಜೂನ್‌ 18ರ ಸಂಜೆ 5ಕ್ಕೆ ಆರಂಭವಾದ 'ಸುದೀರ್ಘ ಯೋಗ ಮ್ಯಾರಥಾನ್‌' ಜೂನ್‌ 21ರ ಮಧ್ಯಾಹ್ನ 2ಕ್ಕೆ ಪೂರ್ಣಗೊಂಡಿತು. ಪ್ರತಿ ತಾಸಿಗೊಮ್ಮೆ 5 ನಿಮಿಷ ವಿಶ್ರಾಂತಿ ಪಡೆಯುತ್ತಿದ್ದ ಅವರು, ಈ ಅವಧಿಯಲ್ಲಿ ಹಣ್ಣುಗಳನ್ನು ಸೇವಿಸುತ್ತಿದ್ದರು. ಯೋಗ ಮ್ಯಾರಥಾನ್‌ನಲ್ಲಿ ಅವರು 200 ಆಸನಗಳನ್ನು ಮಾಡಿದ್ದಾರೆ.

ಮದುವೆ ಮಂಟಪದಲ್ಲಿ ನಡೆದ ಗುಣಶೇಖರನ್‌ ಅವರ ಯೋಗ ಮ್ಯಾರಾಥಾನ್‌ಗೆ ಸಾವಿರ ಮಂದಿ ಸಾಕ್ಷಿ ಆಗಿದ್ದಾರೆ. 'ಗಿನ್ನೀಸ್‌ ವಿಭಾಗದ ವೀಕ್ಷಕರು ಈ ಸಂದರ್ಭದಲ್ಲಿ ಹಾಜರಿರಲಿಲ್ಲವಾದರೂ, ವಿಡೀಯೋ, ಫೋಟೊ, ಸಮಯ ದಾಖಲಿಸಿಕೊಳ್ಳಲಾಗಿದೆ. ಎಲ್ಲ ಪುರಾವೆಗಳನ್ನು ಕಳುಹಿಸಿಕೊಡಲಾಗುವುದು,' ಎಂದು ಗುಣಶೇಖರನ್‌ ಹೇಳಿದ್ದಾರೆ.

ಈ ಹಿಂದೆ ಚೀನಾದ ತಂಡ ನಿರಂತರವಾಗಿ 47 ತಾಸು ಯೋಗ ಮಾಡಿ ದಾಖಲೆ ನಿರ್ಮಿಸಿದೆ. ಕೊಯಮತ್ತೂರು, ಈರೋಡ್‌ ಹಾಗೂ ದಿಂಡಿಗುಲ್‌ ಜಿಲ್ಲೆಗಳ 40 ಶಾಲೆಗಳ ವಿದ್ಯಾರ್ಥಿಗಳಿಗೆ ಗುಣಶೇಖರನ್‌ ಕಳೆದ 10 ವರ್ಷಗಳಿಂದ ಯೋಗ ಕಲಿಸುತ್ತಿದ್ದಾರೆ.